in

რა არის „21-ე საუკუნის მთავარი ბიზნესღირებულება?“

პატარა ქვეყანა დიდი შესაძლებლობებით“ – ამ გზავნილით უმასპინძლა საქართველომ „გლობალური ბიზნესისა და ინვესტირების ფორუმს“, 5-6 ოქტომბერს, თბილისში, სასტუმრო „ბილტმორში“. 

როგორ შევქმნათ გლობალური ბრენდი? რა არის საჭირო ბიზნესის განვითარებისთვის? რა როლი აქვს ქალთა ეკონომიკურ გაძლიერებას ბიზნესის მდგრადობისთვის საქართველოში? – ეს იმ თემების არასრული ჩამონათვალია, რის გამოც საქართველოს, ყოველწლიურ ბიზნესღონისძიებაზე, 23 ქვეყნის 250-ზე მეტი დელეგატი ესტუმრა.

წლევანდელი ფორუმის მთავარი თემა „ბიზნესმდგრადობა – 21-ე საუკუნის მთავარი ბიზნესღირებულება“ იყო. სხვადასხვა ქვეყნიდან მოწვეული სპიკერები შეეცადნენ, თავიანთ გამოსვლებში აქცენტი ბიზნესის მდგრადობის სამ მთავარ ასპექტზე: ფინანსურ, სოციალურ და გარემოსდაცვით მიმართულებებზე გაეკეთებინათ. თავის მხრივ, საქართველოს, როგორც მასპინძელი ქვეყნის ინტერესებში შედიოდა საკუთარი საინვესტიციო გარემოსა და შესაძლებლობების, ტურისტული პოტენციალის სწორად წარმოჩენა.
როგორია ორგანიზატორების, მომხსენებლებისა და დამსწრე აუდიტორიის დანახული ბიზნესფორუმი? რამდენად შეძლო საქართველომ საკუთარი პოტენციალის წარმოჩენა და რა ფორმით შეიძლება აისახოს ფორუმის შედეგები ჩვენს ქვეყანაზე?
 
ეკატერინე მაისურაძე, ღონისძიების ორგანიზატორი, საქართველოსა და აზია-აფრიკის სავაჭრო სამრეწველო პალატის თავმჯდომარე, საერთაშორისო ურთიერთობების ცენტრის დამფუძნებელი, საქმიან ქალთა გაერთიანებისა და BPW International Club Tbilisi-ს პრეზიდენტი ფორუმის შესახებ გვიყვება: „იმის მიზეზი, თუ რატომ გავაკეთეთ ეს პროექტი, იყო ზოგადად, ჩვენი ქვეყნის ნაკლები ცნობადობა მსოფლიო ბიზნესწრეებში და შესაბამისად, მწირი ინფორმაცია საქართველოს საინვესტიციო პოტენციალის შესახებ. ხშირად ვყოფილვარ სხვადასხვა ფორუმის მონაწილე და სპიკერი, მსოფლიოს სხვადასხვა ქვეყანაში და ძალიან საწყენი იყო ის ფაქტი, რომ ყველა ჯერზე, თავიდან მიწევდა ახსნა, სად არის ჩვენი ქვეყანა, რა პოტენციალი აქვს, რამდენად უსაფრთხოა აქ საქმიანობის დაწყება, მარტივია, თუ არა ბიზნესის კეთება და ა.შ.“ 

„გლობალური ბიზნესისა და ინვესტირების ფორუმი“ ორი დღის განმავლობაში მიმდინარეობდა. პირველი დღე პრეზენტაცებს, მასტერ-კლასებსა და პანელ-დისკუსიებს დაეთმო.

მირელა სულ, „გლობალური ფორუმისა და ინვესტირების“ ერთ-ერთი სპიკერი, „ქალთა გლობალური ჟურნალისა“ და „ქალთა გლობალური კლუბის“ დამფუძნებელი და აღმასრულებელი დირექტორი: „ჩემი საპრეზენტაციო თემა იყო „როგორ შევქმნათ გლობალური ბრენდი“ და ვისაუბრე იმაზე, თუ როგორ შეიძლება ისეთი იდეის მოფიქრება, რომელიც საერთაშორისო ბიზნესად აქცევს მას. როგორ შეფუთო ბრენდი და შეძლო, აუდიტორიამ ზუსტად ისეთად აღგიქვას, როგორიც ხარ. 

ჩემთვის დიდი პატივი იყო ფორუმზე სიტყვით გამოსვლა. მივიღე ძალიან დიდი გამოცდილება, შევხვდი უამრავ ადამიანს, რომლებიც ჩემთვის შთაგონების წყაროდ იქცნენ და ამ ყველაფრისთვის ყოველთვის მადლიერი ვიქნები. დავამყარე ახალი საქმიანი ურთიერთობები და მინდა გითხრათ, რომ ქუვეითის პრინცესა, შეიხა ჰესსა საად ალ-აბდულა ალ-საბაჰი 18 ოქტომბერს, ლონდონშიქალთა გლობალური ბიზნეს ნეთვორქინგის ღონისძიების“ სტუმარი იქნება.

ჩვენ განსაკუთრებულ დროს, დიდი ცვლილებების ერაში ვცხოვრობთ. ამიტომ, საჭიროა, შევიკრიბოთ, მოვუსმინოთ, იდეები გავუზიაროთ ერთმანეთს და ვიფიქროთ მომავალზე. ამის საშუალებას კი, სწორედ მსგავსი ფორუმები გვაძლევს“, – მირელა სულა.

საქართველოს საპატიო სტუმრები იყვნენ: ქუვეითის პრინცესა, შეიხა ჰესსა საად ალ-აბდულა ალ-საბაჰი, დეჟან სტენსერი – ყაზახურ-სლოვენიური ბიზნესკლუბის (KSBC) პრეზიდენტი და ყაზახური ინვესტიციის რეგიონული წარმომადგენლობის თავმჯდომარე. ფორუმის ფარგლებში, საქართველოს პირველად ესტუმრა მისი აღმატებულება, ზაინაბ ოტიტი ობანორი – ნიგერიის სამეფო ოჯახის წევრი, არაბეთისა და აფრიკის ეკონომიკური განვითარების ინიციატივის დამფუძნებელი.

ფორუმზე ხელი მოეწერა თანამშრომლობის რამდენიმე მემორანდუმს: „საქართველოსა და აზია-აფრიკის სავაჭრო-სამრეწველო პალატასა“ (GAACC) და „არაბეთისა და აფრიკის ეკონომიკური განვითარების ინიციატივას“, ასევე GAACC–სა და „ყაზახეთი-სლოვენიის ბიზნესკლუბს“ შორის.
ეკატერინე მაისურაძე, ფორუმის ორგანიზატორი: „წელს, ბევრმა ადამიანმა გაიცნო საქართველო. დარწმუნდნენ, რომ უსაფრთხო ქვეყანაა, აქ ბიზნესის კეთება მარტივია, კორუფცია მინიმალურ ზღვარზეა დაყვანილი და სამთავრობო სტრუქტურების მხარდაჭერით, ძალიან მარტივადაა შესაძლებელი ბიზნესის დაწყება. თავის მხრივ, აზია საკმაოდ საინტერესოა ბიზნესის კუთხით, ახალი ბაზარია და სწორი ნაბიჯების გადადგმით, კარგი პროექტების განხორციელება შეიძლება. ფორუმმა ძალიან კარგი შესაძლებლობები მისცა როგორც ადგილობრივ, ისე უცხოელ ბიზნესებს და დიდი სურვილი მაქვს, რომ თანამშრომლობა მხოლოდ მემორანდუმით არ შემოიფარგლოს და რეალური შედეგები მალევე დავინახოთ“.რა შეეხება ღონისძიების მეორე დღეს, ის დაეთმო B2B (Business To Business – ბიზნესი ბიზნესისთვის) შეხვედრებს – ე.წ. „ნეთვორქინგს“, ადგილობრივ და უცხოელ ბიზნესმენებს შორის პარტნიორული ურთიერთობების დამყარებას.

ეკატერინე ჯავახია, ღვინის კომპანია „შუხმანი“: „ღონისძიება კარგად იყო ორგანიზებული, საინტერესო სპიკერები იყვნენ, თუმცა პირველი დღე, ცოტა აცდენილი იყო იმ სფეროს, რომელშიც ვსაქმიანობ – ღვინის ინდუსტრიას. რაც შეეხება B2B შეხვედრებს, ისინი უფრო ნაყოფიერი იყო, რადგან გავიცანი რამდენიმე დელეგატი, რომლებიც დაინტერესდნენ ქართული ღვინით და რეალურად, შესაძლებელია, ინდოეთის, დიდი ბრიტანეთისა და დუბაის ბაზარზე აღმოვჩნდეთ“.

„გლობალური ბიზნესისა და ინვესტირების ფორუმში“ მონაწილეობა მიიღეს როგორც სამთავრობო, ისე კერძო სექტორის წარმომადგენლებმა. ფორუმის ფარგლებში დამსწრეებს სიტყვით მიმართეს: ქალაქ თბილისის მერის მოადგილემ, საქართველოს პარლამენტის იურიდიულ საკითხთა კომიტეტის თავმჯდომარემ, საქართველოს ბიზნესომბუდსმენმა, ტურიზმის ეროვნული ადმინისტრაციის ხელმძღვანელმა, სააგენტო „აწარმოე საქართველოში“ დირექტორმა და სხვებმა.
„გლობალური ბიზნესისა და ინვესტიციების ფორუმი“ წელს, უკვე მეორედ გაიმართა. ფორუმზე მონაწილეობის მიღება ნებისმიერ დაინტერესებულ პირს შეეძლო.

ყველისგან შექმნილი ფერწერული შედევრები

მობილური საფრთხე საჭესთან