დიდი საიდუმლო არ არის, რომ ჩვენს სამყაროში ნდობის პრობლემაა… გლობალური პანდემიის, ეკონომიკური კრიზისისა და პოლიტიკური არასტაბილურობის ფონზე, დეზინფორმაციებისა და პროპაგანდის გათვალისწინებით, ადამიანებმა უკვე აღარ იციან, ვის ან სად მიმართონ სანდო ინფორმაციის მისაღებად. თუმცა ამ საკითხზე ზრუნვა მომხმარებელთან ურთიერთობისთვის სასიცოცხლოდ მნიშვნელოვანია.
სტატისტიკური მონაცემების მიხედვით კი, გასულ წელს მონაწილეთა 80% მიიჩნევდა, რომ შესყიდვებისას ნდობა გადამწყვეტი ფაქტორი იყო, რაზეც დიდ გავლენას ასაკი ახდენდა, განსაკუთრებით კი მაშინ, როცა საქმე საინფორმაციო მედიას ეხებოდა.
Gallup/Knight Foundation-ის გამოკითხვით დადგინდა, რომ ხანდაზმულები ინფორმაციის ერთ ან ორ წყაროს ეყრდნობიან, სანდოობას კი ბრენდის რეპუტაციისა და პოლიტიკური კურსით აფასებენ. ხოლო ახალგაზრდების შემთხვევაში სიტუაცია საპირისპიროა — ისინი ინფორმაციის მისაღებად მრავალ წყაროს იძიებენ და აფასებენ იმის მიხედვით, თუ რამდენად ღიაა თავისი ფაქტებით, კვლევებითა თუ პროცესებით. შესაბამისად, საინფორმაციო გამოშვებებსაც მეტი სკეპტიციზმით უყურებენ, მათგან მხოლოდ 29% ენდობა მედიას მაშინ, როცა 55 წელზე მეტი ასაკის მქონე ადამიანებში ეს მაჩვენებელი 41%-ს აღწევს. თუმცა საინფორმაციო ამბების ჩვენს ბრენდთან დაკავშირება მაინც ღირს…
გამოდის, ზრდასრულები უფრო მეტად ეყრდნობიან ბრენდს, ახალგაზრდები კი პროცესს. ხოლო როგორც მარკეტერებს, კონკრეტული დასკვნები ბრენდის შეტყობინებების გასავრცელებლად შეგიძლიათ გამოიყენოთ. ეს სამი გზა კი მომხმარებლის ნდობის მოპოვებაში დაგეხმარებათ.
არ გასცეთ ცრუ დაპირებები
მართალია, კვლევამ აჩვენა, რომ აღმასრულებელი დირექტორების მიმართ ნდობა ახლა ყველაზე დაბალ ნიშნულს აღწევს, მაგრამ ისიც დადგინდა, რომ ბიზნესი კვლავ უფრო სანდოა, ვიდრე მთავრობები, არასამთავრობო ორგანიზაციები ან ახალი ამბების მედია. თუმცა ამას დიდი პასუხისმგებლობაც ახლავს — აღმასრულებელმა დირექტორებმა და ბიზნესის წარმომადგენლებმა დღევანდელ ყველაზე აქტუალურ გამოწვევებთან გამკლავება უნდა შეძლონ და ამასთან, საზოგადოების ჩართულობაზე დიდი ყურადღება გაამახვილონ.
აქვე, არ უნდა დაგავიწყდეთ, რომ ადამიანები იმაზე ჭკვიანები არიან, ვიდრე შეიძლება ფიქრობდეთ. ამიტომ, თუ მათ მოტყუებას შეეცდებით, ისინი აუცილებლად გაიგებენ და თქვენი სანდოობის შემცირება იმ მოკლევადიან სარგებელსაც გადაწონის, რომელიც მსგავსად მიიღეთ.
მაგალითად, 2020 წლის ზაფხულში პიარ სპეციალისტები რასიზმის საჯაროდ დასაგმობად გაერთიანდნენ. აქ კი აღმოჩნდა, რომ მაშინ, როცა კომპანია Glossier, ანტირასობრივ პოლიტიკაზე განცხადებებს ღიად აკეთებდა, მისი ყოფილი თანამშრომლები დისკრიმინაციასა და ტოქსიკურ სამუშაო გარემოზე საუბრობდნენ. სწორედ ამიტომ, მნიშვნელოვანია, დაპირებების სწორად გაცემა და მისი შესრულება, რაც მომავალში საფრთხისგან თქვენი კომპანიის რეპუტაციასაც იხსნის.
თავი აარიდეთ ისეთ აქტივობებს, რომლებიც სრულ სიმართლეზე არ არის დაფუძნებული
აქ Pfizer-ის მაგალითი უნდა განვიხილოთ, მართალია, აღმასრულებელმა დირექტორმა ალბერტ ბურლამ და მისმა გუნდმა რეკორდულ დროში ეფექტური Covid-19 ვაქცინა შექმნეს, მაგრამ 2006 წელს მათი საქმიანობა არც ასეთი წარმატებული ყოფილა. მათ ქოლესტერინის წამლისთვის 258 მილიონი დოლარის სარეკლამო კამპანია წამოიწყეს, რომლის სახეც პირველი ხელოვნური გულის გამომგონებელი რობერტ ჯარვიკი იყო.
სლოგანი — „იმიტომ, რომ მე ექიმი ვარ, არ ნიშნავს, რომ ჩემს ქოლესტერინზე არ ვდარდობ“ — მიმზიდველი იყო, მაგრამ არსებობდა ერთი პრობლემა — ჯარვიკს მედიცინის პრაქტიკოსის ლიცენზია არ ჰქონდა, სწორედ ამიტომ, რეკლამამ სწრაფი კრიტიკა გამოიწვია, სასამართლოში განხილვის საგანი გახდა და მილიონობით დოლარიც იზარალა. საზოგადოების აზრით, ამ საკითხში მნიშვნელოვანი ინფორმაცია გამოტოვებული იყო, ამიტომ მათი კამპანიაც ნახევრად მართალ ამბად ითვლებოდა…
გამოდის, თუ ინფორმაცია კონკრეტული დეტალების „დამალვას“ ითხოვს, მაშინ იგი არ უნდა გამოიყენოთ, ხოლო თუ შეცდომას დაუშვებთ, უნდა აღიაროთ კიდეც, რადგან ასეთ სიტუაციებში მომხმარებლები უფრო მიმტევებლები არიან. მსგავსი „დაუცველობა“ თქვენს პატიოსნებასაც წარმოაჩენს, რომელიც სამიზნე აუდიტორიის ნდობაზე, ბრენდთან დაახლოებასა და გრძელვადიან ჩართულობაზე დგას.
შეამოწმეთ მომხმარებლის პულსი
დაფიქრდით, ბოლოს როდის შეამოწმეთ თქვენი მომხმარებლების პულსი? იმისათვის, რომ მარკეტინგული სტრატეგიების ეფექტურობა შეაფასოთ, საკუთარ თავს ეს კითხვები უნდა დაუსვათ:
- როგორია ჩვენი მომხმარებლების განწყობა? დადებითი თუ უარყოფითი?
- როგორია ჩვენთვის სასარგებლო რეიტინგი? იზრდება თუ ეცემა?
- სამიზნე აუდიტორია ჩვენს კონტენტში ჩართულია?
- ჩვენს დაპირებებს ვასრულებთ?
რეგულარული შემოწმებით, ირჩევენ თუ არა მომხმარებლების იმას, რასაც სთავაზობთ, აღმოაჩენთ, რომ თქვენ მათ მუდმივად განვითარებად პრეფერენციებს ბევრად მარტივად დააკმაყოფილებთ. მაგალითად, სახლის სუნამოების ბრენდის SECC-ის სოციალური მედიის მენეჯერმა მათი სტრატეგია გაამხილა და თქვა, რომ ისინი მომხმარებელთა ჩართულობაზე იყვნენ ორიენტირებულნი, შესაბამისად, არა მარტო პასუხობდნენ მათ კითხვებს, არამედ ქვიზების, გათამაშებებისა და საჩუქრების დახმარებით მათ ინტერესსაც ზრდიდნენ. შედეგად, კომპანიამ ერთგული მომხმარებლების რაოდენობა და ყოველთვიური შემოსავალი 5-ჯერ გაზარდა.
დიახ, ნდობის მოსაპოვებლად ბრძოლა კვლავ გრძელდება და ეს მალე არ დასრულდება… მაგრამ კარგ მარკეტერებს შეუძლიათ ბრენდების შეტყობინებები მომხმარებლებთან ისეთი ურთიერთობების ჩამოსაყალიბებლად გამოიყენონ, რომელიც დროს გაუძლებს. ზემოთ განხილული სამი საკითხის განხორციელებით კი, ბრენდის ისეთი რეპუტაციის შექმნას შეძლებთ, რომელსაც ხალხი ენდობა.
წყარო: HBR
