in

როგორ გავხადოთ 80 000 ადამიანი Facebook-ზე ჯერ არარსებული პოდუქტის ფანი?!

BOG
BOG

მე იმ ადამიანთა ჯგუფს მივეკუთვნები, რომლებიც სოციალური მედიის შესაძლებლობებს აღფრთოვანებაში მოყავს. პროფესიონალების ხელში, მას ნამდვილად სასწაულების მოხდენა შეუძლია.

განსაცვიფრებელია, მაგრამ დღემდე ბევრი ადამიანია, მათ შორის მარკეტინგის დარგშიც და მათ შორის განვითარებულ ქვეყნებშიც, რომლებიც სკეპტიკურად უყურებენ სოციალურ მედია-მარკეტინგის მომგებიანობას, განსაკუთრებით ROI(Return on Investment)-თან მიმართებაში.

არის ასეთი დიჯიტალური სააგენტო ნიუ-იორკში, „Blue Fountain Media“, სადაც ნამდვილად კარგად ესმით, თუ რა სარგებლობა მოაქვს სოციალურ მედიას.

ამ სტატიაში, სწორედ ამ სააგენტოს ბოლო კამპანიაზე მექნება საუბარი. მათ შეძლეს Facebook-ზე 80 000 ფანი მოეპოვებინათ ისეთი პროდუქტისთვის, რომელიც ჯერ არც არსებობდა. ეს პროდუქტი ელექტრონული კომედიური კომიქსი „BIOWARS” გახლდათ.

BIOWORDS

გთავაზობთ ინტერვიუს, სადაც “Blue Fountain Media”-ს CEO და დიჯიტალური ტენდენციების ექსპერტი – გაბრიელ შაოლიანი საუბრობს ამ კამპანიის მიზნებზე, დასახულ სტრატეგიაზე და მსგავსი ტიპის ბიზნესებისთვის რჩევებსაც იძლევა.

რა მოტივებით გადაწყვიტეთ Facebook კამპანია პროდუქტის რეალურ გამოშვებამდე ჩაგეშვათ?

ჩვენ კარგად გვქონდა გააზრებული, რომ BIOWARS-ით ბევრი, უკვე დამკვიდრებული კონკურენტის წინააღმდეგ მოგვიწევდა ბრძოლა. იმისთვის, რომ გადავრჩენილიყავით, იქამდე უნდა შეგვექმნა მითქმა-მოთქმა ჩვენს პროდუქტზე, სანამ მას რეალურად გამოვუშვებდით და ამით პროდუქტის გამოშვების მომენტისათვის უკვე შეგვექმნა მოთხოვნა პროდუქტზე.

Facebook-მა მოგვცა პლატფორმა, სადაც ჩვენი შემოქმედების საზოგადოებისთვის გაზიარებას შევძლებდით. სცენის მიღმა ექსკლუზიური კადრები ნამდვილად ითრევდა მაყურებელს და Facebook ფანების რიცხვიც გამუდმებით იზრდებოდა.

ჩვენ ასევე აქტიურად ვიყენებდით Twitter-სა და Google+ს, მაგრამ მათგან მხოლოდ Facebook-ი იძლეოდა ვიზუალების გაზიარების საშუალებას. სწორედ ვიზუალური პოსტები იპყრობდა ყველაზე მეტად მომხმარებლის ყურადღებას.

რა ტიპის სტრატეგიას მიმართეთ ამ კამპანიის განხორციელებისას?

თავიდანვე მკაცრად გადავწყვიტეთ, რომ მთელი მონდომება უნდა მიგვემართა მომხმარებლების „BIOWARS”-ის შექმნის სამუშაო პროცესებში რაც შეიძლება მეტად ჩართულობაზე. ჩვენ ვიცოდით, რომ არ გვქონდა სრული პროდუქტი მომხმარებლებისთვის გასაზიარებლად, მაგრამ უკვე შეგვეძლო მათთვის გაგვეზიარებინა ჩანახატები, მთავარი პერსონაჟების ბიოგრაფიები, ინტერვიუები სცენარისტებთან და მსახიობებთან.

ადამიანებს ძალიან აინტერესებთ, თუ რა ხდება სცენის მიღმა. ვინ წერს სცენარს და როგორ ხდება პროდუსინგი. ამიტომაც ჩვენ არა მხოლოდ ჩვენს ნიჭსა და ჩვენს ნამუშევრებზე ვდებდით პოსტებს, არამედ კომიკური წიგნის სამყაროს სხვა სიახლეებზეც ვწერდით.

როდის დაიწყეთ კამპანია სოციალურ მედიაში და რეალურად როდის გამოვიდა წიგნი?

სოციალურ მედიაში „BIOWARS”-ზე პოსტების გავრცელება წიგნის გამოშვებამდე 6 თვით ადრე დავიწყეთ. დღევანდელი გადმოსახედიდან, როდესაც 80 000 ფანი გვყავს Facebook-ზე, ვთვლით, რომ კამპანია წარმატებით განვახორციელეთ. პირველი გამოცემა ნოემბერში გამოვუშვით. ჩვენი ფანები გაგიჟებულები იყვნენ, როდესაც როგორც იქნა ეღირსათ წიგნის ნახვა, განსაკუთრებით ამხელა ლოდინის შემდეგ. ამავდროულად მათ გარკვეული თანაავტორობის შეგრძნება ჰქონდათ და უკვე ჩართულები იყვნენ ისტორიაში, უკვე ყავდათ საყვარელი პერსონაჟები.

რა იყო სოციალურ მედიაში წინასწარი კამპანიის მიზანი და მიაღწიეთ თუ არა დასახულ მიზანს?

ჩვენი მთავარი მიზანი იყო ჩვენი მომხმარებლის პროცესებში ჩართვა და მათი ასეთ მდგომარეობაში შენარჩუნება. ჩვენ მომავალშიც შევქმნით სხვადასხვა ტიპის აქტივობებს, რომელიც ხელს შეუწყობს ადამიანებს შორის მუდმივი ინტერაქციის წარმოებას. ეს იქნება ადგილი, სადაც მათ შეეძლებათ საკუთარი კონტრიბუცია შეიტანონ პროდუქტის შექმნაში. ცოტა მოგვიანებით ვფიქრობთ სათამაშო პლატფორმის გაკეთებასაც, რაც კიდევ ერთი დონე იქნება მათი ჩართულობისათვის. და რაც მთავარია, ჩვენ მკითხველს ყოველთვიურად ახალ გამოცემას ვპირდებით.

რა შეიძლება სხვა ბრენდებმა ამ ისტორიიდან ისწავლონ?

მე ბევრ ბრენდს ვიცნობ, რომელიც მთელ „ნამცხვარს“ ერთბაშად აწვდის მომხმარებელს. ეს კი არასწორი მიდგომაა. ისინი დიდად არ ზრუნავენ პროდუქტის გამოშვებამდე პერიოდის დაგეგმვაზე. ზოგჯერ მგონია, რომ მათ უბრალოდ სხვანაირად რამის კეთების ეშინიათ და ერთხელაც, როდესაც ისინი ჩაუშვებენ პროდუქტს, მიყვებიან მას ბოლომდე ისე, რომ არ ითვალისწინებენ მომხმარებლის მოთხოვნებსა და ინტერესებს.

ბრენდებმა უნდა ისწავლონ, რომ უამრავი რამის გაკეთება შეიძლება იქამდე, სანამ მათი პროდუქტი გაყიდვისთვის მზად იქნება. ჩვენ უკვე ვისწავლეთ სოციალური მედიის გამოყენება ჩვენი მომხმარებლების ინტერესებზე სასაუბროდ. მაგალითად ჩვენი მომხმარებლები წიგნით ნამდვილად იყვნენ დაინტერესებული, მაგრამ ასევე სხვა სიახლეებიც აინტერესებდათ, რომელთაც ჩვენ მათ ასევე ვაწვდიდით. შედეგად მივიღეთ ჩვენი ბიზნესისათვის შეუფასებელი უკუგება მომხმარებლების მხრიდან.

ავტორი: ნათია გოგია

ARAY Tomorrow გამოძახილი: „მოგვეჭრა თავი რაიონული მასშტაბით, ამხანაგო ღინტუ!“

MYVIDEO.AZ – MYVIDEO აზერბაიჯანში