შემდეგ ჯერზე, როცა რეკლამა შეგხვდებათ, თვალები დახუჭეთ, ხმას ჩაუწიეთ და საკუთარ თავს ჰკითხეთ: ვიცი, რომელი ბრენდის რეკლამაა? ვიცი, რას მთავაზობენ?
სანამ მხოლოდ მხედველობისა და სმენის უნარის მქონე ადამიანებისთვის იქმნება კონტენტი, პირიქით, მხედველობა- და სმენადაქვეითებული ადამიანები მუდმივ სტრესს განიცდიან.
„ჩემმა ქმარმა, თვალის დაავადების გამო, 15 წლის წინ დაკარგა მხედველობა“, – ამბობს შერი ლოურენსი, Tylie-ს სარეკლამო გადაწყვეტების პრეზიდენტი. „ტელევიზორს, როგორც წესი, მაშინ ვუყურებთ, როცა ვჭამთ და როდესაც სარეკლამო ჭრა მთავრდება, ის ყოველთვის ერთსა და იმავეს მეკითხება: „რაზე იყო ეს რეკლამა?“.
როგორ შეიძლება, რეკლამის განმთავსებლებმა თავიანთი პროდუქტები გაყიდონ, როდესაც ისინი არ ამბობენ, თუ ვისთვისაა განკუთვნილი?
„გლობალურად, 385 მილიონი უსინათლო ან მხედველობადაქვეითებული ადამიანია. და 466 მილიონი სმენადაქვეთებული აშშ-სა და დიდ ბრიტანეთში. ბრენდები საუბრობენ ინკლუზიურობის შესახებ, მაგრამ მიუხედავად ამისა, მთელს ამ სამყაროში ამ ადამიანებს უგულებელყოფენ “, – განმარტავს ლოურენსი.
სწორედ ეს ადამიანები – უსინათლოები, ან მხედველობადაქვეითებულები იქცნენ პრიორიტეტად Tide-ის სუპერთასისთვის შექმნილ რეკლამაში.
დღესდღეობით, სმენადაქვეითებულთათვის რეკლამების ხელმისაწვდომობის ზომების მიღების თვალსაზრისით, ბევრად უფრო დიდი წინსვლა გვაქვს, მხედველობადაქვეითებულებთან შედარებით. ტექნიკური თვალსაზრისით, სუბტიტრების გამოყენება უფრო მარტივია და ამიტომაც.
„წერილობითი აღწერა, ზოგადად, უფრო განვითარებულია, ვიდრე აუდიო აღწერა”, – აღნიშნავს ASA- ს მედიისა და საზოგადოებასთან ურთიერთობის მენეჯერი, მეტ უილსონი. „რეკლამაში აუდიო აღწერილობის ჩართვის რამდენიმე ტექნიკური დაბრკოლება არსებობს, მაგალითად, დამატებითი აუდიო ტრეკის გამოყენება/ყველა საჭირო სიტყვის 15 წამში ჩატევა“.
„მიუხედავად იმისა, რომ ბრენდები: P&G, Microsoft, eBay, Amazon… ცდილობენ, თავიანთი რეკლამები უფრო ხელმისაწვდომი გახადონ, მათი ძალისხმევა მხოლოდ ზღვაში წვეთია. პროგრესი არსებობს, მაგრამ ბევრად მეტია საჭირო“, – ამტკიცებს RNIB-ს ტექნოლოგიების მენეჯერი.
უკვე ოთხი წელი გავიდა მას შემდეგ, რაც ლოურენსმა ხელმძღვანელობა დაარწმუნა, რეკლამებში DVS, ანუ ნამუშევრებში დამატებითი აუდიო აღწერები გამოეყენებინა. თუმცა ისიც მართალია, რომ Tylie-ს გუნდი ერთადერთია აშშ-ში, რომელიც მხედველობით შეზღუდული შესაძლებლობის მქონე პირთათვის რეკლამებს ხელმისაწვდომს ხდის.
„ზოგიერთი კლიენტი ამბობს: „ჩვენ მივესალმებით ამას, აბსოლუტურად, გეთანხმებით, რომ უნდა გავაკეთოთ“. მაგრამ შემდეგ აღმოჩნდება ხოლმე, რომ ცვლილებებისთვის მზად არ არიან და გვიბრუნდებიან შეკითხვებით: „რას გულისხმობთ, რომ სხვა აუდიო ტრეკს დაამატებთ? ჩვენ უკვე მილიონი დოლარი დავხარჯეთ ამ მშვენიერი სარეკლამო რგოლის შესაქმნელად და ანუ, რას ვაპირებთ?“
„ამიტომაა მნიშვნელოვანი, რომ თავიდანვე DVS–ის გათვალისწინებით დავიწყოთ ნამუშევრების მომზადება“, – ვილსონის თქმით, რეკლამის განმთავსებლებმა დასაწყისიდანვე უნდა იზრუნონ, რომ შემდეგ ყველაფერი არ აირდაირიოს. იმასაც ამბობს, რომ „ეს ადვილი არ არის“.
„ისევე, როგორც დახურული აღწერები, თუ ეს სავალდებულო არ იქნება, ყოველთვის გამოინახება მიზეზი, რის გამოც რეკლამის განმთავსებლები ამას არ გააკეთებენ“, – ამბობს ლოურენსი.
ამიტომ მისი რეკომენდაციაა, რომ ეს სავალდებულო გახდეს.
P&G-ის გლობალური ხელმისაწვდომობის ლიდერი, სემ ლატიფი: „ჯერ კიდევ დიდი გზა გვაქვს გასავლელი, მაგრამ ნელ-ნელა ბიზნესი იწყებს იმის გაცნობიერებას, რომ ინკლუზიური საქმიანობა, სწორედ მის ზრდასა და განვითარებას მოემსახურება“.
