მსოფლიო ჩემპიონატის პერიოდში ყველა ბრენდი ვერ იქნება FIFA-ს ოფიციალური სპონსორი და არც ყველა გულშემატკივარს აქვს მატჩებზე დასწრების შესაძლებლობა. თუმცა ერთი რამ ყველასთვის ხელმისაწვდომია – სოციალურ ქსელებში ფეხბურთზე საუბარი, ემოციების გაზიარება და საკუთარი გუნდის მხარდაჭერა.
სწორედ ეს ტენდენცია გამოიკვეთა Reddit-ზეც. ფეხბურთთან დაკავშირებული დისკუსიები მხოლოდ სპორტულ თემებში არ გაჩენილა – აქტიურად ჩაერთნენ მასპინძელი ქალაქების subreddit-ებიც, სადაც ადგილობრივები სტუმარ გულშემატკივრებსა და ფეხბურთელებს მასპინძლობდნენ და გამოცდილებებს უზიარებდნენ ერთმანეთს.
Reddit-ის შიდა კრეატიულმა სააგენტომ მსოფლიო ჩემპიონატის დაწყებამდე თითქმის ერთი წელი დახარჯა იმის შესასწავლად, თუ რა თემებზე შეიძლება ესაუბრათ მომხმარებლებს. მიზანი იყო, ბრენდებს დახმარებოდნენ იმ საუბრებში ბუნებრივად ჩართვაში, რომლებიც ტურნირის განმავლობაში სპონტანურად ვითარდებოდა.
ჯერ მოუსმინე, მერე ილაპარაკე
მთავარი რეკომენდაცია ბრენდებისთვის მარტივია: სანამ რამეს იტყვი, ჯერ დააკვირდი, რაზე საუბრობენ ადამიანები.
მსოფლიო ჩემპიონატის დროს, როდესაც მომხმარებლები სატელევიზიო რეკლამებითა და სპონსორობით ისედაც გადატვირთულები არიან, ბევრად ეფექტიანი შეიძლება აღმოჩნდეს კამპანია, რომელიც რეალურ მომენტებსა და გულშემატკივრების ემოციებს ეხმიანება.
წარმატებული მაგალითები
ამ მიდგომის ერთ-ერთი კარგი მაგალითი DoorDash-ია. კომპანიამ Reddit-ზე ისეთი რეკლამები გაუშვა, რომლებიც მატჩის მიმდინარეობას ერგებოდა. მაგალითად, თუ მომხმარებლის გუნდი გაიტანდა, რეკლამა სასმლის შეკვეთას სთავაზობდა აღსანიშნავად, ხოლო წაგების შემთხვევაში, უფრო მსუბუქი, იუმორისტული გზავნილებით ცდილობდა მომხმარებელთან დაკავშირებას.
Coors Light-მა კი ინტერაქციული კამპანია შექმნა. მომხმარებლებს შეეძლოთ ვირტუალური ლუდის ონკანი „გაეხსნათ“ და ბრენდის ცნობილი შეძახილის, “Coooors” ასოების რაოდენობა გაეზარდათ. კამპანიამ ტურნირის განმავლობაში მილიონობით ინტერაქცია დააგროვა.
Reddit-ზე რეკლამა ჩვეულებრივი რეკლამა არ არის
Reddit-ზე წარმატებისთვის ბრენდი არ უნდა ეცადოს ზედმეტად „იდეალურად“ გამოჩენას. გაცილებით უკეთ მუშაობს ბუნებრივი, ადამიანური ტონი და ისეთი კონტენტი, რომელიც თავად პლატფორმის კულტურას შეესაბამება.
ბრენდებმა მომხმარებლებს რეკლამა კი არ უნდა „მიაწოდონ“, არამედ საუბარში ისე ჩაერთონ, როგორც საინტერესო სტუმარი მეგობრების შეკრებაზე: მოუსმინონ, გაიგონ, რა აინტერესებთ ადამიანებს და მხოლოდ ამის შემდეგ გახდნენ დიალოგის ნაწილი.
სწორედ ამ მიდგომას მიიჩნევს Reddit-ის გუნდი ყველაზე ეფექტურ სტრატეგიად არა მხოლოდ მსოფლიო ჩემპიონატის, არამედ ნებისმიერი დიდი სპორტული თუ კულტურული მოვლენის დროს.
