სტრატეგიული ჩარჩოების საშუალებით შეგიძლიათ იმის განსაზღვრა, არის თუ არა მოცემული შესაძლებლობა მიმზიდველი ან რამდენად იმუშავებს. ჩარჩოები ნაკლებად გეხმარებათ შესაძლებლობის იდენტიფიცირებაში ან თავად სტრატეგიის შემუშავებაში. როგორც სტრატეგიის ექსპერტმა გარი ჰამელმა თქვა: „სტრატეგიის ინდუსტრიის ბინძური პატარა საიდუმლო ის არის, რომ მას არ აქვს სტრატეგიის შექმნის თეორია.“
ხარვეზის შევსების მიზნით, ეს სტატია წარმოგიდგენთ პოტენციური სტრატეგიების კატეგორიზაციას, რაც ეფუძნება სტრატეგიის/კრეატიულობის ლიტერატურის სიღრმისეულ ანალიზს. არსებითად, ყველა სტრატეგია იყოფა ოთხ ჯგუფად. მოდით, ნაკლებად კრეატიულებით დავიწყოთ.
თქვენი ინდუსტრიის წარმატებული სტრატეგიების ადაპტირება
ამ მიდგომის გამორჩეული მაგალითია Shein, ჩინური კომპანია, რომელმაც სწრაფი მოდის კონცეფცია კიდევ უფრო აასწრაფა. მიუხედავად იმისა, რომ ტრადიციული სწრაფი მოდის კომპანიები, როგორიცაა Zara და H&M, ყოველ კვირას 500-მდე ახალ ნივთს აწარმოებენ, Shein ყოველდღიურად აცნობს 1000 ახალ ნივთს. Shein-ის ნივთები ასევე 30-50%-ით იაფია, ვიდრე კონკურენტების მიერ შემოთავაზებული ალტერნატივები. ამ კომპანიებისგან განსხვავებით, Shein-ს არ აქვს მაღაზიები. ის ნივთებს ყიდის მხოლოდ აპლიკაციისა და ვებსაიტის საშუალებით. ასევე, ბევრად დიდი წილით ეყრდნობა ხელოვნურ ინტელექტს, როგორც ტენდენციების გამოსავლენად, ასევე წარმოების ოპტიმიზაციისთვის. 2020-დან 2022 წლამდე, Shein-ის წილი აშშ-ის სწრაფი მოდის ბაზარზე 18%-დან 40%-მდე გაიზარდა.
Rocket Internet კიდევ უფრო ექსტრემალური მაგალითია. ეს გერმანული კომპანია „შემოქმედებითად ჰბაძავს“ წარმატებულ ონლაინ საცალო რითეილერებსა და მარკეტფლეისებს. აქამდე მან 100-ზე მეტი ახალი კომპანია გახსნა. მათი უმეტესობა აქტიურია ლათინურ ამერიკაში, სამხრეთ-აღმოსავლეთ აზიაში, ინდოეთში, ჩინეთში, აფრიკასა და ახლო აღმოსავლეთში. მათ შორისაა Jumia, ონლაინ საცალო ვაჭრობა, რომელიც ამჟამად მუშაობს აფრიკის 11 ქვეყანაში. მიუხედავად იმისა, რომ მისმა ლიდერებმა შაბლონად გამოიყენეს Amazon-ის სტრატეგია, ისინი კარგად მოერგნენ აფრიკის ბაზრებს.
სხვა ინდუსტრიებიდან იმპორტის სტრატეგია
აღმასრულებლები და მეწარმეები იშვიათად იყურებიან თავიანთი ინდუსტრიის საზღვრებს მიღმა. არადა, სტრატეგია, რომელიც წაადგა შესაძლებლობის გამოყენებას ან საფრთხის განეიტრალებას სხვა ინდუსტრიაში, ხშირად შთაგონების წყარო შეიძლება იყოს. ანალოგიების გაკეთება ადვილია, როდესაც არსებობს ძლიერი მსგავსება ორ ინდუსტრიას შორის. როდესაც 2012 წელს Hubert Joly დაინიშნა Best Buy-ის აღმასრულებელ დირექტორად, ამერიკულ საცალო ვაჭრობას პრობლემები შეექმნა. მიუხედავად იმისა, რომ მომხმარებლები კვლავ სტუმრობდნენ მის მაღაზიებს, როგორც პროდუქტების შესახებ ინფორმაციისა და რჩევების მისაღებად, ისინი მაინც „ამაზონზე“ ყიდულობდნენ. Best Buy უნებლიედ გახდა Amazon-ის შოურუმი, რამაც გამოიწვია მისი შემოსავლებისა და მოგების მკვეთრი ვარდნა.
კომპანიამ გამოსავალს მაინც მიაგნო. იგი ეფუძნებოდა იმ შეხედულებას, რომ Best Buy იყო ერთადერთი სამომხმარებლო ელექტრონიკის საცალო ქსელი, რომელიც დარჩა აშშ-ში, Apple-გან განსხვავებით. ისეთ კომპანიებს, როგორიცაა Samsung, Microsoft, Hewlett-Packard, LG ან Sony, არ ჰქონდათ საკუთარი მაღაზიები, მაგრამ მათ სჭირდებოდათ ადგილი თავიანთი პროდუქციის გამოფენისთვის და მომხმარებლებთან ურთიერთობისთვის. „მაღაზია-მაღაზიაში“ – ამ კონცეფციამ მწარმოებლებს საშუალება მისცა, საფასურის სანაცვლოდ, Best Buy-ის ფილიალებში გაეხსნათ ბრენდირებული მაღაზიები.
სხვადასხვა ინდუსტრიის სტრატეგიების გაერთიანება
ხშირ შემთხვევაში, ახალი სტრატეგიები ასევე შეიძლება შეიქმნას სხვა სტრატეგიებიდან მიღებული დამატებითი ფუნქციების არსებულ სტრატეგიაზე დამატებით. ამის კარგი მაგალითია Spotify. 2008 წელს გაშვებულმა პლატფორმამ 2023 წელი 500 მილიონზე მეტი მომხმარებლით დახურა. ამით ხუთჯერ გადაუსწრო Apple Music-ს. სასურველი მუსიკის მიწოდების გარდა, შვედური სტრიმინგის კომპანია მომხმარებლებს საშუალებას აძლევს დაუკავშირდნენ სხვა მომხმარებლებსა და შემსრულებლებს. მათ შეუძლიათ გაეცნონ მუსიკას, რომელსაც მათი მეგობრები უსმენენ. ასევე, შეუძლიათ პლეილისტების გაზიარება და შემსრულებლების თვალყურის დევნება. სხვა სიტყვებით რომ ვთქვათ, Spotify-მ უბრალოდ გააერთიანა ჩვეულებრივი მუსიკის მოსმენა და სოციალური ქსელი ერთ სერვისში.
ნულიდან შექმნილი სტრატეგიები
ეს მოიცავს სამსაფეხურიან პროცესს: (1) არსებული აზროვნების გამოწვევა, (2) პრობლემების ფუნდამენტურ პრინციპებად დაყოფა (მათი ძირითადი ელემენტების ან ჭეშმარიტებების განსაზღვრა) და (3) ახალი გადაწყვეტილებების შექმნა ნულიდან. ილონ მასკმა კარგად გამოიყენა ეს პროცესი Space X-ის ხელმისაწვდომ და მრავალჯერად გამოყენებად რაკეტებზე. მისი თავდაპირველი გეგმა იყო მეორადი რაკეტების ყიდვა რუსეთში, მაგრამ ისინი ძალიან ძვირი ღირდა. პირველი პრინციპული აზროვნების გამოყენებით, მას გაუკვირდა, რატომ არის რაკეტები ასე ძვირი (ნაბიჯი 1). მათ კომპონენტებად დაყოფის შემდეგ მან შენიშნა, რომ მასალების ღირებულება მთლიანი ფასის მხოლოდ ორი პროცენტი იყო (ნაბიჯი 2). ამიტომ, მან გადაწყვიტა სასაქონლო ბაზარზე მასალების შეძენა (როგორიცაა ალუმინის შენადნობები, ტიტანის და ნახშირბადის ბოჭკოები) და საკუთარი რაკეტების აშენება (ნაბიჯი 3).
წყარო: HBR
