in

როგორ გვეხმარება ბრენდის ქონა კრიზისის დროს?

ბოლო სამ წელში ჩვენ გლობალური პანდემიის, ომისა და განვითარებადი ეკონომიკური კრიზისის მომსწრენი გავხდით… Collins Dictionary-მ 2022 წლის სიტყვად პერმაკრიზისიც კი დაასახელა, რაც არასტაბილურობისა და დაუცველობის ხანგრძლივ პერიოდს გულისხმობს.

ამჟამინდელი პერმაკრიზისული გარემო კი სერიოზული გამოწვევის წინაშე გვაყენებს როგორც ჩვენ, ისე ორგანიზაციებს. ბიზნესებს დღეს მომხმარებელთა საჭიროებების დაკმაყოფილება უწევთ, რომლებიც გამუდმებით იცვლება ეკონომიკური, პოლიტიკური, ფიზიკური თუ სოციალური გარემოს საპასუხოდ. კრიზისის დროს კი ხშირად, ხარჯების შემცირების მიზნით, ბრენდს პრიორიტეტს აღარ ანიჭებენ…

არადა თქვენი ბრენდი ის ბიზნეს ხელსაწყო შეიძლება იყოს, რომელიც კონკურენტული უპირატესობის, მომხმარებლებთან ემოციური ჩართულობისა და თანამშრომელთა მოტივაციის საკითხებში დაგეხმარებათ. გამოდის, თუ ბრენდი აღარ იქნება პრიორიტეტი, ამ უპირატესობებზეც მოგიწევთ უარის თქმა. 

Greene King ერთ-ერთია იმ კომპანიებიდან, რომელმაც პანდემიისგან თავის დაღწევა წარმატებით მოახერხა — მიუხედავად გამოწვევებით სავსე ეკონომიკური კლიმატისა, მისი შემოსავლები 2022 წლისთვის 62%-ით გაიზარდა, ეს კი ბრენდზე ორიენტირებულობით მოახერხა! 2020 წელს Greene King-ის ბრენდის მიზანსა და ღირებულებებზე მუშაობა უკვე დასრულებული იყო და გაშვებაღა დარჩენოდათ. თუმცა პანდემიის გამო ეს უბრალოდ ბრენდის გაზიარება კი არა, არამედ მისი პრაქტიკაში გამოცდა გამოდგა.

ჩვენ ახალი ღირებულებები მყისიერად ავამუშავეთ, რათა დაგვხმარებოდა ისეთი მიზნების ჩამოყალიბებაში, რომლებიც კრიზისში წინ გაგვიძღვებოდა. ამან გვაჩვენა გზა, რომლითაც ბიზნესის გადარჩენა, ჩვენს ხალხზე ზრუნვა და პანდემიიდან გამოსვლა იმაზე ძლიერად მოვახერხეთ, ვიდრე ჩვენმა კონკურენტებმა, — განმარტავს ბრენდის აღმასრულებელი ხელმძღვანელი ნიკ მაკენზი.

კრიზისის დროს ლიდერებმა მამაცი ნაბიჯებიც უნდა გადადგან და რთული გადაწყვეტილებებიც მიიღონ, რაშიც ბრენდი ძალიან დაგეხმარებათ. მაკენზი ამბობს: როცა რთული გადაწყვეტილების მიღება მიწევდა, ჩვენს ღირებულებას ვუბრუნდებოდი — We Care. ვკითხულობდი, როგორ შეგვეძლო ამის დემონსტრირება რეალური ქმედებით, რათა ეს უბრალო განცხადება არ ყოფილიყო.

თუმცა აქ საქმე მხოლოდ ხელმძღვანელებს არ ეხება, არამედ გუნდებსაც — იმისათვის, რომ ბრენდით მოტივირებულნი იყვნენ, თავად თქვენმა ბრენდმა უნდა განსაზღვროს, რა გამოცდილებას მიაწვდის თანამშრომლებს, რას და რატომ გაუზიარებს, რატომ იმუშავებს კონკრეტული გზებით და რა პროცესებს მიჰყვება. 

ბრენდის გამოცდილება კრიზისის დროს

ეს შიდა ძალა მხარს უჭერს თქვენს ორგანიზაციას ბრენდის საბოლოო მიზნის მიღწევაში, რაც მომხმარებლებთან ურთიერთობის ღირებულების გაზრდას გულისხმობს. ამის წარმატებულ მაგალითად Lululemon-ის ბრენდი შეგვიძლია ჩავთვალოთ — 2020 წელს კომპანიის ხელმძღვანელობამ სტრატეგიული განვითარების გეგმის განხორციელება გადაწყვიტა, რომლის ცენტრშიც ბრენდის ხედვა იყო მოქცეული…

ამგვარად, კრიზისის დროს ცდუნება, რომ ბრენდის ხარჯზე ფინანსურ საკითხებზე ფოკუსირდეთ, საკმაოდ დიდი იქნება, მაგრამ აქ თავად ამ სიტყვის წარმოშობა უნდა გავიხსენოთ — ბერძნული ტერმინი Krisis შესაძლებლობის მომენტს ნიშნავს, რაღაცის გამოსწორების შანსსა და გადაწყვეტილებას, რომელიც ან მარცხით, ან გამარჯვებით სრულდება. ამიტომ, უზრუნველყავით, რომ პერმაკრიზისის დროს ბრენდი თქვენს შუქურად იქცეს და ასე იმ სტრატეგიულ შესაძლებლობებსაც დაინახავთ, რომლებიც თქვენი თანამშრომლების გაძლიერებასა და მომხმარებლებთან ურთიერთობების გაუმჯობესებაში დაგეხმარებათ. ამგვარად, კონკურენტული უპირატესობის მოპოვებასაც შეძლებთ. 

როგორ გვეხმარება Google App ყოველდღიურობაში?

BEKO და ELIT Electronics დამეგობრდნენ