ბობ დილანმა Sony Music Entertainment-ს მთელი თავისი მუსიკალური კატალოგი მიჰყიდა, რომელიც 200 მილიონ დოლარზე მეტადაა შეფასებული.
განცხადებაში დილანმა აღნიშნა, რომ მრავალი წლის განმავლობაში, Columbia Records და Sony Music Group-ის თავმჯდომარე, რობ სტრინგერი მისთვის მხოლოდ კარგს აკეთებდა და სარგებელი მოჰქონდა, ამიტომ მოხარულია, რომ მისი ჩანაწერები იქნება იქ, სადაც მისი რეალური ადგილია.
დილანმა Columbia Records-თან ხელი 1961 წელს მოაწერა. მისი ყველა სტუდიური ალბომი – 1962 წლის ბობ დილანიდან მოყოლებული, 2020 წლის Rough და Rowdy Ways-მდე, ამ ლეიბლის მეშვეობით გამოვიდა. 1974 წელს მან ხელი მოაწერა ახალ ხელშეკრულებას, რომლითაც, როგორც Billboard ვარაუდობს, დაიბრუნა კონტროლი მთელ საკუთრებაზე. Sony-მ 1988 წელს შეიძინა კოლუმბიის მშობელი კომპანია CBS Records Inc., 1991 წელს დაარქვეს მას Sony Music Entertainment Inc.
აღსანიშნავია, რომ 2020 წელს დილანმა მთელი თავისი კატალოგის გამოქვეყნების უფლება Universal Music Publishing-ს მიჰყიდა 300-მილიონდოლარიანი ღირებულებით. სიმღერებს გააჩნიათ ორი საავტორო უფლება: უფლება ორიგინალურ ჩანაწერზე, რაც მოიცავს საბოლოო მუსიკალურ პროდუქტზე და ჩანაწერზე უფლებას და – უფლება ე.წ. Publishing-ზე, რომელიც მოიცავს კომპოზიციებს (მუსიკა და ტექსტი). ჩაწერის უფლებები უფრო დაკავშირებულია სტრიმინგებთან და გაყიდვებთან, ხოლო გამოქვეყნების უფლებები ძირითადად ეხება მის გამოყენებას სპექტაკლებში, კინოსა და ტელევიზიაში.
