26
Nov
2019

საერთაშორისო გამოცდილება და პროფესიული ზრდის შესაძლებლობა – Majorel-ის ელექტრონული კომერციის ექაუნთ მენეჯერი ანა იორამაშვილი

26 Nov 2019

დასაქმების ბაზარზე არც ისე ადვილია ისეთი სამსახურის პოვნა, სადაც გამოცდილება გადამწყვეტი ფაქტორს არ წარმოადგენს, თუმცა მეიჯერელზე ამას ნამდვილად ვერ ვიტყვით. საერთაშორისო კომპანია მეიჯერელი ქართულ ბაზარზე, 2016 წელს Arvato Bertelsmann-ის სახელით შემოვიდა, ხოლო, 2019 წელს  მნიშვნელოვანი ცვლილებები განიცადა, arvato bertelsmann-სა და Saham- ის გაერთიანებით წარმოიქმნა სრულიად ახალი ბრენდი Majorel-ი, რომელიც ერთ-ერთი მსხვილი კომპანიაა ბიზნეს პროცესების აუთსორსინგის (BPO Sector) სფეროში, მსოფლიოს მასშტაბით 29 ქვეყანაში ოპერირებს და თანამშრომელთა რაოდენობა 48,000-ს აღემატება.

საქართველოში, თბილისის ორ ოფისსა და ქუთაისის ერთ ოფისში უკვე 1000-ზე მეტი ადამიანია დასაქმებული. მეიჯერელის თანამშრომლები მსოფლიოში ცნობილი კომპანიების მომხმარებლებს ეხმარებიან საჭირო ინფორმაციის მოძიებაში, პასუხობენ მათ შეკითხვებს და პრობლემის გადაჭრის გზებს სთავაზობენ. მეიჯერელ საქართველო 6 განსხვავებულ პროექტს ახორციელებს.

ჩვენი დღევანდელი რესპოდენტი კომპანია მეიჯერელის ელექტრონული კომერციის ექაუნთ მენეჯერი ანა იორამაშვილია, რომელმაც მუშაობა მეიჯერელში თავდაპირველად, ელექტრონული კომერციის ექაუნთ დირექტორის ასისტენტის პოზიციაზე დაიწყო.

M: გვიამბეთ, როდის და როგორ დაიწყეთ მუშაობა მეიჯერელში? რა პოზიცია იყო? რით იყო მიმზიდველი ეს პოზიცია თქვენთვის, იმ მომენტში?

მეიჯერელ საქართველოში მუშაობა 2016 წელს ექაუნთის დირექტორის ასისტენტად დავიწყე, მაშინ, როდესაც კომპანიამ ქართული წარმომადგენლობა გახსნა თბილისში. ეს პოზიცია მომხიბვლელი იყო, რადგან კომპანიის და მისი საქმიანობის სრულყოფილი შესწავლის საშუალება მომეცა. იმ პერიოდში, როგორც საქართველოში ელექტრონული კომერციის ექაუნთის წარმომადგენელი, ჩართული ვიყავი ყოველდღიურ ოპერაციებში, ასევე სხვადასხვა შეხვედრისა თუ კონფერენციის ფარგლებში მქონდა საშუალება ახლოს გამეცნო სხვა ქვეყნების მსგავს პოზიციაზე არსებული ადამიანები, და სწორედ მათგან მიმეღო საერთაშორისო გამოცდილება. ალბათ გამოვყოფდი ერთ მნიშვნელოვან ფაქტს, ეს არის გლობალურ ბრენდებთან პირდაპირი კავშირი, და მათთან აქტიური მუშაობის შესაძლებლობა.

M: მარკეტინგისა და მენეჯმენტის სპეციალისტს, რით დაგაინტერესათ ექაუნთ მენეჯმენტმა?

მოგეხსენებათ, ეს პოზიცია მსხვილ კლიენტებთან საქმიანი ურთიერთობის მენეჯმენტს გულისხმობს, რომელიც ჩემი სპეციალობის ერთ-ერთი განხრაა. კლიენტი, რომელზეც მე მეიჯერელში პასუხისმგებელი ვარ, მსოფლიოში ერთ-ერთი უმსხვილესი ელექტრონული კომერციის პლატფორმაა. ექაუნთ მენეჯერისთვის აუცილებელია კლიენტის პროცესების, სტრუქტურების შესწავლა და ანალიზი, რათა შეძლოს მის წინაშე არსებული გამოწვევებისა და საჭიროებების დადგენა. სწორედ ამის საფუძველზე, შემდეგ შესაძლებელია კლიენტზე მორგებული სერვისის შექმნა, ან არსებულის დახვეწა. E-Commerce პროექტი ამ მხრივ გამორჩეული და ძალიან საინტერესოა. წარმოუდგენელი ზრდის ტემპი არსებული გარემოს სწრაფ ცვლილებას იწვევს, რაც ახალ გამოწვევებთან, საფრთხეებთან და შანსებთან არის დაკავშირებული. მნიშვნელოვანია ამ დინამიკისთვის ფეხის აწყობა, ახალ რეალობაზე მორგება, სისწრაფე და მოქნილობა, სწორედ ეს სძენს ჩემს პოზიციას მთავარ ხიბლს.

M: როგორ შეიცვალა თქვენი ცხოვრება მეიჯერელში მუშაობის განმავლობაში?

მეიჯერელში გატარებულმა წლებმა მომცა დიდი გამოცდილება, შემახვედრა ბევრ საინტერესო ადამიანს, მეგობარს, გამზარდა როგორც ადამიანი და პროფესიონალი. ამ დროის განმავლობაში იყო რამდენიმე ისეთი შემთხვევა, როდესაც ჩემი აზრით, გადაულახავი პრობლემის წინ ვიდექით – ხოლო ჩემმა კოლეგებმა, ჩვენმა გუნდმა კი დამიმტკიცა, რომ გამოუვალი სიტუაცია არ არსებობს, დამანახა თუ რა არის შესაძლებელი გუნდურობით, თანადგომით, მუხლჩაუხრელი შრომითა და მოტივაციით. ასეთი მომენტები აუცილებლად გამახსოვრდება ახალგაზრდა ადამიანს, გავსებს ენერგიით და ოპტიმიზმით იწყებ მომავლისკენ ყურებას. სწორედ ამიტომ, ჩვენი გუნდი დღეს ჩემი ინსპირაციის და მოტივაციის წყაროა.

ანა იორამაშვილი

M: როგორ ფიქრობთ, რას უნდა უზრუნველყოფდეს კომპანია თანამშრომლისთვის და როგორ ხდება ეს მეიჯერელში?

კომპანია თანამშრომლისთვის ჯანსაღ სამუშაო გარემოს უნდა უზრუნველყოფდეს. ეს გულისხმობს როგორც ფიზიკურ ინფრასტრუქტურას, ისე სოციალურ გარემოს და ფინანსურ სარგებელს. მეიჯერელის ყველა ოფისი განთავსებულია ა-კლასის ბიზნეს ცენტრებში, რომლებიც აკმაყოფილებს ყველა საერთაშორისო სტანდარტს. შენობები აღჭურვილია თანამედროვე უსაფრთხოების და ხანძარსაწინაარმდეგო სისტემებით. ყველა ოფისში გვყავს პირველადი დახმარების ოფიცრები – თანამშრომლები, რომლებმაც გაიარეს სპეციალური გადამზადება და არიან შესაბამისად სერტიფიცირებულნი. გარდა ამისა, თანამშრომლებს შეუძლიათ ისარგებლონ კეთილმოწყობილი სამზარეულოთი, ტერასით, მოსასვენებელი და სათამაშო ოთახებით.

კომპანიის სახელფასო პოლიტიკა ითვალისწინებს რეგულარულ საბაზრო კვლევებს, რომელთა ფარგლებშიც ხდება ბაზარზე არსებული სახელფასო მდგომარეობის, ასევე სხვა მაკროეკონომიკური ფაქტორების, როგორებიცაა ინფლაცია და უცხოური ვალუტის კურსი, დეტალური შესწავლა და ანალიზი. ამ კვლევების საფუძველზე კომპანია აფასებს საკუთარ სახელფასო სტრუქტურას და საჭიროების შემთხვევაში ატარებს შესაბამის ცვლილებებს.

ჩვენ ვამაყობთ ჩვენს კომპანიაში არსებული სოციალური გარემოთი. ჩვენი გუნდი დგას ფუნდამენტურ ფასეულობაზე, რომელიცაა ერთმანეთის უპირობო პატივისცემა. ჩვენთან გუნდის თითოეული წევრის ყოველღიური შრომა არამხოლოდ საკუთარი, არამედ საერთო კეთილდღეობისკენ არის მიმართული, ამაშია ჩვენი ძალა და სწორედ ამ გზით, 15 კაცით დაკომპლექტებული გუნდი სამ წელიწადში 1000 კოლეგამდე გაიზარდა. ჩვენს საერთო მომავალს ყოველდღიურად ერთად, ერთმანეთისთვის ვქმნით და გვიხარია, რომ ყოველწლიურად უფრო და უფრო მეტ ადამიანს არამხოლოდ თბილისში, არამედ მთელს საქართველოში შეგვიძლია გავუზიაროთ ის.

M: ამჟამად, რას საქმიანობთ კომპანიაში?

დღეს E – Commerce პროექტის ექაუნთ მენეჯერი ვარ. ამ პოზიციაზე პასუხისმგებელი ვარ ოფისებზე არამხოლოდ საქართველოში, არამედ სომხეთში, თურქეთში, გერმანიასა და ეგვიპტეში. ვინაიდან ჩვენი კლიენტი სწრაფად ზრდადი კომპანიაა, ჩვენც, როგორც აუთსორსინგ პარტნიორი, ფეხს ვუწყობთ ამ ზრდის ტემპს და სამომავლოდ ვგეგმავთ არსებული გუნდების გაფართოებას. გვსურს, ახალი კოლეგების ინტეგრირება ჩვენს ქსელში, ასევე არსებული პროცესების დახვექა და კლიენტის ინტერესების შესაბამისად ოპტიმირება ჩემი მთავარი ამოცანებია. ისევ და ისევ, ყველას ჩართულობით და ურთიერთთანადგომით დარწმუნებული ვარ, ამ გამოწვევებსაც წარმატებულად გავუმკლავდებით.

M: გვიამბეთ, როგორია განვითარების შესაძლებლობა კომპანიაში?

კომპანიაში განვითარების საშუალება ძალიან დიდია, რადგან მენეჯერულ პოზიციაზე გამოცხადებულ ვაკანსიაზე, შიდა კადრებს უფრო დიდი პრიორიტეტი ენიჭება ვიდრე გარე კადრს. ეს უპირატესობა ეფუძნება პროექტთან დაკავშირებულ გამოცდილებას, მეიჯერელში დანერგილი ფასეულობების და მომსახურების ინდუსტრიის საერთაშორისო სტანდარტების ცოდნას. E-Commerce პროექტის თანმშრომლები, როგორც კომპანიის ყველაზე გამოცდილი თანამშრომლები, ამ უპირატესობის თვალნათელი მაგალითი არიან, კოლეგები, რომლებმაც 2016 წელს კლიენტთა მომსახურების წარმომადგენლის პოზიციაზე დაიწყეს მუშაობა, დღეს გლობალური პროექტების ხარისხის კოორდინატორები და ოპერაციათა ხელმძღვანელები არიან, რაც დასტურია, იმისა რომ ყველა კოლეგა საკუთარი ნიჭის და შრომის საფუძველზე ფასდება.

 

[პარტნიორის კონტენტი]

განხილვა