როდესაც ადამიანი რამდენიმე წელს ითვლის თავის პროფესიაში და გამოცდილებას დააგროვებს, ამ ცოდნის ახალბედა კოლეგებისთვის გაზიარება ერთ-ერთი ყველაზე ღირებული რამ შეიძლება იყოს. განსაკუთრებით მაშინ, როდესაც ეს ის რჩევებია, რომელთა მოსმენაც თავად სჭირდებოდა კარიერის დასაწყისში.
კრეატიულ ინდუსტრიებში თანამშრომლობა და ერთმანეთის მხარდაჭერა ძალზე მნიშვნელოვანია, თუმცა ხშირად კოლეგებს მენტორობისთვის დრო არ აქვთ და ახალმიღებულ ადამიანს დამოუკიდებლად უწევს მუშაობა, ზოგჯერ ისიც კი არ იცის, ვის და რა უნდა ჰკითხოს.
სწორედ ამიტომ, გადავწყვიტეთ, კრეატიული სფეროს წარმომადგენლების გამოცდილებიდან რამდენიმე მნიშვნელოვანი რჩევა გავაზიაროთ, რომლებიც კარიერის ნებისმიერ ეტაპზე შეიძლება გამოგადგეთ.
გახდით ადამიანი, რომელსაც ენდობიან
როგორც წესი, კარიერის დასაწყისში შესრულებული სამუშაო პირდაპირ კლიენტამდე ეგრევე არ მიდის. მას უფროსი დიზაინერები, კრეატიული დირექტორები ან გუნდის სხვა წევრები ამოწმებენ და ხშირად ცვლიან კიდეც.
ამიტომ დამწყები სპეციალისტისთვის მთავარი მიზანი პირველ ეტაპზე აუცილებლად გამორჩეული კრეატიულობის დემონსტრირება არ უნდა იყოს. გაცილებით მნიშვნელოვანია სანდო და პასუხისმგებლობიან ადამიანად ჩამოყალიბება.
დავალებები დროულად უნდა შესრულდეს, ფაილები მოწესრიგებული იყოს, ტექსტში შეცდომები არ დარჩეს და გუნდის წევრებს მუდმივად არ უწევდეთ შეხსენება, რომ კონკრეტული საქმე დასასრულებელია.
დასვით კითხვები
კარიერის დასაწყისში ბევრს ეშინია, რომ კითხვების დასმით გამოუცდელობას გამოავლენს. ამიტომ ურჩევნია, რაღაც არ იცოდეს, მაგრამ ამის შესახებ არ იკითხოს. რეალურად კი, ეს ერთ-ერთი ყველაზე ცუდი მიდგომაა.
უფროსმა კოლეგებმა არ იციან, კონკრეტულად რა არ იცით, თუ ამას თავად არ შეატყობინებთ. კითხვების დასმა კი არა მხოლოდ ცოდნის მიღებაში, არამედ მენტორთან ან გამოცდილ კოლეგასთან პროფესიული ურთიერთობის ჩამოყალიბებაშიც გეხმარებათ.
ამიტომ „სულელური კითხვების“ დასმის არ უნდა შეგეშინდეთ. ყველა გამოცდილი პროფესიონალი ოდესღაც დამწყები იყო და ზუსტად იცის, როგორია ისეთი რაღაცების სწავლა, რაც სხვებისთვის უკვე ნაცნობია.
ადამიანებთან ურთიერთობას არ მოერიდოთ
კრეატიულ ინდუსტრიაში პროფესიული კავშირების ჩამოყალიბება მხოლოდ სოციალურ ქსელებში აქტიურობას არ ნიშნავს.
რეალური საუბრები, შეხვედრები, ღონისძიებები და ყოველდღიური კომუნიკაცია ხშირად ბევრად უფრო მნიშვნელოვანია.
ეს რჩევა მხოლოდ კარიერის დასაწყისში მყოფებს არ ეხებათ. გამოცდილ სპეციალისტებსაც შეიძლება გამოადგეთ, რადგან პროფესიული კავშირების მნიშვნელოვანი ნაწილი სწორედ არაფორმალური საუბრებიდან და შემთხვევითი შეხვედრებიდან იწყება.
ახსენით, რატომ მიიღეთ კონკრეტული გადაწყვეტილება
დამწყები კრეატორისგან არავინ ელოდება, რომ პირველივე დღიდან ყველა გადაწყვეტილებას სწორად მიიღებს. შეცდომები პროფესიული განვითარების ნაწილია.
თუმცა მნიშვნელოვანია, რომ ადამიანს შეეძლოს საკუთარი ნამუშევრისა და გადაწყვეტილებების არგუმენტირება. მხოლოდ იმის თქმა, რომ რაღაც „კარგად გამოიყურება” საკმარისი არ არის.
შესაძლოა, უფროსი კოლეგა საბოლოოდ მაინც არ დაეთანხმოს გადაწყვეტილებას, მაგრამ თუ ხედავს ლოგიკურად ჩამოყალიბებულ არგუმენტს, პროფესიულად უფრო სერიოზულად აღგიქვამთ.
იყავით გახსნილი ახალი პროფესიული კავშირებისთვის
ნეთვორქინგი ბევრისთვის უსიამოვნო სიტყვაა, რადგან მას ხშირად ხელოვნურ ურთიერთობებთან ან საკუთარი თავის ძალით წარმოჩენასთან აიგივებენ.
რეალურად კი, პროფესიული კავშირების ჩამოყალიბება შეიძლება გაცილებით მარტივი იყოს: საუბარი ადამიანებთან, ახალი ნაცნობების გაჩენა და სხვა პროფესიონალების მიმართ გულწრფელი ინტერესის გამოხატვა.
არასდროს არის ცნობილი, კონკრეტული საუბარი მომავალში სად მიგიყვანთ. ახალი სამსახური, თანამშრომლობა, კლიენტი ან საინტერესო პროექტი შესაძლოა სრულიად შემთხვევითი შეხვედრიდან დაიწყოს.
საკუთარ თავს ზედმეტად ნუ გააკრიტიკებთ
ბოლო რჩევა ყველაზე მარტივია: დამშვიდდით.
კრეატიულ ინდუსტრიაში ე.წ. იმპოსტერის სინდრომი საკმაოდ გავრცელებულია. ადამიანს შეიძლება მუდმივად ჰქონდეს განცდა, რომ საკმარისად კარგი არ არის, სხვებმა მასზე მეტი იციან და ერთ დღეს მისი პროფესიული შესაძლებლობები აუცილებლად გამოაშკარავდება.
ეს განცდა მხოლოდ დამწყებ სპეციალისტებს არ აქვთ. გამოცდილ პროფესიონალებსაც შეიძლება ჰქონდეთ მსგავსი ეჭვები, უბრალოდ, ისინი უკვე უკეთ ახერხებენ ამის დამალვას და საკუთარ თავთან გამკლავებას.
კარიერის განვითარება არ ნიშნავს, რომ გარკვეულ ეტაპზე ყველა კითხვას პასუხი ექნება და ყველა გადაწყვეტილებაში აბსოლუტურად დარწმუნებული იქნებით. პირიქით, პროფესიული ზრდის მნიშვნელოვანი ნაწილია იმის გაცნობიერება, რომ ყველაფრის ცოდნა არავის მოეთხოვება.
მთავარია, გქონდეთ სწავლის სურვილი, დასვათ კითხვები, ისწავლოთ შეცდომებზე, დაამყაროთ ურთიერთობები და საკუთარ თავს განვითარების უფლება მისცეთ.
