გასულ კვირას Pantone-მა გამოაცხადა 2025 წლის ფერი – მოკა მუსი (Mocha Mousse). ზოგიერთი დიზაინერისთვის ეს მომავალი წლის გზამკვლევად იქცა. ბრენდებმა, როგორიცაა Motorola, Spoonflower და Pura, გამოუშვეს სხვადასხვა პროდუქტი ამ ხავერდოვანი, შოკოლადისფერი ტონით, ხოლო ჩემი ელფოსტა აივსო რჩევებით, თუ როგორ უნდა გაფორმდეს ნებისმიერი ნივთი მოკას მუსის ფერში.
Pantone წლების განმავლობაში ფერების ავტორიტეტულ წყაროს წარმოადგენს, მაგრამ ყველა იმ ბრენდის გვერდით, რომლებიც ამ ტენდენციას აჰყვნენ, არიან დიზაინერები და ბრენდები, რომლებიც საკუთარ გზას მიჰყვებიან – ისინი არა გლობალური ტრენდებით, არამედ საკუთარი პირადი გამოცდილებით ხელმძღვანელობენ.
არქიტექტორი და ხელოვანი ადამ ნათანიელ ფურმანი ცნობილია ფერების უკომპრომისო გამოყენებით, დაწყებული მკვეთრი ყვითლიდან ცხელი ვარდისფერით დამთავრებული. თუმცა, მისი არჩევანი მომავალი წლისთვის – მოთბო ყავისფერი ტონია, სახელწოდებით Russet.
სიდრა კასიმი არის Atoms-ის თანადამფუძნებელი – უნისექს სპორტული ფეხსაცმლის ბრენდისა, რომელიც ცნობილია დეტალებისადმი ყურადღებითა და ლიმიტირებული გამოშვების ფერთა კომბინაციებით. Atoms-ის წლის ფერი, არა ერთი, არამედ სამი ფერია, და ყველა მათგანი გრანდ კანიონითაა შთაგონებული. ესენია მდიდრული მუქი ლურჯი, თბილი ყავისფერი, რომელიც არც თუ ისე განსხვავდება Pantone-ის მოკა მუსისგან და ღრმა მოვარდისფრო-მონაცრისფრო.
ინტერიერის ლონდონელმა დიზაინერმა ნიკოლა ჰარდინგმა აირჩია მტვრიანი მოვარდისფრო-მონაცრისფრო ტონი. მტვრიანი მოვარდისფრო-მონაცრისფრო, მისი თქმით, მშვენიერ ფონს ქმნის ბევრი სხვა ფერისთვის. ეს ბინდის ფერია, ყოველი დღის დასაწყისისა და დასასრულის, და ამაში არის რაღაც დამამშვიდებელი. ფურმანის მსგავსად, ესეც ძალიან პირადული ფერია, რომელიც ჩნდება ჰარდინგის საკუთარი სამზარეულოს კარადებზე და მთელ მის სასტუმრო ოთახში – როგორც კედლებზე, ისე ჭერზე.
პიჟამების ბრენდ Lake-ის თანადამფუძნებელი და კრეატიული დირექტორი, კასანდრა ქენონი ბევრს ფიქრობს ფერებზე. მისთვის 2025 წლის ფერი არის მტვრიანი ლურჯი, რომელიც არასდროს კარგავს აქტუალობას, მიუხედავად წლისა თუ ტრენდისა.
რუქსანდრა დურუ Google-ის ფერების დიზაინერია და Color Moods-ის შემქმნელი – ონლაინ ინსტრუმენტისა, რომელიც საშუალებას გაძლევთ წარმოიდგინოთ ფერთა კომბინაციები იმ განწყობის მიხედვით, რომლის შექმნაც გსურთ. არაა გასაკვირი, რომ მისი 2025 წლის ფერი ფერების წყვილია.
ერთი მხრივ, არის ნაზად შერბილებული წითელი, რომელიც ერთდროულად მზრუნველიცაა და გამაძლიერებელიც. მეორე მხრივ, არის ოდნავ მომწვანო თეთრის ტონი, რომელსაც დურუ აღწერს არა როგორც ფერს, არამედ როგორც ატმოსფეროს.
წყარო: fastcompany
