ბიზნესს ვერასოდეს აამუშავებ, თუ მომხმარებელმა არ იცის, როგორ მოგაგნოს ან საერთოდაც, რას სთავაზობ. ამასთან, უცნაურია, მაგრამ ბევრ მცირე ბიზნესს ვებგვერდიც კი არ აქვს და არც ის იცის, სად და როგორ განათავსოს ინტერნეტში შესაფერისი რეკლამა.
არ არის აუცილებელი, იყო Google-ის ექსპერტი იმისთვის, რომ იპოვო, როგორ კეთდება მარტივ შაბლონზე ვებგვერდი, ამასთან, არიან ექსპერტებიც, რომლებიც ამას შენ მაგიერ, შესაბამის ფასად გააკეთებენ. თუმცა, მთავარი გამოწვევა ვებგვერდი კი არა, ის კონტენტია, რომელიც ბიზნესის სწორ პოზიციონირებასა და მომხმარებლების მოზიდვას შეუწყობს ხელს. რა გვჭირდება ამისთვის? როგორ მოვიზიდოთ და დავამახსოვროთ თავი მომხმარებელს ონლაინ სივრცეში? ამ კითხვებზე, ვეცდებით, რამდენიმე რჩევით ვუპასუხოთ.
აწარმოე ბლოგი, რომ უკეთ წარმოაჩინო შენი ბიზნესი
არაა აუცილებელი, იყო პროფესიონალი მწერალი, რომ შესაბამისი კონტენტი შექმნა. მთავარია, შეძლო გამოცდილებისა და რეკომენდაციების გაზიარება. ბლოგი გაძლევს საშუალებას, რეკლამის, პირდაპირი შეთავაზების გარეშე დაანახო მთავარი უპირატესობა, რაც აქვს შენს პროდუქტს.გაითვალისწინეთ, რომ ტექსტი, ბლოგი თუ სხვა რამ, მკითველისთვის მისაწვდომი უნდა იყოს როგორც პერსონალურ კომპიუტერზე, ისე მობილურზე.
აღსანიშნავია ისიც, რომ მეწარმეთა უმეტესობა მაინც ვერ ახერხებს კონტენტის პირადად შედგენას, რაც გადატვირთულობით მარტივად აიხსნება. ასეთი შემთხვევისთვის, არსებობენ კოპირაიტერები და კონტენტ-მეიქერები, რომლებიც შესაბამის კონტენტს თქვენ მაგივრად შექმნიან.
შეუერთდი შენს ინდუსტრიას, მიიღე მონაწილეობა ფორუმებში
ფორუმი არის საკმაოდ გამოცდილი მეთოდი შენს ბიზნესზე სასაუროდ. ესაა საშუალება, გამოჩნდე, დაენახო საზოგადოებას და მეტი დაინტერესებული ადამიანი მიიზიდო შენი ვებგვერდისა და ბიზნესისკენ. შეგიძლია მსგავს ფორუმს თავადაც გაუკეთო ორგანიზება. ასეა თუ ისე, ესაა ახალი კონტაქტებისა და პარტნიორების, მომხმარებლების მოზიდვის საშუალება.
გამოიყენე სოციალური ქსელი და ვებგვერდი. უამრავი ადამიანი სარგებლობს სოციალური მედია პლატფორმებით. თუმცა, ხშირად რთულია, ამა თუ იმ სოციალურ პლატფორმაზე შენი კომპანიის პოვნა. გამოიყენე საიტი იმისთვის, რომ ადამიანმა შეძლოს შენი ორგანიზაციის მისამართის პოვნა სხვადასხვა სოციალურ ქსელში.
მიაწოდე ინფორმაცია მკითხველებს სიახლეების შესახებ
ელექტრონული გაზეთი არის რეგულარული მეთოდი, შეახსენო შენ შესახებ და ამავდროულად, მიაწოდო განახლებული ინფორმაცია. ელექტრონული გაზეთის გამოწერით კონტენტი, რომელიც საიტზე განთავსდება ელ.ფოსტით დაეგზავნება გამომწერებს. ელექტრონული გაზეთი შეიძლება მოიცავდეს ფოტოებსა და ვიდეოებსაც.
მოაწყვე აქტივობები
ვიზიტორებს უყვართ ინტერაქტიული აქტივობები: ისტორიების გაზიარება, ხმის მიცემა, მარტივი კითხვარის შევსება და ამისათვის რაიმე საჩუქრის მიღება. სწორად დაგეგმილი მსგავსი კონკურსები მნიშვნელოვნად წაადგება სოციალური მედიის გააქტიურებას.
ფოტო/ვიდეო კონტენტი. მარტივი ვიდეოები, რომლებზეც შენს სერვისებსა და მომხმარებლებზეა და ამავდროულად, მცირე ქრონომეტრაჟიანია, ასევე საინტერესოა მომხმარებლისთვის. მსგავსი ვიდეოების ატვირთვა შეიძლება Youtube-ზე, ხოლო შემდეგ, ვებგვერდზე განთავსება. ყურადღება მიაქციე, რომ ვიდეო იყოს სახალისო და საყურებლად კომფორტული.
სპეციალური აპლიკაციები გეხმარება მარტივად განაახლო ინფორმაცია დღის შემოთავაზებაზე ან სხვა აქციაზე. ესაა მარტივად გაფორმებული, სახალისო და მოსახერხებელი ინსტრუმენტი.
დიახ, ბევრი დეტალია, მაგრამ ნუ შეშინდები, არც ყველაფრის ერთდროულად კეთებაა აუცილებელი. თავდაპირველად, აარჩიე საქმეები, რაც გეხერხება და იმით დაიწყე, მთავარია გახდე ხილული შენი მომხმარებლებისთვის.
