ხელოვნური ინტელექტით ძიების შესახებ საუბრისას ხშირად ისმის ერთი მთავარი დაკვირვება, რომ ადამიანები, რომლებიც AI-ის დაგენერირებულ ბმულებზე აკლიკებენ, ბევრად უფრო მიზანდასახულები არიან, ვიდრე ტრადიციული საძიებო სისტემებიდან მოსული ტრაფიკი. აღმოჩნდა, რომ AI ძიების აუდიტორია არ არის ტრაფიკის უბრალო ერთობლიობა, რომლის ყურადღების მისაქცევად დამატებითი ძალისხმევა გჭირდებათ. ადამიანებს, რომლებიც ხელოვნურ ინტელექტს ინფორმაციას სთხოვენ, სრულიად განსხვავებული მიზნები ამოძრავებთ. უფრო მეტიც, ეს მიზნები კვლევის პროცესშივე იცვლება და ხშირად, ეს ერთი AI დიალოგის ფარგლებშიც კი ხდება.
იმის გასაგებად, თუ როგორ გამოიყურება ძაბრი დღეს და როგორ იყოფა ეს ერთი შეხედვით ერთგვაროვანი მასა, საინტერესოა AI ძიების ანალიტიკური კომპანიის, Scrunch-ის კვლევაზე დაკვირვება. მართალია, მათი ანგარიში უფრო მეტად პროდუქტების გამყიდველ ბრენდებზეა ორიენტირებული და არა გამომცემლებზე, მაგრამ ის მიგნებები, თუ როგორ იყენებენ სხვადასხვა ტიპის მაძიებლები AI-ს, ჩვენს რეალობასაც იდეალურად ერგება. კვლევა მომხმარებლებს მათი განზრახვის მიხედვით რამდენიმე კატეგორიად ყოფს. არსებობენ ინფორმაციის მაძიებლები, რომლებიც უბრალოდ ინტერესდებიან საკითხით; შემფასებლები, რომლებიც სხვადასხვა ვარიანტს ადარებენ ერთმანეთს; და წვდომის მაძიებლები, რომლებიც უკვე მზად არიან გადაწყვეტილების მისაღებად. არიან ისეთებიც, რომლებიც უკვე მიღებული გადაწყვეტილების შემდგომ ეტაპზე იმყოფებიან. უმნიშვნელოვანესია იმის გააზრება, რომ თითოეულ ამ კატეგორიას კონვერსიის განსხვავებული ალბათობა და სხვა ეტაპზე გადასვლის განსხვავებული ტენდენცია აქვს. როგორც მოსალოდნელია, ისინი, ვინც მიზანმიმართულად ყიდვას ან ტრანზაქციას აპირებენ, კონვერსიისთვის ძალიან ფასეულები არიან, მაგრამ ეს ჯგუფი მთლიანი საუბრების მხოლოდ მცირე ნაწილს, დაახლოებით 9%-ს შეადგენს. ამის საპირისპიროდ, შემფასებლები 20%-ს წარმოადგენენ, რის გამოც შესაძლოა ჯამურად უფრო მეტი შესაძლებლობა მოიტანონ, ვიდრე წვდომის მაძიებელთა მცირე, მაგრამ მაღალი განზრახვის მქონე ჯგუფმა.
მიუხედავად იმისა, რომ ეს მხოლოდ ერთი კონკრეტული სურათია, ამ კლასიფიკაციის მორგება გამომცემლების აუდიტორიაზეც თავისუფლად შეიძლება. არსებობენ ორიენტაციის ეტაპზე მყოფი მკითხველები, რომლებიც თემას ახლა ეცნობიან ან უბრალოდ უახლესი ამბების გაგება სურთ. მათ სჭირდებათ ამბის ან საკითხის საბაზისო დონეზე გააზრება. მათ მოსდევთ შეფასების ეტაპზე მყოფი მკითხველები, რომლებსაც ზედაპირული ინფორმაცია აღარ აკმაყოფილებთ და კონკრეტულ თემაზე უფრო სიღრმისეულ ანალიზსა და განსხვავებულ პერსპექტივებს ითხოვენ. გამომცემლების შემთხვევაში კონვერსია მხოლოდ მესამე მხარის პროდუქტების ყიდვას არ ნიშნავს. ეს უფრო ღრმა და მიზანმიმართული ჩართულობაა – პრემიუმ კონტენტის გამოწერა, ნიუსლეტერზე დარეგისტრირება, აპლიკაციის ჩამოტვირთვა, ღონისძიების ბილეთის შეძენა და სხვა.
თითოეული ეს ჯგუფი განსხვავებულ ინფორმაციას ეძებს და გამომცემლებმაც მათთან მისაღწევად სხვადასხვა ტიპის კონტენტი უნდა შესთავაზონ. ეს პრინციპი სრულიად ახალი არ არის და ჯერ კიდევ ათი წლის წინ დანერგეს წამყვანმა მედიებმა, მაგრამ ხელოვნური ინტელექტის ეპოქაში მთავარი ისაა, შეუძლიათ თუ არა ენობრივ მოდელებს ამ კონტენტის დაჯერებულად ციტირება. მაგალითად, ორიენტაციის ეტაპზე მყოფ მკითხველს შეიძლება აინტერესებდეს, იზრდება თუ მცირდება ელექტრომობილების ბაზარი, ხოლო შემფასებელი უკვე ადარებს წამყვანი ფინანსური გამოცემების გაშუქებას ნიშურ, სპეციალიზებულ პუბლიკაციებთან. მოქმედებაზე ორიენტირებული მკითხველი კი პირდაპირ სვამს კითხვას, თუ რომელი ნიუსლეტერი გამოიწეროს ელექტრომობილების შესახებ, ან რომელ საიტს ადევნოს თვალი ფასების გასაგებად. სწორედ ეს ხსნის იმ ფაქტს, თუ რატომ იკავებენ ხშირად ნიშური და B2B გამოცემები იმაზე მაღალ პოზიციებს AI ძიებაში, ვიდრე ეს მათი მასშტაბებიდან გამომდინარე იქნებოდა მოსალოდნელი.
მხოლოდ იმ ადამიანებზე ფოკუსირება, ვინც AI ძიებიდან გადმოკლიკა, ზედმეტად ვიწრო მიდგომაა. მკითხველები ხელოვნური ინტელექტის ძიების შიგნითვე გადადიან ერთი მდგომარეობიდან მეორეში. ასე რომ, მაშინაც კი, თუ ვერ ახერხებთ მკითხველის გადმოყვანას ყოველ ჯერზე, როცა სისტემა გაციტირებთ, თავად ის ფაქტი, რომ ძიების პროცესში თქვენი ნარატივი მიუძღვის მათ და ამასთან, სათანადოდ არის მითითებული წყარო, უკვე იწყებს მკითხველის თქვენი გამოცემისკენ ორიენტირებას. ამიტომაც, გამომცემლები შეეცდებიან, შესთავაზონ კონტენტი სხვადასხვა ტიპის მკითხველს, რათა მათი მოგზაურობის ყველა ეტაპზე იყვნენ წარმოდგენილნი. მეტ პასუხში მოხვედრა, ცხადია, ზრდის ვიზიტორის მიღების შანსს, მაგრამ ამავდროულად ინარჩუნებს თქვენი ბრენდის ხილვადობას ძიების გაგრძელებისას, თუნდაც ეს პროცესი ძირითადად AI პლატფორმაზე მიმდინარეობდეს.
წყარო: Fastcompany
