Worldwide Developer Conference 2025 დაიწყო, რაც იმას ნიშნავს, რომ უკვე გავიგეთ ეფლის მთავარი სიახლეები. ოპერატიული სისტემა ახალი გამჭვირვალე დიზაინით იქნება წარმოდგენილი და iOS-იც გამოშვების წლის მიხედვით დაინომრება. თუმცა ეს ყველაფერი არ არის, ქვემოთ იმ სიახლეებზე გესაუბრებით, რომლებიც ეფლის თითქმის ყველა აპლიკაციასა თუ მოწყობილობას შეეხო:
Live translations
ერთ-ერთი ყველაზე პრაქტიკული ფუნქციაა, რომელსაც Apple Intelligence გვთავაზობს და ახლა იგი Messages-ში, FaceTime-სა და სხვა ძირითად აპლიკაციებში იქნება ინტეგრირებული. ეფლის თქმით, რეალურ დროში თარგმანი მთლიანად მოწყობილობაშივე მოხდება და მას მომხმარებლის ხმის მიბაძვაც შეეძლება ამ პროცესში. ფუნქცია მუსიკაზეც იმოქმედებს და ტექსტურ თარგმანს რეალურ დროში შემოგთავაზებთ.
Phone
Phone-ის აპლიკაცია ახალი ჩარჩოთი მარტივდება, რომელიც Favorites-ს, Recents-სა და Voicemail-ს ერთ ვიზუალში აერთიანებს. ეფლი Call Screening-საც გვაცნობს, რომელიც უცხო ზარების ავტორებს მოსთხოვს განმარტებას, თუ რატომ რეკავენ, ასე კი თქვენ გაძლევთ შანსს, გადაწყვიტოთ, უპასუხოთ თუ არა. სიახლეებს შორის გამორჩეულია Hold Assist – როცა მეგობართან რეკავთ და მოლოდინის რეჟიმში ხართ, iPhone შეგატყობინებთ, თუ რა მომენტში აიღებს ტელეფონს და ამ დროს თქვენ აღარც მუსიკალური შეტყობინების და აღარც რობოტის ჩანაწერის მოსმენა მოგიწევთ…
Photos
აქ, როგორც იქნა, ის ვიზუალური განახლება მივიღეთ, რაც აპლიკაციას ასე ძალიან სჭირდებოდა. iOS 26 ახლა მარტივად ორ მთავარ ჩანართს გაგაცნობთ, ერთით ჩვეულებრივ დაათვალიერებთ ფოტოებს, მეორე კი თქვენი კოლექციებისთვის იქნება.
Messages
ჯგუფური ჩატების ხარისხი მნიშვნელოვნად გაუმჯობესდება, რისი თქმის საფუძველსაც Apple Pay-ის ინტეგრაცია და ჩაშენებული კითხვარები გვაძლევს. პატარა, მაგრამ მნიშვნელოვანი განახლებაა, რაც მეგობრებთან მიმოწერას გაამარტივებს.
უცნობი წევრებისგან მიღებული შეტყობინებები კი ახლა ავტომატურად ცალკეულ ფაილში განთავსდება, საიდანაც შეგიძლიათ ნაცნობებად მონიშნოთ, მეტი ინფორმაცია მოითხოვოთ მასზე ან სულაც წაშალოთ. ფიქრობენ, რომ ეს ფუნქცია განსაკუთრებით კარგი ონლაინ პაემნების მოყვარულთათვის იქნება.
ხოლო, როცა მიმოწერისას Apple Intelligence მიხვდება, რომ გადაწყვეტილებაა მისაღები, კითხვარის შექმნას შემოგთავაზებთ. პროცესში კი Image Playground-თან ერთად იმუშავებს, რათა ფონებიც დააგენერიროს ჩატების პერსონალიზებისთვის.
CarPlay
ახალი დიზაინით შემომავალ ზარებს მეტად კომპაქტურად დაალაგებს ისე, რომ მძღოლებს მანქანის მართვაში ხელი არ შეეშალოთ. შეტყობინებებში კი ახლა უკვე დაპინვა იქნება შესაძლებელი და TapBacks-იც ხელმისაწვდომი გახდება. ახალი ვიჯეტებისა და Live Activities-ის დამატებით კი მძღოლი შეუფერხებლად მიიღებს საჭირო ინფორმაციებს.
ეფლი CarPlay Ultra-საც გვაცნობს, რომელიც სპეციალურად მდიდრული ავტომწარმოებელი პარტნიორებისთვის შექმნა, მათ შორის კი პირველი Aston Martin-ია. მოკლედ რომ გითხრათ, iPhone-ის ფუნქციონალს მანქანის სისტემას უსადაგებს და პრემიუმ გამოცდილებას სთავაზობს მომხმარებელს.
Maps, Wallet და Passport Digital ID
Apple Maps-ს Visited Places დაემატება, რაც შეინახავს ინფორმაციებს იმის შესახებ, თუ სად იყავით. ახლა აპლიკაცია თქვენს ჩვეულ მარშრუტებსაც დაიმახსოვრებს, რა დროსაც მიგითითებთ მიმართულებებს, მონიშნავს შეფერხებებს და შემოგთავაზებთ სწრაფ ალტერნატივებს. Apple Wallet კი მხარდაჭერას პასპორტების Digital ID-ებისთვის გვპირდება, თუმცა აღნიშნავენ, რომ ეს ფიზიკურ პასპორტებს ვერ ჩაგვინაცვლებს.
Boarding Passes-იც დაჭკვიანდა ახალი Live Activities-ის ფუნქციონალით — მეგობრებთან რეალურ დროში ფრენის სტატუსის გაზიარების შესაძლებლობას მოგცემთ და ამისთვის ჯგუფის ჩატებში წერა აღარ მოგიწევთ.
Games-ის ახალი აპლიკაცია
როგორც ჩანს, ეფლი მობილურ თამაშებს უფრო სერიოზულად უყურებს, ამიტომაც ახლა გეიმერებს Apple Games-ის აპლიკაციას სთავაზობს და ყველაფერს ერთ სივრცეში აერთიანებს, იქნება ეს თამაშის განახლებები, Apple Arcade თუ Library. აქვე გვხვდება ახალი Play Together-ის ჩანართი, რომელიც ქულების შედარების, მოსაწვევების გაგზავნისა და რეალურ დროში მეგობრების გამოწვევაში გვეხმარება.
Accessibility
iOS 26 Apple-ის ეკოსისტემაში ხელმისაწვდომობის კუთხით მნიშვნელოვან განახლებებს შემოგვთავაზებს — Accessibility Reader ინდივიდუალურ საჭიროებებზე მორგებულ, სისტემური კითხვის გამოცდილებას მოგვაწვდის, ხოლო Braille Access სრულიად გადააზრებულ ინტერფეისს გთავაზობთ, რომლითაც ბრაილის ეკრანებთან iPhone-ით დაკავშირება ხდება შესაძლებელი.
აღსანიშნავია, რომ ეფლმა ასევე განაახლა Live Listen-ის, Background Sounds-ისა და Personal Voice-ის ფუნქციები, რათა ყოველდღიური მოხმარება მეტად ინტუიციურ და ინკლუზიურ პროცესად აქციოს.
iPadOS 26-ის განახლებები
თუ ეფლს დავუჯერებთ, iPadOS 26 მისი ყველაზე ამბიციური iPad-ია… ახალ Liquid Glass-ის დიზაინს, Apple Intelligence-სა და სხვა პროდუქტიულობის ფუნქციებთან აერთიანებს — განახლება მომხმარებლებს საშუალებას აძლევს, დააპატარაონ და გადააადგილონ აპლიკაციები iPad-ის ეკრანზე.
Files-ის აპლიკაციებში ფაილების ახალ გადალაგებას იხილავთ და აქვე დაგხვდებათ Preview app, რომელიც PDF-ისა და სურათების Apple Pencil-ით რედაქტირების შესაძლებლობას მოგცემთ.
შემოქმედებით სფეროში მოღვაწე ადამიანები კი წვდომას მიიღებენ ისეთ ფუნქციებზე, როგორებიცაა Background Tasks, Journal app, Game Overlay, ლოკალური ჩაწერა, გაუმჯობესებული აუდიოხელსაწყოები და ახალი მენიუ, რომელიც Pad-ის უფრო ფუნქციონალურ, პერსონალიზებულ და პროფესიონალურ დიზაინზეა მორგებული.
macOS Tahoe 26-ის განახლებები
macOS 26 ოფიციალურად macOS Tahoe გახდა და მაკის გამოცდილებას iPhone-თან ღრმა ინტეგრაციით, უფრო ჭკვიანი სისტემური ინტელექტითა და გაძლიერებული Spotlight-ით აუმჯობესებს. macOS-ზე საბოლოოდ გამოჩნდა Phone აპლიკაცია, Call Screening-ისა და Hold Assist-ის ფუნქციებით, ხოლო Live Activities ახლა მენიუს ჩანართში გამოჩნდება.
Finder-იც განახლდა, რაც იმას ნიშნავს, რომ ფაილები სასურველი ფერების, სიმბოლოებისა და თემების მიხედვით შეგიძლიათ, დაალაგოთ.
tvOS 26-ის განახლებები
Apple TV-ის გამოცდილება კონტენტის ახალი ფუნქციებით უმჯობესდება. მომხმარებლებს ახლა ინდივიდუალური პროფილების დაყენება შეეძლებათ პერსონალიზებული რეკომენდაციებისთვის და ყურების გაგრძელება სხვადასხვა მოწყობილობებში. რედიზაინი აქ ისე გაკეთდა, რომ აქცენტი კონტენტზე ყოფილიყო, მომხმარებლებისთვის კი გამოცდილება მეტად გაუმჯობესებულიყო.
watchOS 26 Workout Buddy
AI ფიტნეს მწვრთნელია, რომელიც რეალურ დროში გაგამხნევებთ და პერსონალიზებულ ფლეილისტსაც შემოგთავაზებთ…
VisionOS 26-ის განახლებები
დაბოლოს, VisionOS 26-ისა და Vision Pro-ს დროც დადგა, რომელიც Apple-ის ახალი Liquid Glass ესთეტიკისა და გამჭვირვალე ინტერფეისის დიზაინის შთაგონების წყაროდ გვევლინება. აქ ე. წ. სივრცითი ვიჯეტები შეგხვდებათ და საშუალებას მოგცემთ, თქვენს სივრცეში ისეთი ნივთები მიამაგროთ, როგორებიცაა საათები, ამინდი, ფოტოები და სხვა. მათ გაზიარებასაც კი შეძლებთ მეგობრებთან FaceTime-ის საშუალებით. ხოლო საფარი ინტერაქციულ 3D მოდელებსაც ჩააშენებს ვებგვერდებში. რა თქმა უნდა, კინოების ყურება და თამაში კვლავ შეგეძლებათ. ამაში კი ისევ 3500 დოლარის გადახდა მოგიწევთ…
