ინდოეთის კოსმოსური კვლევების ორგანიზაციამ (ISRO) 14 ივლისს მთვარისკენ კოსმოსური ხომალდი გაუშვა, რომელიც ჩვენი ბუნებრივი თანამგზავრის ორბიტაზე 5 აგვისტოს შევიდა და საოცარი კადრების გადაღებაც მოახერხა.
Chandrayaan-3 დასაშვები მოდულისა და მავალისგან შედგება, რაც ხომალდს საშუალებას მისცემს, 23 აგვისტოს მთვარის ზედაპირზე დაშვებაც ცადოს. თუმცა მანამდე ძრავებს რამდენჯერმე გაააქტიურებს, რათა წრიულ ორბიტაზე განლაგდეს — ასე ციური სხეულის ზედაპირისგან 100 კილომეტრით იქნება დაშორებული, რაც ოპტიმალურ მაჩვენებელს წარმოადგენს დაშვების შემდგომი მცდელობისთვის.
ახლა კი კოსმოსურმა ხომალდმა ორბიტიდან შთამბეჭდავი კადრები გადაიღო, რომლებზეც მთვარის კრატერიანი ლანდშაფტია ასახული.
