ბოლო 30 წლის მანძილზე, ბოთლირებული მინერალური წყლის ბაზარი მსოფლიოში ერთ-ერთ ყველაზე დინამიურ სექტორად მიიჩნევა სასმელისა და საკვების ინდუსტრიაში. მსოფლიოში ბოთლირებული მინერალური წყლის მოხმარება ყოველწლიურად 7%-ით იზრდება მიუხედავად იმისა, რომ მისი ფასი საგრძნობლად აღემატება ონკანის წყლის ღირებულებას (C. Ferrier, 2001).
როგორც „ეისითის“ კვლევაში გამოჩნდა, ბოთლირებული წყლის მოხმარება თბილისელთათვისაც საკმაოდ აქტიური ქცევაა – გამოკითხულთა 92% აღნიშნავს, რომ პირადად მოიხმარს ბოთლირებულ მინერალურ წყალს. მამაკაცები უფრო აქტიურად მოიხმარენ მას (96%), ვიდრე ქალები (89%). განსხვავებები დაფიქსირდა ასაკობრივ კატეგორიებშიც – თბილისში ბოთლირებულ მინერალურ წყალს ყველაზე მეტად 18-34 წლის ასაკის მოსახლეობა მოიხმარს (93%).
აქვე უნდა აღინიშნოს ისიც, რომ მოხმარების თვალსაზრისით, გაზირებულ ბოთლირებულ მინერალურ წყალს ბევრად დიდი წილი აქვს (73%), ვიდრე არაგაზირებულს (8%). ხოლო ხუთიდან ერთი თბილისელი ორივე ტიპის მინერალურ წყალს მოიხმარს.
„ეისითიმ“ გამოიკვლია თბილისში ბოთლირებული მინერალური წყლის მოხმარების სიხშირეც. როგორც აღმოჩნდა, თბილისელებისთვის დამახასიათებელი ტიპიური ქცევა – მინერალური წყლის კვირაში 2-3-ჯერ მოხმარებაა. ყოველთვიური პირადი დანახარჯი კი, რესპონდეტთა განცხადებით, არაგაზირებული წყლის შემთხვევაში აღემატება 11 ლარს, ხოლო გაზირებულის შემთხვევაში – 16 ლარს.
ბოთლირებული მინერალური წყლის მიმართ ასეთი ინტერესის პარალელურად საინტერესოა, სად იძენს თბილისელი მომხმარებელი ამ პროდუქტს. როგორც კვლევაში გამოვლინდა, მცირე სასურსათო მაღაზია/მარკეტი სწორედ ის ადგილია, რომელსაც თბილისელები ბოლო ერთი თვის მანძილზე ყველაზე აქტიურად სტუმრობენ წყლის შეძენის მიზნით. შემდეგი ყველაზე პოპულარული შეძენის ადგილი ქსელური სუპერმარკეტები და ჰიპერმარკეტებია.
გამოკითხვა ჩატარდა 405 ზრდასრულ თბილისელს შორის, 2014 წლის ოქტომბერში. მონაცემთა სტატისტიკური ცდომილება არ აღემატება 4.9%-ს.
გამოკითხვა ჩატარდა ექსკლუზიურად ინტერნეტ ჟურნალისთვის „მარკეტერი“. მესამე პირის მიერ აღნიშნული გამიკითხვის სრულად ან ნაწილობრივ გამოყენების შემთხვევაში ამის აღნიშვნა სავალდებულოა.
