„აიაქსმა“ ახალი ფორმა წარადგინა – „ზურგზე გვარებს არ დავაწერთ“

ამსტერდამის „აიაქსმა“ ახალი სათამაშო მაისური წარადგინა, რეტრო სტილში გაცოცხლებული ძველი ფორმა გულშემატკივრებში უკვე აღფრთოვნებას იწვევს, დღეს დილით დაწყებული გაყიდვების შემდეგ, ყველა მარაგი ამოიწურა და კლუბმა ფანშოპები ქალაქისა და ქვეყნის მასშტაბით, უკვე დახურა. გაყიდვები ხვალიდან გაგრძელდება.

ახალ სათამაშო მაისურს ძველი რეტრო ლოგო ამშვენებს. გუნდის ფორმას ეს ლოგო 1928 – 91 წლებში ამშვენებდა, გუნდის მარკეტინგული გუნდის გადაწყვეტილებით, ახალ სეზონზე ადგილობრივი ჩემპიონატისა და თასის მატჩებში გუნდის ზურგზე ფეხბურთელების გვარები დატანილი არ ექნება, სათამაშო ეკიპირებაზე საიდენტიფიკაციო ნიშნად მხოლოდ სათამაშო ნომრები იქნება, ასევე სპონსორთან მოლაპარაკებების შემდეგ წინა მხარეს სატიტულო სპონსორის ლოგო ოდნავ პატარა ზომით იქნება დატანილი, უკანა მხარეს განთავსებული ნომრების ქვედა ნაწილში კი გუნდის რეტრო ლოგოები განთავსდება. მთავარი ფერი – წითელი უფრო გამუქდა და ახალ ფორმაზე ტრადიციულ თეთრ ფერთან ერთად კომბინირებს.

„აიაქსი“ გვარით დაბრენდილი მაისურებით მხოლოდ უეფას ჩემპიონთა ლიგის გათამაშებაში იასპარეზებს. კლუბი მომავალ კვირას გასვლით და მესამე სათამაშო ფორმასაც წარადგენს.

„გვინდოდა, კარგად დავიწყებული ძველი კვლავ განახლებულიყო და გულშემატკივრებისთვის ეს სიახლის სახით შეგვეთავაზებინა. ჩვენ ზუსტად ვიცით, რა სურთ და მოსწონთ მათ. ახალი სათამაშო ფორმით ყველა გახარებული და ბედნიერია. ამ პრინციპით განახლდება ასაკობრივი და ქალთა კლუბების სათამაშო ფორმებიც. გვჯერა, ახალი სათამაშო ფორმა იღბლიანი იქნება და წინ ბევრი გამარჯვებები გველოდება“, – აცხადებს „აიაქსის“ მარკეტინგის მენეჯერი, ლეონ მასტრიხსი.

ახალი სათამაშო ფორმის ღირებულება 90 ევროს შეადგენს.