in , ,

Best of BOG – დამოუკიდებელ ალბომად ქცეული „მარკეტინგული ამოცანები მუსიკაში“

Best of BOG იმ „ტრეკების“ ნაკრებია, რომლებიც, წლების მანძილზე, „საქართველოს ბანკის“ სარეკლამო რგოლებისთვის იქმნებოდა. კომპანიაში ამბობენ, რომ ამ სიმღერებმა დიდი პოპულარობა მოიპოვა, ამიტომ, ცალკე ალბომის გამოცემა გადაწყვიტეს. ვებგვერდზე შესაძლებელია კომპოზიციების მოსმენა, გადმოწერა და ტექსტების ნახვა. ასევე, ხელმისაწვდომია სიმღერების მოკლე ისტორია და ინფორმაცია შემსრულებლების შესახებ.

[embedyt] https://www.youtube.com/watch?v=dxRuLlWA8dQ[/embedyt]

 

სარეკლამო რგოლებისთვის შექმნილი კომპოზიციების ავტორები აჩიკო გულედანი და ბექა ჯაფარიძე არიან. ალმობიც მათთან, რამდენიმე ვოკალისტთან, ინსტრუმენტალისტებთან და ორკესტრთან ერთად ჩაიწერა. აჩიკო გულედანი ამბობს, რომ Best of BOG კლასიკური აუდიო ბრენდინგის მაგალითი არ არის და თავისუფლად შეიძლება მისი, როგორც დამოუკიდებელი მუსიკალური პროდუქტის, მსმენელისათვის წარდგენა.

ყველაფერი კი რამდენიმე წლის წინ დაიწყო

აჩიკო გულედანი: „საქართველოს ბანკის” გუნდთან, აუდიო ბრენდინგის მიმართულებით თანამშრომლობა, წლების წინ დავიწყეთ – ვქმნიდით „საუნდტრეკებს” ბანკის პროდუქტებზე. ძალიან საინტერესო იყო საშა კაცმანთან და დავით ბირმანთან მუშაობა. მათ თავიდანვე ზუსტად ისეთი მიდგომა ჰქონდათ, როგორიც, ჩემი აზრით, აუდიო დიზაინისა და აუდიო ბრენდინგის მიმართ უნდა იყოს. ბევრი საინტერესო, სხვადასხვა ტიპის პროექტი გავაკეთეთ. დროთა განმავლობაში, ძალიან ბევრი „ტრეკი” დაგროვდა. გადავწყვიტეთ, შეგვექმნა ერთიანი ალბომი და Life Performance გვქონოდა. ზოგადად, ძალიან საინტერესოა მარკეტინგული ამოცანების მუსიკაში გადატანა. დაახლოებით, ოთხჯერ მეტი „ტრეკი” გვაქვს გაკეთებული, მაგრამ Best of BOG – ისთვის ყველაზე საინტერესოები შევარჩიეთ. აქ საუბარია უკვე სიმღერებზე. ზოგიერთ მათგანზე გაკეთებული გვქონდა 45 წამი და შემდეგ დავამუშავეთ, შეიქმნა სიმღერები, დაიწერა ტექსტი, გაკეთდა საორკესტრო ვერსიები.

M: მარკეტინგული ამოცანების მუსიკაში გადატანა, თქვენთვის, როგორც ავტორისთვის, რას ნიშნავს?
ეს ალბომი არ არის კლასიკური აუდიო ბრენდინგის მაგალითი. აუდიო ბრენდინგი უფრო არის, როდესაც კომპანია ისეთ აუდიო შეფუთვას აკეთებს, როგორიც პროდუქტის ვიზუალური მხარეა – უნდა გადმოსცემდეს კონკრეტულ ინფორმაციას ამ ბრენდის შესახებ. მუსიკის კეთების დროს თარგმნას რაც შეეხება, მარკეტინგული ამოცანა, როგორც წესი, ემთხვევა ხოლმე პროდიუსერის და მუსიკის ავტორის ამოცანას, რომ „ტრეკი” გახდეს პოპულარული. კონკრეტული სათქმელი უნდა მიიტანო მომხმარებლამდე, მსმენელამდე. ეს სათქმელი როგორ ითქვას, როგორ დაიკრას და როგორ ჟღერდეს, ზუსტად ეს არის ჩვენი საქმე.

M: „ტრეკებზე” მუშაობისას, თქვენი მიზანი რა იყო და მიიღეთ თუ არა, რასაც ელოდით?

თითოეულ „ტრეკს” ცალკეული მიზანი აქვს. მაგალითად, ამ ალბომში love.bog.ge რომ ავიღოთ: ეს იყო საკონკურსო მუსიკა. მომხმარებელი წერდა, იღებდა ვიდეოს და აგზავნიდა. მთავარი იყო, სამიზნე ჯგუფთან მისულიყო კონკრეტული ინფორმაცია. მარტივად რომ ვთქვათ, გვჭირდება ხიდი, შემდეგ ამის საშუალებით ველაპარაკებით ადამიანებს. რასაც ჩვეულებრივი „ტრეკის” კეთების დროს აკეთებ, ზუსტად ისე მუშაობ ამ შემთხვევაშიც. მაგალითად, გამოდის Love Card-ი, გვაქვს „ბრიფი”, რა სურს კომპანიას, რომ უთხრას საკუთარ მომხმარებლებს. იღებ ამ სათქმელს და რასაც აკეთებ, უკვე ეს არის მარკეტინგული ამოცანების თარგმანი მუსიკაში, ტექსტში და ა.შ. გადატანა.

M: თქვენთვის, როგორც მუსიკოსისთვის, რას ნიშნავს ასეთ პროექტში მონაწილეობა?

ჯერ ერთი, ეს პროექტი აუდიო შეფუთვის კუთხით, გამოირჩეოდა ინოვაციურობით, ამიტომ საინტერესო იყო ჩემთვის. ამასთან, ეს იყო სიახლე ქართულ ბაზარზე. თვითონ მუშაობის პროცესიც ძალიან საინტერესო იყო, როცა მუშაობ ბენდთან, სხვადასხვა ჟღერადობის ინსტრუმენტალისტებთან და ა.შ. თან, ზუსტად ვიცოდით, რასაც ვაკეთებდით.

M: როგორც მომხმარებელი, რამდენად იღებთ ასეთი ტიპის კომუნიკაციას? რამდენად მუშაობს მომხმარებელზე მარკეტინგული ამოცანების მუსიკაში გადატანა?

გააჩნია, ვინ გააკეთებს, როგორ იქნება მიწოდებული. რაღაცების პირდაპირ „დაჯახება” არ შეიძლება. ადამიანებში სიმღერა რაღაც ემოციებს იწვევს. კოდს კი არ გადასცემ, რომ წავიდეს და კონკრეტული პროდუქტი შეიძინოს. არამედ, მიმართავ ჩვეულებრივ საშუალებას, რომ ემოცია გამოიწვიო. პირდაპირ უხეშად მოყოლილი და ნამღერი არ არის კარგი. მაგალითად, „მე გაფერადებ შენ” შეიძლება, მომხმარებელმა საერთოდ არ იცოდეს, რა მიზნით არის შექმნილი და შეიყვაროს ის, როგორც სიმღერა. შემდეგ უნდა დააკავშირებინო კონკრეტულ პროდუქტთან. ამ „ტრეკებს” მუსიკალური შეზღუდვა არ აქვს. ამ შემთხვევაში არ არსებობს გაგება „სარეკლამო მუსიკა”, მით უმეტეს, როცა საუბარია ალბომზე, „ტრეკით”, ტექსტებით, არანჟირებით. ჩვენთვის, მუსიკოსების და პროდიუსერებისთვის თუ საქმე საინტერესო არ არის, საერთოდ არ ვაკეთებთ. თუ ინსპირაცია არ გაქვს, ე.ი. არასწორ რამეს აკეთებ, თან ცუდად. შენთვის საინტერესო და ახალი უნდა იყოს. თან უნდა ერთობოდე და სიამოვნებას იღებდე იმ საქმისაგან, რასაც აკეთებ.

 

M: თქვენი გამოცდილებით, რა არის საჭირო, რომ ასეთი პროექტი შედგეს?

დიდი მნიშვნელობა აქვს, ვინ გაძლევს „ბრიფს”. ეს არის სამუშაო პროცესი, სადაც მუსიკალურ დეტალებში შედიხარ, ინსტრუმენტებზე, ჟღერადობაზე ლაპარაკობ. არიან ადამიანები, ვისაც შეუძლია „წამოგყვეს”. ამ შემთხვევაში ძალიან მარტივი იყო. გუნდს, ვისთანაც ვთანამშრომლობდით, შეეძლო ჩვენთან ერთად მოძრაობა. ერთმანეთისთვის შეგვეძლო აგვეხსნა, რა გვინდოდა. მაგრამ ყველაფერი პირველივე ცდაზე არ გამოდის. ყოფილა შემთხვევა, შეგვიქმნია „ტრეკი” და ფოკუს ჯგუფს უთქვამს: „არა, ეს არ ვარგა“. შემდეგ გვიძებნია ახალი გზები. იმის თქმა მინდა, რომ ეს გუნდური სამუშაოა, პროდიუსერებისთვის, რომლებიც მუსიკას აკეთებენ და პროდიუსერებისთვის, რომლებიც თავისი სათქმელის გაჟღერებას ცდილობენ. ორივე მხრიდან არის საჭირო უხვად პროფესიონალიზმი. საჭიროა, გესმოდეს რასაც აკეთებ. რაღაცები შეიძლება ისწავლო, მაგრამ როგორ უნდა გამოხატო კონკრეტული ემოცია და შეგრძნებები, ამას ვერ ისწავლი.

M: რაც შეეხება უშუალოდ ალბომის შექმნას . . .

ძალიან საინტერესო იყო „ტრეკების”, ტექსტების დასრულება და ამოცანა, რომელიც თავიდან, შესაძლებელია, ვინმეს შეუსრულებელად მოჩვენებოდა. ჩვენ, დაახლოებით, სამ კვირაში მთლიანი მასალიდან შევარჩიეთ კონკრეტული „ტრეკები” და დავიწყეთ ალბომზე მუშაობა. გარდა იმისა, რომ ზოგიერთი თემა უნდა ბოლომდე დაგვეწერა, სიმღერად გვექცია და ჩაგვეწერა, უნდა დაგვეკრა ლაივი. სამი კვირა ვცხოვრობდით სტუდიაში, დავასრულეთ და საბოლოო ფორმა მივეცით შერჩეულ „ტრეკებს”, ვიმუშავეთ ორკესტრთან ერთად. ეს იყო პროცესი, რომლის დროსაც მუდმივად ამ პროექტის გარშემო ვტრიალებდით. აქ მხოლოდ მუსიკალურ პარტიებზე არ არის ლაპარაკი, აქ საუბარია ჟღერადობაზე, ბალანსზე. ეს ყველაფერი ერთად უნდა იყოს ჩანაწერშიც და ლაივშიც. ცალ-ცალკე არ ჩამოვთვლი ადამიანებს, ვინც ამ პროექტში მონაწილეობდა. მათთან მუშაობა განსაკუთრებით სასიამოვნო იყო. ეს არ არის სარეკლამო ალბომი. რაც ჩვენ გავიარეთ, არის ზუსტად ისეთივე პროცესი, როგორც აკეთებენ ჩვეულებრივ მუსიკალურ ალბომს. მხოლოდ ის სხვაობაა, რომ აქ მუსიკალურ ექსპერიმენტებს არ მიმართავ. ჩვენი ლაივი უნდა ყოფილიყო მხიარული, უნდა ჰქონოდა თავისი ვიზუალი და დრამატურგია. რაც საბოლოო ჯამში მივიღეთ, შეიძლება, ნებისმიერ პუბლიკას წარუდგინო, ცალკე დამოუკიდებელი ალბომის სახით.

M: რა იყო ამ ალბომის ჩაწერის მიზანი?

ამ ალბომის გაკეთება დიდი ხანია, გვინდოდა. არ მახსენდება ასეთი ტიპის ლაივი როდესმე გაკეთებულიყო საქართველოში. „საქართველოს ბანკის” გუნდთან ერთად გადაწყდა, რომ დადგა ამის დრო. ეს კონკრეტული „ტრეკები” იმიტომ შევარჩიეთ, რომ ჩვენი აზრით, მათ თავის დროზე მიზანს მიაღწიეს, ისინი საკმაოდ პოპულარული იყო. გარდა ლაივის დრამატურგიისა, მნიშვნელოვანია, როგორ გაიჟღერებს ესა თუ ის „ტრეკი”. ალბომში შესულია ის ახალი მუსიკაც, რომელზე მუშაობისასაც მუსიკოსებმაც ძალიან დიდი სიამოვნება მიიღეს.

M: როგორ ფიქრობთ, გაამართლებს ეს ალბომი?

ქვეყნის მასშტაბით, ტური რომ გავაკეთოთ და მსმენელს ამ ალბომში შესული „ტრეკები” წარვუდგინოთ, ძალიან კარგი კონცერტი გამოვა. უბრალოდ, რამდენიმე სიმღერის დამატება დასჭირდება, რომ საკონცერტო ვარიანტი იყოს. როგორც პროდიუსერი, გეუბნებით, თავისუფლად არის შესაძლებელი, ეს ალბომი ცალკე მუსიკალურ პროდუქტად წარვადგინოთ მსმენელის წინაშე.

M: არ იგეგმება მსგავსი რამ?

ჩვენ გვაქვს მასალა, პარტიტურა, „ტრეკები”. თუ „საქართველოს ბანკის” გუნდთან ერთად გადავწყვიტეთ ამას, ძალიან მარტივად გაკეთდება. უბრალოდ, ამ შემთხვევაში, საჭირო გახდება ვიზუალიზაცია.

როგორ იღებენ ბავშვები კლასში ახალ მოსწავლეს? – Millennium School-ის ექსპერიმენტი

გასაგიფი უნდა გაიგიფოს! – ახალი ქართული პორტალი Gifebi.ge