გასული წელი კი საკმაოდ რთული იყო, მაგრამ როგორც სპეციალისტები გვეუბნებიან, „დროა, ბრენდები უსაფრთხო სივრცეების ძიებას შეეშვან, რადგან 2024 წელს სწორედ ის მიაღწევს წარმატებას, ვინც რისკზე წასვლას გაბედავს“.
ბოლო დროს განვითარებულ მნიშვნელოვან ამბებსაც რომ გადავხედოთ, Calvin Klein-მა კვლავ მოახერხა მაყურებლების ყურადღების დაბრუნება და კულტურული საუბრების ცენტრში მოქცევა. აქვე უნდა ვახსენოთ Jeremy Allen White და FKA Twigs-იც… და ყველაზე მთავარი — გასული წელი სრულად დაიპყრო Barbie-მ, ნახევარ წელზე მეტი დრო მსოფლიო ბრენდებისა და მარკეტინგის საზოგადოებამ მის ჩრდილქვეშ გაატარა. დღეს კი სხვებსაც სურთ მსგავსი შედეგები გაიმეორონ, თუმცა რამდენად აქვთ მათ რისკებზე წასვლის სურვილი?!
Mattel-მა წარმატების მიღწევა იმით მოახერხა, რომ ბრენდის უსაფრთხოება გვერდით გადადო და ცეცხლიც კი წაუკიდა ათწლეულების განმავლობაში აღქმულ ბრენდის პოზიტიურობას. თამამი ნაბიჯი გადადგა და ბარბი მსოფლიოს ხელახლა გააცნო, მას სრული ეგზისტენციალური კრიზისი სჭირდებოდა… ამიტომ, დღეს ბრენდებს მოუწევთ თავი კომფორტულად იგრძნონ სახიფათო თამაშებში შესვლით, თუ, რა თქმა უნდა, სურთ, რომ წარმატებას მიაღწიონ. აქ რისკებზე წასვლის რაიმე ფორმულას კი ვერ შემოგთავაზებთ, მაგრამ იმ პრინციპებს გაგაცნობთ, რომელთა დაცვაც ამ პროცესში მნიშვნელოვანია:
პირველი — იყავით განსხვავებული, ნებისმიერი ალგორითმი მოგაწვდით რელევანტურ ინფორმაციებს, მაგრამ თუ გსურთ, თქვენი ბრენდი ყურადღების ცენტრში მოექცეს, ამის მიღმა უნდა წახვიდეთ და განსხვავებული გახდეთ.
მეორე — მოძებნეთ ირაციონალური პასუხები. ბრენდებს სჭირდებათ, რომ ჩვენი ყველაზე ემოციური, ირაციონალური მხარეები მიიზიდონ, რათა არსებული გადაწყვეტილების მიღების სისტემა გატეხონ და რაღაც სრულიად ახალი შემოგვთავაზონ.
მესამე — ყურადღება მიაქციეთ ყველა შეგრძნებას. ბრენდინგი არ უნდა იყოს იმაზე კომპლექსური, ვიდრე „ის, რასაც ხედავთ და იცით, რაც გესმით და იცით, რა სურნელსაც შეიგრძნობთ და იცით, რასაც გრძნობთ და იცით“. თქვენ უნდა ფოკუსირდეთ გამოცდილების შექმნაზე, რომელიც ყველა სენსორულ მახასიათებელს მოიცავს.
დაბოლოს, არასრულფასოვნება და მოწყვლადობა აითვისეთ, რადგან არავის სჯერა თქვენი ბრენდის სრულყოფილების… მიიღეთ სისუსტეები და უცნაურობები, რაც თქვენს ბრენდს ისეთად აქცევს, როგორიც არის. ზუსტად ისე, როგორც ეს მაგალითად Bettr-ის ყავის ბრენდმა გააკეთა.
