თავდაპირველად, სათამაშოების ინდუსტრიაში თავის დამკვიდრება გაუჭირდა, მაგრამ შემდეგ, ამერიკის ერთ-ერთ ყველაზე სანდო ბრენდად იქცა. Barbie 11.5-ინჩიანი ქერა თოჯინა იქცა ბრენდ პერსონად, რომელმაც 2022 წლის მონაცემებით $1.5 მილიარდიან გაყიდვას მიაღწია.
Barbie ბაზარზე 1959 წლის 9 მარტს გამოჩნდა, ნიუ-იორკის სათამაშოების საერთაშორისო ბაზრობაზე. ეს იყო თინეიჯერი გოგონას მოდელი. დაფუძნებიდან 64 წლის შემდეგ, ბრენდი ინარჩუნებს საზოგადოების კულტურულ, სოციალურ და ფსიქოლოგიურ ინტერესს. Barbie-მ შექმნა ღირსშესანიშნავი ბრენდი, რომელმაც მის გულშემატკივრებში განსაკუთრებული ადგილი მოიპოვა.
ბარბი პოლარიზებული ფიგურაცაა. ბრენდი აღიქმება როგორც ინსპირაციული მისაბაძი მოდელი და ამავე დროს, მას ადანაშაულებენ ქალების გარეგნობის მიმართ არარეალური მოლოდინების შექმნაში.
სათამაშოების უმეტესობა პოპულარობას ინარჩუნებს, როგორც წესი, ორი ან სამი წლის განმავლობაში. Barbie-ს გრძელვადიანი წარმატება მიუთითებს Mattel-ის ადაპტირების უნარზე საზოგადოებაში და ამ თოჯინის გარშემო ცვალებადი კულტურული და პოლიტიკური კონტექსტის შექმნაზე. მაინც, როგორ გააკეთა კომპანიამ ეს?
კვლევამ აჩვენა, რომ ბრენდის პერსონაჟების შესაქმნელად და შესანარჩუნებლად მრავალი გზა არსებობს, მაგრამ Mattel-მა Barbie-სთვის „გამრავლების“ სტრატეგია გამოიყენა. ეს გულისხმობდა სხვა პერსონაჟების გაცნობას, რომლებიც მეორეხარისხოვან როლებს ასრულებენ ბარბის „სამყაროში“.
ამ დამატებითი პერსონაჟების ინდივიდუალური მახასიათებლები ბარბის პერსონას უკავშირდება და ბრენდის ხილვადობას ზრდის. Mattel-მა გამოიყენა თხრობის ტაქტიკა. ბრენდმა გამოაცხადა, რომ ბარბი და კენი ოფიციალურად დაშორდნენ ვალენტინობის დღეს 2004 წელს (ისინი კვლავ ერთად შეიკრიბნენ 2011 წელს). ასეთი ისტორიებით კომპანია კავშირს ამყარებს თაყვანისმცემლების ემოციებთან და აძლიერებს ინტერესს ბრენდის მიმართ.
ეს ტაქტიკა გარკვეული პერიოდის განმავლობაში მუშაობს, მაგრამ როგორ შეინარჩუნა Mattel-მა ბრენდის სიცოცხლისუნარიანობა ასეთი ხანგრძლივი დროის განმავლობაში? არსებობს მრავალი სტრატეგია, რომელიც ზრდასრული ბრენდების აღორძინებისთვისაა შექმნილი. Mattel-მა წარმატებით გაზარდა Barbie-ის ბრენდი ახალი აუდიტორიის დასაპყრობად. ბრენდი წარმატებით გაფართოვდა სხვა მოგებიან კატეგორიებში, როგორიცაა ტანსაცმელი, აქსესუარები, კოსმეტიკა და გასართობი საშუალებები (მუსიკა, ფილმები და თამაშები).
ახალგაზრდა სეგმენტთან კომუნიკაციის გარდა, Mattel მიზანმიმართულად ურთიერთობს შედარებით ხანდაზმულ მომხმარებლებთანაც. კონკრეტულ ნივთებს, არა მხოლოდ სათამაშოებს, არამედ ტანსაცმელს, საკვებს, როგორიცაა ტკბილეული, ან თუნდაც ისეთი ნივთები, როგორიცაა ვინილის ჩანაწერები – შეუძლია ფიზიკური ფორმა მისცეს ადამიანების დამოკიდებულებებს, ურთიერთობებსა და გარემოებებს. ეს კი, წარსულთან მიმართებაში, ძლიერ ემოციებს აღძრავს.
ფილმის გარდა, Mattel-მა ნოსტალგია სხვა გზითაც გააღვიძა. ბრენდი ყიდის საკოლექციო თოჯინების უფრო დახვეწილ დიზაინერულ და შეზღუდული გამოშვების დიზაინს, რომლებიც მაგალითად, ზრდასრულ გულშემატკივრებს მოეწონებოდათ. ეს პროდუქტები, როგორც წესი, იყიდება სპეციალიზებულ ან ბუტიკურ მაღაზიებში და უფრო მაღალი ფასი აქვს, ვიდრე სხვა თოჯინებს.
Barbie-ს ბრენდის გაფართოებასთან ერთად, თოჯინაც მოექცა კრიტიკის ქარცეცხლში. წლების განმავლობაში, ბარბიმ მრავალი ტრანსფორმაცია განიცადა. ამ დროისათვის, ბარბის თოჯინები, წარმოადგენენ 200-ზე მეტ მიმართულებას – ასტრონავტით, ქირურგითა და მედესანტეთი დაწყებული, თამაშების შემქმნელით, არქიტექტორით, მეწამით, კინორეჟისორითა და აშშ-ს პრეზიდენტით დამთავრებული.
კრიტიკოსების შეფასებით, კარიერისტი თოჯინები გოგოების შთაგონების არასწორი მცდელობაა. სხვადასხვა დროს, ბარბის ბრალს სდებდნენ სხეულის არარეალური სტანდარტების პოპულარიზაციაში, ქალების სტერეოტიპიზაციასა და ობიექტივიზაციაში, რაც ასევე უარყოფით გავლენას ახდენს გოგოების თვითშეფასებაზე.
2017 წელს, Mattel-მა კიდევ ერთი მნიშვნელოვანი ნაბიჯი გადადგა სხვადასხვა ეროვნების ეთნიკურად და რასობრივად მრავალფეროვანი თოჯინების წარმოდგენით, მათ შორისაა ჰიჯაბით შემოსილი თოჯინა. ამ მიდგომას მოყვა კრიტიკა იმის თაობაზე, რომ Mattel რასობრივ და ეთნიკურ განსხვავებებს განიხილავდა, როგორც „საკოლექციო“ და სასაქონლო კულტურას.
დღესდღეობით, ბარბი კვლავ რჩება სათამაშოდ, რომლითაც უამრავი ბავშვი თამაშობს. თოჯინის პოპულარობა განპირობებულია Mattel-ის მარკეტინგითა და სიახლისკენ მუდმივი მზაობით.
წყარო: theconversation
