22
Feb
2017

6 გზა საუკეთესო თანამშრომლების დასაკარგად

22 Feb 2017

pasha-statiebi
pasha-statiebi

ბიზნესის სიძლიერეზე ზედმიწევნით აისახება მისი თანამშრომლების მდგომარეობა. ეს კი ნიშნავს, რომ მართვის ამ ჩვეულ შეცდომებს აუცილებლად უნდა აარიდოთ თავი.

სხვადასხვა სამუშაო გარემოში, როგორც წესი, მიკრო სოციუმები ყალიბდება. მათში კი ურთიერთობები ვითარდება. იმის გამო, რომ კვირის განმავლობაში სამსახურში ამდენ დროს ვატარებთ, სამუშაო გარემოს და ამ ურთიერთობების ბუნება ძალიან მნიშვნელოვანი ხდება. ყველამ კარგად ვიცით, რომ ბედნიერი და გაწონასწორებული თანამშრომლები ყველაზე პროდუქტიულები არიან და არ არსებობს იმ ურთიერთობაზე მნიშვნელოვანი რამ, რაც დამქირავებლებსა და დაქირავებულებს შორის არსებობს.

დამსაქმებელს, ინდივიდუალური ზედამხედველის თუ მთლიანად კომპანიის სახით, უდიდესი გავლენა აქვს თანამშრომლების მოტივაციაზე, განწყობასა და სამუშაო ეფექტურობაზე. იმ ფუფუნების ფონზე, რასაც ისეთი დამსაქმებლები გვთავაზობენ, როგორებიცაა Facebook და Google, თავის გამოჩენა დაუძლეველ დავალებად შეიძლება მოგვეჩვენოს. მაგრამ საქმე მხოლოდ მუდმივ კეთილგონიერებაში, ღიაობასა და თანამიმდევრულობაშია, რაც თქვენ თანამშრომლებს სტაბილურ და კომფორტულ სამუშაო გარემოს შეუქმნის. თუ ამ თვისებებით არ გამოირჩევით ეს, შესაძლოა საუკეთესო ტალანტად დაგიჯდეთ. წარმოგიდგენთ იმ ექვს შეცდომას, რაც თქვენს საუკეთესო თანამშრომლებს აუცილებლად გაანაწყენებს. თუ რომელიმე მათგანი თქვენთვის კარგად ნაცნობია, ეცადეთ აირიდოთ, გამოასწოროთ ან მოაგვაროთ ის.

  • თქვენს თანამშრომლებს არაკომფორტულ სამუშაო გარემოს უქმნით.

მაშინაც კი, თუ სტანდარტული 40 საათიანი სამუშაო კვირა არ გაქვთ, თქვენი თანამშრომლები ოფისში დიდ დროს ატარებენ. სამსახური მეორე სახლია. ასე რომ, თავს ყველა კომფორტულად და კარგად უნდა გრძნობდეს.

ზოგჯერ დამსაქმებელი იმდენად არღვევს სამუშაო გარემოს, რომ თანამშრომელს თავი ნემსებზე ჰგონია. ოფისში სეირნობა ან ყავის მომზადებისას კოლეგასთან გამოლაპარაკება დასაქმებულის პროდუქტიული სოციალიზაციის წყაროა. ეს მოკლე შესვენებები მათ გარემოში ადაპტირებას უწყობს ხელს და საბოლოო ჯამში სამუშაო თავდაჯერებულობაში გადაიზრდება.

რჩევა: თუ თქვენს ოფისში ავტორიტეტული პიროვნება ან მიკრომენეჯერია, დარწმუნდით, რომ ის დაძაბულ სიტუაციას ან დისკომფორტს არ ქმნის.

  • არჩევთ, თუ ვის ეხება წესები და ვის არა.

გინდათ თქვენი საუკეთესო თანამშროლების უმოკლესი გზით ფრუსტრირება გასწავლოთ? წესების შესრულება მხოლოდ გარკვეულ ჯგუფს აიძულეთ. დამსახურებულ პრივილეგიასა და გარკვეული წესების მხოლოდ კონკრეტულ ადამიანებზე მორგებას შორის დიდი განსხვავებაა. ცხადია, 10 წლის სტაჟის მქონე თანამშრომელს 10 თვის თანამშრომელთან შედარებით განსხვავებული პრივილეგიები ექნება. უნდა არსებობდეს მოლოდინის გარკვეული დონე, რაც ყველა თანამშრომელს ესადაგება.

მაგალითისთვის, თუ ერთი თანამშრომელი პროექტის შესრულებისას მუდმივად უშვებს შეცდომებს და ამის გამო არანაირ შენიშვნას არ იღებს და ამის პარალელურად, არსებობს თანამშრომელი, რომელმაც მხოლოდ ერთი შეცდომა დაუშვა და საყვედურიც მიიღო, ის აუცილებლად წამოჭრის უსამართლოდ მოპყრობის საკითხს.

რჩევა: კარგად გაითავისეთ თქვენი ოფისის პოლიტიკა და დარწმუნდით, რომ ის ყველა თანამშრომელს თანაბრად ეხება.

  • აიგნორებთ მათ პირად საჭიროებებს.

თქვენი თანამშრომლები ადამიანები არიან. ისინი უშვებენ შეცდომებს, აქვთ გარკვეული ვალდებულებები, აქვთ დაღმასვლები, აღმასვლები და ზოგჯერ დამსაქმებლის ნაცვლად მენტორის როლის მორგება მოგიწევთ. ის დამსაქმებელი, რომელიც დასაქმებულისგან სრულყოფილებას ელის, ან „მხოლოდ სამსახური, მხოლოდ ბოსის“ მიდგომა აქვს, გუნდის შთაგონებას ვერასოდეს მოახერხებს.

იმის გაცნობიერება, რომ თქვენი თანამშრომლები ადამიანები არიან და მათთვის სამუშაო დავალებების მიღმა თქვენი დახმარების შეთავაზება, ისეთ სამუშაო ურთიერთობებს აყალიბებს, რაც პროდუქტიულობის წყარო ხდება. თქვენი თანამშრომლების გვერდით ყოფნით, მათ თვალში თქვენც ინდივიდად გამოჩნდებით, რაც თქვენთვის იმედის გაცრუებას გაურთულებთ.

რჩევა: ისაუბრეთ ისეთ საკითხებზეც, რაც მხოლოდ სამუშაოს არ ეხება და გაიცანით თქვენი თანამშრომელი.

  • დაუტოვეთ ზრდის რესურსი.

ალბათ არ არსებობს ადამიანი, რომელიც თავისი პირველი სამსახურის დაწყებისას, სიცოცხლის ბოლომდე ყოველგვარი ზრდისა თუ დაწინაურების გარეშე იმავე პოზიციაზე დარჩენას ისურვებდა. თანამშრომლების მოტივაციას და სამუშაოს უკეთეს შესრულებას სწორედ წინ ყურება და პროფესიული ზრდა განაპირობებს. თუ ყველა ის საქმე, რასაც თქვენი თანამშრომელი ასრულებს ერთხაზოვანია და არც არავინ ეუბნება, თუ როგორ შეუძლია გააფართოვოს თავისი სამოქმედო არეალი, საბოლოო ჯამში ფრუსტრირებულ პიროვნებას მიიღებთ, რომელიც სხვა დამსაქმებლის ძებნას დაიწყებს.

ადგილზე ზრდის გზა აადვილებს იმ საქმიანობის გამოვლენას, რაც კომპანიაშივე ზრდისთვისაა აუცილებელი. აქ შესაძლია ისეთი წახალისებები გამოიყენოთ, როგორიცაა ბონუსები, დაწინაურებები და სახელფასო განაკვეთის ზრდა.

რჩევა: დარწმუნდით, რომ თქვენმა თანამშრომლებმა ზუსტად იციან, თუ რა დონის დაწინაურებას უნდა ელოდონ, ან არ ელოდონ.

  • უკუკავშირი ყველასთან არ გაქვთ.

როგორც დამსაქმებელმა, უკუკავშირი ერთ-ერთი მნიშვნელოვანი რამ არის, რაც თქვენს თანამშრომლეს შეიძლება მიაწოდოთ. იქნება ეს კონსტრუქციული კრიტიკა, წინსვლის სამოქმედო გეგმა, თუ კარგად შესრულებული სამუშაოსთვის შექება, უკუკავშირი დამსაქმებელსა და დასაქმებულს შორის კარგი კომუნიკაციის საწინდარია.

თუ არ არსებობს უკუკავშირი, თანამშრომელი თავს შეუმჩნევლად გრძნობს და საკუთარი საქმის მიმართ აპათიურად განეწყობა, რაც დადებით შედეგამდე არასოდეს მიგვიყვანს. უკუკავშირი იმის ნაწილია, რაც დასაქმებულს საკუთარი საქმიანობიასდმი კრიტიკულად მიდგომას და გაუმჯობესების გზების მოიძიებას აიძულებს.

რჩევა: დარწმუნდით, რომ გაქვთ უკუკავშირის სისტემა.

  • არ გაქვთ უკმაყოფილების/წყენის დაფიქსირების არხი.

უკუკავშირის პროცესის ქონის მსგავსად, უნდა გქონდეთ სისტემა, რომელიც თანამშრომელს საკუთარი უკმაყოფილების დაფიქსირების საშუალებას მისცემს. ეს გაცილებით ადვილია, თუ კომპანიაში ადამიანური რესურსების დეპარტამენტი არსებობს. მაგრამ ამ დანაყოფის არ არსებობის შემთხვევაში, ასეთი სისტემა გაცილებით მნიშვნელოვანი ხდება.

თანამშრომლებმა უნდა იცოდნენ და კარგად ესმოდეთ იმ არხის მნიშვნელობა, რომლის საშუალებითაც ფორმალურად დააფიქსირებენ თავიანთ უკმაყოფილებას და და თქვენ, როგორც დამსაქმებელი, ვალდებული ხართ უზრუნველყოთ ასეთი არხის არსებობა და ხელმისაწვდომობა. მსგავსი სისტემის არ არსებობის შემთხვევაში დასაქმებული წყენას ან გულში ჩაიდებს, ან დროს იმაზე ფიქრში დახარჯავს, თუ ვის შეიძლება თავისი მდგომარეობის შესახებ მოუყვეს. ორივე გარემოება მხოლოდ ავნებს დადებით სამუშაო გარემოს.

რჩევა: მაშინაც კი, თუ თქვენს ორგანიზაციას არ ყავს ადამიანური რესურსების დეპარტამენტი, დარწმუნდით, რომ ადამიანური რესურსების პოლიტიკა თქვენს კომპანიაში ნამდვილად დანერგილია.

წყარო: Inc.

 



განხილვა