სტიქიური მოვლენების დროს ადამიანური ბუნება ყველაზე კარგად იკვეთება… სხვების დახმარების სურვილში გამოიხატება, განსაკუთრებით კი მაშინ, როცა საქმე ადამიანის ჯანმრთელობასა და სიცოცხლეს ეხება. კომპანიებიც მათ შორისაა, ოღონდ ინდივიდებზე ბევრად მეტი რესურსით ამ პროცესში.
„გლობალური დათბობის გამო ბუნებრივი კატასტროფები სულ უფრო მზარდი ხდება, მარკეტინგი კი ამ ტრავმის მსხვერპლთათვის მეტად თანამგრძნობი და გამოსავალზე ორიენტირებული გახდა. კომპანიებს სწორედ მარკეტინგული კომუნიკაციებისა თუ აზროვნების შეცვლა უწევთ ისე, რომ იგი ამ ინდივიდების ფიზიკურ თუ ემოციურ საჭიროებებს ემსახურებოდეს… ამგვარად, მათ სტიქიური მოვლენების დროს პრიორიტეტი მომხმარებელთა გრძელვადიან კეთილდღეობას უნდა მიანიჭონ და გვერდზე გადადონ სარეკლამო შესაძლებლობები“, — აცხადებს ჯონათან ჟანგი, Colorado State University College of Business-ის მარკეტინგის პროფესორი.
გამოდის, სხვების მხარდაჭერა პირადი მოტივების გარეშე უნდა დაიწყოთ. თქვენთვის მთავარი მიზანი გასაჭირში მყოფი ადამიანების დახმარება უნდა იყოს. მართალია, ძალიან კარგი მარკეტინგული მასალაა, თუმცა, ამ დროს ეს არ უნდა იყოს მამოძრავებელი ძალა. თქვენს ძირითად მოტივზე უნდა დაფიქრდეთ, იმაზე, თუ რა იქნება მოცემულ მომენტში სასარგებლო საზოგადოებისთვის, რომელსაც ემსახურებით.
ხოლო იდეა, რომ ბიზნესებს სამყაროს უკეთეს ადგილად ქცევა შეუძლია, ჯონათანს შემდგომი ქმედებებით წარმოუდგენია:
1. გახდით ემპათიური და გამოხატეთ თანადგომა
ტრაგედიის შემდეგ, მარკეტინგული გუნდები უნდა ფოკუსირდეს მომხდარის გაანალიზებასა და დახმარების შეთავაზებაზე და არა, თავიანთი პროდუქტებისა თუ სერვისების რეკლამირებაზე. მაგალითად კი Airbnb მოჰყავს, რომელმაც ხანძრის დროს Open Homes-ის პროგრამა შესთავაზა ადგილობრივებს და მასპინძლებს საშუალება მისცა, თავიანთი სახლები უფასოდ შეეთავაზებინათ მოხალისეებისა და ოჯახებისთვის, რომელთაც ევაკუაცია დასჭირდათ. ამგვარად, მათი მარკეტინგი სწორედ საზოგადოების დახმარებაზე იყო ორიენტირებული…
2. ითანამშრომლეთ სხვადასხვა ორგანიზაციასთან დაზარალებულთა დასახმარებლად
ერთად დგომით რომ უფრო მეტს მივაღწევთ, ეს კარგად ვიცით… ბუნებრივი კატასტროფების დროს კი განსხვავებული ორგანიზაციების საერთო მიზნისთვის გაერთიანება უმნიშვნელოვანესი ხდება. თუნდაც, საერთო მარკეტინგული კამპანიების ჩაშვება მსხვერპლთა დასახმარებლად. მაგალითად ჯონათანს Red Cross-ისა და Anheuser-Busch-ის თანამშრომლობა მოაქვს — ლუდის წარმოებას აჩერებს პერიოდულად, რათა სასმელი წყალი აწარმოოს ადამიანებისთვის, რომლებიც საშიშ ზონებში ცხოვრობენ.
3. არ დაივიწყოთ სოციალური მედიის ძალა
სოციალურ მედიაში განთავსებულ ცუდ პოსტს ტრაგედიის შემდეგ, მარტივად რომ ვთქვათ, PR კატასტროფამდე მივყავართ… ამიტომ, კომპანიებს ამ მნიშვნელოვანი ხელსაწყოს მნიშვნელობა არ უნდა დაავიწყდეთ, განსაკუთრებით მაშინ, როცა მისი ჭკვიანურად გამოყენების გზები არსებობს — „ტრაგედიის შემდეგ სოციალური მედიის გამოყენების კარგი მაგალითია Facebook-ის Crisis Response ხელსაწყო, რომელიც მომხმარებლებს თავის უსაფრთხო ზონაში მონიშვნის, დონაციისა და რეალურ დროში ინფორმაციაზე წვდომის შესაძლებლობას აძლევს“.
4. დაიცავით ეთიკა
დაბოლოს, ჯონათანი ოთხ ეთიკურ საკითხზე ამახვილებს ჩვენს ყურადღებას, რომლებიც ბიზნესებმა ტრაგედიის შემდეგ უნდა გაითვალისწინოს:
- მგრძნობელობა — დაკარგული სახლებისა თუ ადამიანების შედეგად მიღებული ტრავმის გამო, მარკეტინგულ შეტყობინებებში ფრთხილად უნდა შეარჩიოთ სიტყვები, თავი უნდა აარიდოთ ენას, რომელიც ვიღაცის უიღბლობას მოიაზრებს.
- რელევანტურობა — მარკეტინგული კამპანიებით იმ პროდუქტებსა თუ მომსახურებებს უნდა გაუწიოთ პოპულარიზაცია, რომლებიც მსხვერპლთა გადაუდებელი საჭიროებებისთვის რელევანტურია, იქნება ეს დროებითი თავშესაფარი, მომსახურებები თუ სხვა.
- ფასები — ნამდვილად არ არის ეთიკური ფასის ზრდა იმ პროდუქტზე, რომელზეც მოთხოვნას ექსტრემალური ამინდის მსხვერპლთა საჭიროება ქმნის. ფასი სამართლიანი უნდა იყოს და არ სარგებლობდეს დაზარალებულთა გარემოებებით.
- პატიოსნება — მარკეტინგული კომუნიკაციების დროს გაჟღერებული დაპირებები აუცილებლად უნდა შესრულდეს, რადგან ნებისმიერი სხვა ქმედება კიდევ უფრო გაამწვავებს დაზარალებულთა ტრავმებს.
