ავეჯის სახლი ”ვერონა” ცნობადობის ამაღლების მიზნით ერთწლიან კამპანიას იწყებს. საშუალო და მაღალი შემოსავლის მქონდე სეგმენტზე გათვლილი მაღაზიის ერთადერთი საკომუნიკაციო არხი გარე რეკლამაა. სხვადასხვა ვიზუალები ბილბორდებზე უკვე გამოჩნდა.
”ვერონა” ბაზარზე, დაახლოებით, 6 თვის წინ გამოჩნდა. მისი დამფუძნებელის ნუკრი ლიპარტაშვილის თქმით, მათთან მასობრივ პროდუქციას არ ყიდიან და მათ მომხმარებელს გარკვეული ნიშა უკავია. ამბობს, რომ ამ ეტაპზე, ძირითადად, ერთმანეთისთვის გადაცემის გზით ვრცელდება ინფორმაცია.
”სწორედ ამიტომ გადავწყვიტეთ კამპანიის გაკეთება. რაც ეხება რეკლამის ფორმას, სპეციალურად არ შევარჩიეთ სატელევიზიო რეკლამა და სეგმენტიდან გამომდინარე ვამჯობინეთ ”აუთდორი”. თანაც, ისეთ ადგილებზე, სადაც ეს კატეგორია ხვდება -თბილისში (8 ბილბორდი) გუდაურსა და ბაკურიანში.
ამ კამპანიით არ ვთავაზობთ რომელიმე კონკრეტულ ნივთს, ავეჯს ან გადაწყვეტას. ვეუბნებით ორ რამეს : თუ თქვენი სახლი ცარიელია, უნდა შეიძინოთ ”ვერონას” ავეჯი, ან თუ გაქვთ სხვა ავეჯი და არა ჩვენი, ნიშნავს, რომ სახლი მაინც ცარიელია. ამის შესაბამისად არის გაკეთებული ვიზუალებიც”- ამბობს ნუკრი ლიპარტაშვილი.
”ვერონაში” ამბობენ, რომ კამპანიის მთავარი მიზანი ცნობადობის გაზრდაა. მათი თქმით, სურთ მაღაზია თავიანთი სეგმენტის წარმომადგენლების ე.წ. Top of Mind-ის ხუთეულში მაინც ფიგურირებდეს.
”მთავარია, მომხმარებელი ჩვენამდე მოვიდეს. აქ მოსულისთვის კი ჩვენი ხარისხი, მომსახურების სისტემა და სისწრაფე იქნება განმსაზღვრელი, რომ შეიძინოს ავეჯი. საერთოდ, ამ ტიპის პროდუქტში დიფერენციაციას დიდი მნიშვნელობა აქვს. სკამი შეიძლება იყოს სხვადასხვანაირი. ერთ კონკრეტულ დეტალს შეუძლია ადამიანს ყიდვის გადაწყვეტილება მიაღებინოს.
სწორედ ამაშია ”ვერონას” უპირატესობა, კონკურენტებთან შედარებით. აქ მყიდველი ვერ იქნება ის, ვინც ეძებს 2 000 ლარიან საძინებელს. გვინდა ჩვენი სექტორი მოვიდეს. ვისთვისაც 80 % -ით მაინც ხელსაყრელია ფასი, აქამდე მოსული, ჩვენს სასარგებლოდ იღებს გადაწყვეტილებას და დანარჩენი თანხისთვის, თუნდაც, შიდა განვადებით სარგებლობს ”-ამბობს ნუკრი ლიპარტაშვილი.
”ვერონაში” ამბობენ, რომ, დაახლოებით, 100 ვიზიტორიდან 60% მყიდველი ხდება. მათი აზრით, მთავარია, სალონის შესახებ ინფორმაცია მათ სეგმენტს ”თავში ჩაუჯდეს”. ნუკრი ლიპარტაშვილის თქმით, ერთწლიანი კამპანიის დასრულების შემდეგ ჩატარდება კვლევა და შედეგებს დაითვლიან. ვარაუდობენ, რომ სეგმენტის 60% -მა მაინც უნდა იცოდეს ამ მაღაზიის შესახებ, როცა, ახლა ცნობადობა მხოლოდ 30 % -შია.
