საქმეზე კონცენტრირება თუ გიჭირთ, იმით დაგამშვიდებთ, რომ მარტო არ ხართ და გზებიც არსებობს, რომლითაც ამის გამოსწორება შეიძლება, იქნება ეს სუნთქვის ტექნიკებით თუ სხვა რამ. მოდით, ახლა თითოეული დეტალურად განვიხილოთ:
1. ღრმად ჩაისუნთქეთ
თუ კოგნიტიურ ფსიქოლოგ ერინ რობინსს დავუჯერებთ, სტრესს ფოკუსირების უნარის შეზღუდვა შეუძლია. ჩათვალეთ, რომ თქვენი ყურადღება სინათლეა, რომლის შემცირება თუ გაზრდა თავადვე შეგიძლიათ — როცა სტრესში ხართ, ვიწროვდება, თითქოს გვირაბის ხედვას ემსგავსება, რა დროსაც ბრძოლისა თუ გაქცევის პასუხები აქტიურდება, გული სწრაფად ცემს და შფოთვის გამო ოფლიანდებით კიდეც.
ამ დროს კი თუ რაღაც თქვენს სრულ ყურადღებას მოითხოვს, ღრმად ჩაისუნთქეთ და ეცადეთ, თქვენი სხეული დაამშვიდოთ — „სტრესზე თქვენი სხეულის პასუხია ის, რაც ყურადღების მოკრებაში გიშლით ხელს“.
2. მიეცით აზრებს ხეტიალის საშუალება
თუ ფოკუსირება გიჭირთ, შეისვენეთ და თქვენს გონებას ხეტიალის საშუალება მიეცით. სწორედ ამას გვირჩევს ფსიქიატრი სრილი პილეი, გვეუბნება, რომ ტვინის მიკროსქემის ეს ქსელი არის სწორედ ის ადგილი, რომელშიც ჩვენი გონება ინოვაციებს პოულობს, შემოქმედებითობას იჩენს და იღებს უკეთეს გადაწყვეტილებებს. აქ კი შეგიძლიათ ე. წ. პოზიტიური კონსტრუქციული ოცნებით მიხვიდეთ, სცადოთ გონებით მოგზაურობა თქვენთვის სასურველ ადგილზე, წარმოიდგინოთ რომ ტყეში სეირნობთ ან ზღვის სანაპიროზე ირუჯებით. ამ პროცესს კი თან დაურთეთ ისეთი მარტივი აქტივობები, როგორებიცაა სეირნობა, ქსოვა ან მებაღეობა. დაახლოებით 20 წუთი გაატარეთ ასე და შემდეგ ნახეთ, რა მოხდება.
3. თავი აარიდეთ ყურადღების გამფანტავ საკითხებს
თუ აღმოაჩენთ, რომ ბევრ დროს ფლანგავთ სოციალურ მედიაში, ეს თავს დამნაშავედაც გაგრძნობინებთ, გამოსავალს კი ფსიქოლოგები ბარიერების დაწესებაში ხედავენ. ეცადეთ, შეტყობინებები გათიშოთ, წაშალოთ სოციალური მედია აპლიკაციები ტელეფონიდან, რათა დაბრკოლებებს თავი აარიდოთ. თუ ესეც არ იქნება საკმარისი, ეკრანის ტაიმერებს ან აპლიკაციის დაბლოკვას მიმართეთ.
4. იყოლიეთ პასუხისმგებლობიანი მეგობარი
თუ ვარჯიშის დაწყება გიჭირთ, ამ ამბავში უფრო პასუხისმგებლობიანი მეგობარი შეგიძლიათ, დაიხმაროთ, ისეთი ადამიანი, რომელიც მიზნების მიღწევაში დაგეხმარებათ. უკვე კვლევამაც კი აჩვენა, რომ ამ მიდგომით ადამიანები უფრო მეტს აღწევენ. მათ შორისაა JAMA Internal Medicine-ის ნაშრომიც, რომელიც გვეუბნება, რომ წყვილები უფრო მეტად გვთავაზობენ ჯანსაღ ქცევით ცვლილებებს, როცა ერთ-ერთი ამის ინიციატორია, მათ შორის კი მეტი ვარჯიში და მოწევაზე თავის დანებებაც მოიაზრება.
5. გახსოვდეთ, თქვენი დრო ძვირფასია
დაფიქრდით თქვენთვის ყველაზე მნიშვნელოვან ადამიანებსა და საკითხებზე, თქვენს მეგობრებზე, ინტერესებსა თუ ჰობებზე. შემდგომ კი დააკვირდით, როგორ ანაწილებთ მათზე დროს. Four Thousand Weeks: Time Management for Mortals-ის ავტორი ოლივერ ბურკმენი გვეუბნება — „თუ თქვენს ცხოვრებაში ყველაზე ღირებულს, დროს გასცემთ, დარწმუნდით, რომ ამას ჭკვიანურად გააკეთებთ“.
