9 სექტემბერს Apple iPhone 16-ის ხაზს გაგვაცნობს და ეს უკვე აშკარაა მოსაწვევებით, რომლებიც სულ ახლახან გააგზავნეს. მთავარი სლოგანი It’s Glowtime იქნება, ღონისძიება კი Steve Jobs Theater-ში ჩვენი დროით 21:00 საათზე გაიმართება. მოსაწვევზე დატანილი ფერების გამო, ვარაუდობენ, რომ მრავალ სიურპრიზს უნდა ველოდოთ…
როგორც ყოველთვის, უკვე ხმებიც დადის იმაზე, თუ რა სიახლეებს შემოგვთავაზებენ… თუ მათ დავეყრდნობით, iPhone 16-ის ხაზში Pro მოდელებზე უფრო დიდ ეკრანებს ვნახავთ და ახალ ღილაკს, რომელიც სურათების გადასაღებად შეიქმნა — ასე სურთ, პეიზაჟის ფორმატში კონტენტის გადაღება გაგვიმარტივონ. იმასაც ამბობენ, რომ iPhone 16-ის ყველა მოდელს Action Button დაემატება, რომელიც მანამდე მხოლოდ iPhone 15 Pro-ს ხაზში იყო ხელმისაწვდომი.
შესაძლოა, ღონისძიებაზე Apple Watch Series 10-ის შესახებაც განაცხადონ, რომელსაც, ასევე, უფრო დიდი ეკრანი ექნება და ახალი ჩიპი, რათა მოწყობილობა უფრო ძლიერი გახადოს. დიდი ალბათობით, ახალი AirPods-ის ორ ვერსიასაც ვიხილავთ.
ფიქრობენ, რომ iPhones-ებს Apple-ის AI ფუნქციების მხარდაჭერაც ექნება. დიახ, აქ Apple Intelligence-ს ვგულისხმობთ, რომელიც ცოტა ხნის წინ გაგვაცნეს. დანარჩენი კი ერთად ღონისძიებაზე ვნახოთ.
