21
ივნ
2018

ქართული სოციალური პრინტი Cannes Lions-ზე, ACT Responsible-ის გამოფენის გამარჯვებული გახდა!

21 ივნ 2018

DDB BetterFly-ს სოციალური პრინტი – One Shot არის პირველი ქართული ნამუშევარი, რომელმაც კანის საერთაშორისო კრეატიულ ფესტივალზე, ACT Responsible-ის გამოფენაზე, ვიზიტორებისა და ინტერნეტმომხმარებლების ხმებით გაიმარჯვა და სპეციალური ჯილდო – Act Responsible Cannes Tribute to Creativity For Good მოიპოვა!

გამოფენიან-მოგებიანად საუკეთესო ამბავია, რადგან უამრავი ადამიანი დაინახავს, რომ ამ ერთ ციცქნა ქვეყანაში სოციალური რეკლამა ძალიან მაგრად გამოგვდის და სხვა, წესით უფრო მაგარ ქვეყნებს არაფრით ჩამოვუვარდებით“, – გვითხრა პრინტის არტ დირექტორმა და ქოფირაითერმა – ლაშა შრუტე მილორავამ.

ACT Responsible ერთ-ერთი ყველაზე დიდი სოციალური რეკლამის პლატფორმაა, რომელიც წლის განმავლობაში აგროვებს სხვადასხვა, სოციალურ თემაზე შექმნილ ასობით სარეკლამო ნამუშევარს, მათგან კი საუკეთესოებს არჩევს კანზე გამოფენისთვის. წელს Environment-ის კატეგორიაში 12 პრინტი იყო წარმოდგენილი, აქედან ორი ქართული – DDB BetterFly-სა და ABK-ს ნამუშევრები. შემდეგი ეტაპი ხმის მიცემა იყო, რომელიც მიმდინარეობდა როგორც ონლაინ, ასევე, იქვე, კანში. ხმების დაჯამების გზით, გამოვლინდა გამარჯვებული პრინტი, რომელიც DDB BetterFly-ში, World Wide Fund Georgia-სთვის, ლაშა შრუტე მილორავას (ქოფირაითერი და არტ დირექტორი), ანუკა კვეზერელის (არტ დირექტორი), ნიკა მონასელიძისა (არტ დირექტორი და ილუსტრატორი) და ირინა ღუღუნიშვილის (პროექტის მენეჯერი) კოლაბორაციით შეიქმნა.

განხილვა