in

რატომ დადგა ბრენდის „ჰუმანიზაციის“ საჭიროება?

როგორც ჩანს, ციფრული ტექნოლოგიები ჩვენი ცხოვრების წესად იქცევა და ამ პროცესის პარალელურად, სულ უფრო გვეშინია რაღაც ფუნდამენტური ცვლილების — ჩვენი „ადამიანობის“ დაკარგვის. ალბათ, ბევრ თქვენგანს ერთხელ მაინც შეხვედრია კაცობრიობის „გარობოტებისგან“ ხსნის იდეასთან დაკავშირებული აზრები თუ თეორიები…

მარკეტინგში ე. წ. ჰუმანიზაციის შემჩნევა კი რამდენიმე წლის წინ დაიწყეს დარგის ექსპერტებმა — როდესაც რამდენიმე მათგანმა გააცნობიერა, რომ არ არსებობს B2B ან B2C, არამედ არსებობს მხოლოდ H2H (ადამიანი ადამიანისთვის). უფრო კონკრეტულად, არ აქვს მნიშვნელობა, რომელ სექტორში ხართ, გადაწყვეტილებებს ყოველთვის რეალური ადამიანები იღებენ. რობოტიზაციის შიშის გააქტიურებასთან ერთად კი ბრენდინგში სულ უფრო ხშირად ჩნდება სიტყვა „ადამიანი“. ამის ერთგვარი კულმინაცია იყო Mondelez-ის წარმოუდგენელი განცხადება, რომლის მიხედვითაც, „წყვეტდნენ მარკეტინგს და იწყებდნენ ჰუმანიზაციას“. 

თუმცა ბრენდინგის ჰუმანურობა უფრო შორს მიდის. White Ops-მა, „რეკლამების გადამოწმების, ბოტების აღმოჩენისა და კიბერუსაფრთხოების ფირმამ“, რებრენდინგის შედეგად ახალი სახელი შეიძინა — HUMAN. ამ ნაბიჯის იდეა იმ ფაქტის ხაზგასმა იყო, რომ კომპანიის უკან არსებული პროდუქტი რეალურ ადამიანებს იდენტიფიცირებს, რომლებიც ინტერნეტს იყენებენ. ირონია ის არის, რომ ამ დავალებას, ძირითადად, ავტომატიზირებული სისტემით ასრულებენ — ანუ, ადამიანების როლი ძალიან მცირეა.

აღნიშნული მაგალითები ცხადყოფს, თუ რამდენად დიდი სასოწარკვეთილებით ვცდილობთ, საკუთარი თავის არსებობას ჩავებღაუჭოთ. ბევრ კომპანიას კი მიაჩნია, რომ „ჰუმანიზაცია“ იდენტობის გამყარებას შეუწყობს ხელს. ტექნიკურმა ბრენდებმა ეს კარგად იციან და მათ ბრენდბუქებშიც ხაზგასმითაა გამოხატული „ჩვენ ვართ ადამიანები“ პათოსი. გარკვეულწილად, ეს არის გზა, რომ საზოგადოების თვალში რობოტებად არ გამოჩნდნენ და თანმდევი აგრესია თუ უნდობლობა არ მიიღონ.

ისიც უნდა გავითვალისწინოთ, რომ ამ ყველაფერმა კაცობრიობა უხერხულ დიქოტომიაში მოაქცია ციფრულ კულტურასთან, ავტომატიზაციის ტექნოლოგიასთან და კაპიტალიზმის მაქინაციებთან, რომლებსაც ადამიანები ქმნიან ადამიანებისთვის. ერთ მხარესაა შეუჩერებელი პროგრესი და ტექნოლოგიური განვითარება, ხოლო მეორე მხარეს დგას ადამიანურობაზე დაფუძნებული იდეოლოგია. ამ ჭიდილში კი ხშირად ჩნდება იმის საჭიროება, რომ ორგანიზაცია უფრო ადამიანური გახდეს — ანუ, უფრო მომხმარებელზე ორიენტირებული, ვიდრე — პროცესებზე. ეს არის რევოლუცია, რომელმაც უკვე ოცი წელია მოიცვა ბიზნეს ლანდშაფტი და ამის საჭიროება ჯერ კიდევ არსებობს…

ეს რადიკალური რევოლუცია პოლ კეშის წიგნის თემაც არის, სახელწოდებით Humanizing B2B. ავტორის თქმით, „ამ კონტექსტში, „ადამიანი“ არის ინსტრუმენტი, რომელიც ორგანიზაციებს ეხმარება, თავი აარიდონ B2B პროდუქტზე დაფუძნებულ ნარატივს და მეტად ისაუბრონ აუდიტორიაზე ან მომხმარებლებზე. ამისათვის კი ემოციები და სიუჟეტები, აგრეთვე ბრენდის მიზანი უნდა გამოიყენონ, რათა აუდიტორიასა და კომპანიას შორის ემოციური ხიდი აიგოს“. 

ბერლინის ძველი აეროპორტი ეკო-მეგობრულ სამეზობლოდ გადაკეთდება

LEGO-მ ბავშვების წარმოსახვით სათამაშო მოედანი ააშენა