25
Jun
2019

3 რამ, რაც მარკეტერებმა 2019 წლის Cannes Lions-დან უნდა ისწავლონ

25 Jun 2019

2019 წლის კანის ლომების კრეატიული ფესტივალი დასრულდა. რამდენიმე დღის განმავლობაში, საფრანგეთის პატარა ქალაქ კანში მსოფლიოს საუკეთესო სარეკლამო ტვინები იყვნენ შეკრებილები, ერთმანეთს გამოცდილებასა და იდეებს უზიარებდნენ. რა შეიძლება ისწავლოს მარკეტერმა ამ დღეებიდან? ამის შესახებ ონლაინ გამოცემა Adweek წერს.

ფასეულობები, რომლებზეც ფესტივალზე იყო საუბარი, ზოგიერთი ბიზნესისთვის ჯერ კიდევ არ არის ორგანული ნაწილი. ყველა ვყოფილვართ მომხმარებლის ადგილას და ვიცით, როგორ გამოიყურება ცუდი მარკეტინგული ინსტრუმენტი და რამდენად მავნე გზავნილებს უშვებს, კომპანიის სახელით. სწორედ ამიტომ გახდა საჭირო, კიდევ ერთხელ გავიხსენოთ კანის წლევანდელი დღესასწაული და ვეცადოთ, კრეატიული ინდუსტრიის ამ უდიდესი მოვლენიდან რაღაც უფრო მეტი ვისწავლოთ.

ნუ იქნებით ხელოვნურები

მომხმარებლები სიყალბეს მაშინვე გრძნობენ. კანის ფესტივალზე, Unilever-ის გენერალურმა დირექტორმა, ალან ჯოპმა თქვა, რომ არ ივარგებს, თუკი საკითხის გარშემო ხმაურს ავტეხთ, საქმით კი, პრობლემის მოსაგვარებლად, არაფერს მოვიმოქმედებთ. მისი თქმით, ეს იქნება სერიოზული საფრთხე ჩვენი სფეროსთვის, რადგან ადამიანებს ნდობას დააკარგინებს. “მიზანმიმართული ბრენდები” “ავთენტურობა” – ეს ორი სიტყვა, ფესტივალის განმავლობაში, ხშირად ისმოდა სცენიდან. არსებობს რამდენიმე სტატისტიკური მიზეზი, რაც ამ ტენდენციებს ამყარებს: მომხმარებელთა 70% ენდობა რეკომენდაციას უფრო მეტად, ვიდრე ბრენდის რეკლამას. ამავდროულად, მილენიალთა 58% საერთოდ ვერ იტანს რეკლამას. იმაზე რომ არაფერი ვთქვათ, რომ კვლევების თანახმად, მილენიალების 84% რეკლამას არ ენდობა. სწორედ ამიტომ, “დაყენებული ხმით” შექმნილი რეკლამები სულ უფრო ნაკლებად მუშაობს.

სადაც კრიზისია, იქ შესაძლებლობაცაა. ეს ყველაზე თვალსაჩინოდ Nike-ის კამპანიამ Dream Crazy დაამტკიცა. ბრენდმა კარგად გამოიყენა კულტურულ ბაზარზე არსებული შანსი და თავისი მოწოდება ხმამაღლა გამოხატა. ეს გამბედაობა კარგადაც დაუფასდა, კამპანიამ კანის ლომებზე გრან პრი მოიპოვა. რეალურად, ამ კრიზისის ფონზე, “ნაიკის” გაყიდვები 31%-ით გაიზარდა.

ოდესღაც, კანის ფესტივალზე “სოციალური პასუხისმგებლობა” ცალკე კატეგორია იყო, წელს კი ასე აღარაა. თემა იმდენად ყოვლისმომცველი გახდა, რომ ცალკე კატეგორიას აღარ საჭიროებს. 

სტრატეგიის წამოწევა კომუნას სასარგებლოდ

ბოლო წლებში, როდესაც ციფრული რეკლამის წილი მნიშვნელოვნად იზრდება, საუბრების დიდი ნაწილი სწორედ ამ სფეროს შესაძლებლობებს ეთმობა. კანის ლომებზე ყურადღების დიდი ნაწილი ეთმობოდა იმას, რამდენად შეუძლია სოციალურ ქსელს ბრენდების კომუნას გაზრდა როგორც ონლაინ, ისე ოფლაინ. 

სოციალურმა ქსელებმა, მაგალითად, ფეისბუკმა, კანის ლომებზე ამის შესახებ ისაუბრა. გაზრდილი ნაკადი ზევით წევს ნავებსაც, სწორედ ამიტომ, მნიშვნელოვანია ადამიანების საერთო მოსაზრებების გარშემო გაერთიანება. 

მარკეტერებს შეუძლიათ ისწავლონ Able Gamers-ის ფონდის ისტორიიდან. ესაა შეზღუდული შესაძლებლობის მქონე გეიმერების ონლაინ კომუნა. მის წევრებს მობეზრდათ ისეთი ციფრული ინსტრუმენტების ნაკლებობა, რომლებიც ვიდეოთამაშებში დაეხმარებოდათ. მათ მისწერეს კომპიუტერული თამაშების მწარმოებლებს (მათ შორის, Microsoft), პასუხად კი მიიღეს კამპანია “თამაშის შეცვლა”, რომელიც სუპერთასზე იხილა მილიონობით მაყურებელმა. “მაიკროსოფტის” ამ კამპანიამ კანის ლომი მოიპოვა და დაამტკიცა, რომ ასეთ გაერთიანებებს ნამდვილად აქვთ ძალა.

შექმენით ადამიანური ექსპერიმენტები

ტექნოლოგიას შეუძლია რეკლამა და მარკეტინგი უფრო ჰუმანური და კრეატიული გახადოს. მაგალითად, ბურგერ კინგი, რომელმაც გრან პრი მოიგო მობილურის სახალისოდ გამოყენებაში. ამ ძალისხმევას საფუძვლად ედო ციფრული ინსტრუმენტები, მაგრამ მთელი შინაარსი შეიქმნა ადამიანურ ფაქტორზე დაყრდნობით.
ამას გარდა, Ikea-ს კამპანია ThisAbles, რომელმაც ასევე მოიგო გრან პრი ჯანდაცვის კატეგორიაში. ვიდეორგოლი ცერებრული დამბლის მქონე მამაკაცის – ელდარის – შესახებ გვიყვება, რომელსაც ტახტზე დაჯდომაც კი უძნელდება. Ikea-მ კაცის პრობლემა გადაწყვიტა მარტივად – დაამატა საყრდენი ტახტის ფეხებქვეშ, რომ ელდარს დისკომფორტი აღარ ჰქონოდა. ამ ტიპის პრობლემებს Ikea 3D პრინტერის საშუალებით ჭრის. ეს ტექნოლოგია მას 127 ქვეყანაში აქვს დანერგილი და მომხმარებლებს თავს ადამიანებად აგრძნობინებს.
ემპათია, ინკლუზიურობა და ავთენტურობა წლევანდელი კანის ლომების ძირითადი თემა იყო და სხვა წლებისგან განსხვავებით, მძაფრად იგრძნობოდა, რომ ეს თანდათანობით ხდება ბრენდების დნმ-ის განყოფელი ნაწილი.

 

წყარო: adweek



განხილვა