რამდენიმე დღის წინ მარკეტერის მკითხველმა Vodafone-ის ბოლო კამპანია იხილა, რომელშიც მოდელი ანდრას არატო მონაწილეობს. უფრო გასაგებად კი, ცნობილი მიმი, “Hide the Pain, Harold”, არის გამოყენებული. ეს გარკვეულწილად იმის შეხსენება იყო ბრენდებისთვის, რომ მათ ყოველგვარი გაღიზიანების გარეშე შეუძლიათ „ონლაინ საუბრებში“ ჩართვა.
რამდენიმე ბრენდს თავის რეკლამაში ან სოციალურ წარმოებაში საინტერესო გზებით შეუძლია ასეთი ხრიკის გამოყენება — მიმები ხომ თანამედროვე კომუნიკაციის არსებითი ელემენტია. არცერთმა ორგანიზაციამ, რომელსაც სურს, თანამედროვე კულტურაში მიიღოს მონაწილეობა, არ უნდა უგულებელყოს ისინი. თუმცა დავალება ერთია, შესრულება კი — მეორე. სწორედ აქ ჩნდება კითხვა, როგორ შეუძლიათ კრეატიულ სააგენტოებსა და ბრენდებს ამ ინსტრუმენტების თავიანთი სამიზნე აუდიტორიისთვის დაცინვის (ან დაბნეულობის) გარეშე გამოყენება.
„მამა დისკოთეკაში“ ეფექტი საკმაოდ დიდი რისკია. მარტივად რომ ვთქვათ, კომპანიამ მიმის გამოყენების შემთხვევაში საკმაოდ ფაქიზი ზღვარი უნდა დაიცვას — ანუ, იმოქმედოს როგორც ბრენდმა და არა როგორც მომხმარებელმა. შესაბამისად, რამდენიმე კითხვას უნდა უპასუხოთ: შეესაბამება თუ არა მიმი თქვენი ბრენდის ტონს? მიიღებდით თუ არა მონაწილეობას ბრენდთან კომუნიკაციაში ამ მიმის ფორმატის გარეშე?
რა თქმა უნდა, წლების წინ მარკეტერები მტკიცე უარს იტყოდნენ მიმების გამოყენებაზე. მით უმეტეს იმის გათვალისწინებით, რომ ემოჯიების გამოყენებაც კი სათუო იყო. ახალი რეალობის მიხედვით კი მიმები რაღაც კონკრეტული აზრის შემუშავებაში იღებს მონაწილეობას — ვიკი მარფიტის, Digitas-ის არტ დირექტორის, თქმით, იუმორისტული, აქტუალური და დროული მიმები ერთ-ერთი საუკეთესო გზაა მომხმარებლებთან სწორი კომუნიკაციის დასამყარებლად.
ბოლო რამდენიმე წლის განმავლობაში „ხალხური ხელოვნების“ აქტუალური ზრდა ვიხილეთ ისეთო სერვისების საშუალებით, როგორიცაა Reddit და TikTok. ამ ყველაფრის ფონზე კი მიმი არის ის, რაც დიდი პოპულარობით სარგებლობს და ყოველ ამბავს სპეციფიკურ, კონკრეტულ ხასიათს სძენს. ამრიგად, ეს იმის ყველაზე სწრაფი და საუკეთესო გზა გახდა იმის წარმოსადგენად, თუ რა ხდება მსოფლიოში მოცემულ მომენტში.
გარდა ამისა, ისიც გასათვალისწინებელია, რომ სახალისო და ეფექტური მიმები ვირუსულად ვრცელდება ინტერნეტსივრცეში. გამოდის, როდესაც კომპანია მას იყენებს, თავადაც ამ ვირუსული გავრცელების ნაწილი ხდება და სულ უფრო მეტი ადამიანი იგებს მის შესახებ. მარტივად, ბრენდებმა მეტი ყურადღება უნდა გაამახვილონ გართობაზე, ვიდრე გაყიდვაზე — შედეგები კი თავისთავად მოვა. თუმცა ნუ დაივიწყებთ, რომ მიმები ყოველთვის ისეთი მსუბუქი ხასიათის ან სახალისო არ არის, როგორც ხალხს ჰგონია, ხშირად საზოგადოებები მათ კოლექტიური ტრავმის გამოსახატად ან მენტალური ჯანმრთელობის საერთო საკითხებს შორის იუმორის მოსაძებნად იყენებენ. ამიტომაც, ვიდრე ამ ტენდენციაში ჩართვას გადაწყვეტთ, კულტურული კონტექსტიც გაითვალისწინეთ.
„მიმებს, როგორც წესი, ვებზე ორიენტირებული სასიცოცხლო ციკლი აქვს, რომელიც სრულიად არაპროგნოზირებადია. მათ კონკრეტული და მიზანმიმართული აუდიტორია ჰყავს და მხოლოდ მაშინ უნდა იქნას გამოყენებული, როდესაც კვეთა ბუნებრივი და, რაც მთავარია, სწრაფია“, — ამბობს Barbarian-ის დირექტორი, კორტნი ბერი. ცხადია, როგორც ყველაფერში, კონტექსტი და ნიუანსი წარმატების გასაღებია… განსაკუთრებით ასეთ სწრაფ გარემოში და აქტიურ აუდიტორიაში. დინამიკურ კრეატიულობაში ტექნოლოგიური პროგრესი, მონაცემების ღრმა ანალიზთან ერთად, ნიშნავს, რომ სრული პოტენციალის გამოყენება შეგვიძლია.
