რამდენი ჯოხიანი კანფეტიც არ უნდა გამოიგონონ, ფერადი ლოლიპოპები, სახელად, „ჩუპა-ჩუპსი”, ლეგენდად დარჩება. წლების განმავლობაში ამ ფერადმა კანფეტებმა თაობების გული დაიპყრო. მათი ტკბილი ზედაპირის მიღმა დგას ისტორია, რომელიც ინოვაციებით, ამბიციებითა და ხელოვნებით არის შთაგონებული.
თანამედროვე ლოლიპოპის დაბადება
1950-იანი წლების დასაწყისში ენრიკ ბერნატმა დააარსა კომპანია „პროდუქტოს ბერნატი“, რომელიც სპეციალიზირებული იყო საკონდიტრო ნაწარმის წარმოებაზე. ბერნატმა მუშაობა დაიწყო ვაშლის მურაბის ქარხანაში, სახელწოდებით, „გრანჯა ასტურიასი“, რომლის წილიც მფლობელიც გახდა. რამდენიმე წელიწადში კი 100%-იანი წილიც ჩაიგდო ხელში.
Chupa Chups-ის ისტორია კი ესპანეთში 1958 წელს დაიწყო, როდესაც მეწარმე ენრიკ ბერნატს რევოლუციური იდეა გაუჩნდა – შეექმნა კანფეტი, რომელსაც მშობლები შვილებს სიამოვნებით აჭმევდნენ. იმ დროს ბევრი მშობელი ბავშვს კანფეტს არ ყიდულობდა იმის გამო, რომ წებოვანი იყო და ხელები ესვრებოდათ.
ზუსტად ეს იყო მიზეზი, რის გამოც ბერნატმა იფიქრა, რომ შეექმნა ტკბილეული ჯოხზე, რომლის ჭამაც მარტივად, სუფთად და უსაფრთხოდ შეიძლებოდა. რამდენიმე ექსპერიმენტის შემდეგ მან გამოუშვა „GOL“, რადგან ლოლიპოპის ჭამას გოლის გატანას ადარებდა. მართალია, ამ სახელწოდებამ არ გაამართლა, მაგრამ თვითონ კანფეტის კონცეფცია ხალხს მოეწონა.
მალე პროდუქტს სახელი შეეცვალა და Chupa Chups ეწოდა, რაც ესპანური ზმნიდან, „chupar“ მომდინარეობს და ქართულად „წოვას” ნიშნავს. ამ სახელწოდებას ხალისიანი ჟღერადობა ჰქონდა, რაც როგორც ბავშვებს, ასევე მშობლებს მოსწონდათ.
იმისთვის, რომ კონკურენცია შეემცირებინათ, მან 1959 წელს შეიძინა ესპანური პატენტები მსგავსი პროდუქტებისთვის.
ბრენდინგი სიურეალისტური შტრიხებით
როდესაც Chupa Chups-ის პოპულარობა გაიზარდა, ენრიკ ბერნატმა ბრენდინგის მნიშვნელობა გააცნობიერა. 1969 წელს მან გაბედული ნაბიჯი გადადგა, რამაც ბრენდის იდენტობა ათწლეულების განმავლობაში განამტკიცა: მან ლოგოს დიზაინი ლეგენდარულ სიურეალისტ მხატვარს, სალვადორ დალის შეუკვეთა.
დალიმ შექმნა გვირილის ფორმის ლოგო, რომელსაც დღეს უკვე ყველანი ვცნობთ. მის ცენტრში ბრენდის სახელი იყო ინტეგრირებული. მან შესთავაზა ლოგოს განთავსება შეფუთვის ზედა ნაწილში და არა გვერდითა მხარეს, რათა მაღაზიებში გამოფენისას ის ყოველთვის ხილული ყოფილიყო. ეს დეტალი, როგორც პრაქტიკული, ისე ელეგანტური გადაწყვეტა გახდა და ბრენდის ერთ-ერთ საფირმო ნიშნად იქცა.
ბრენდის ზრდა
1970-იან და 1980-იან წლებში Chupa Chups სწრაფად გაფართოვდა, თავდაპირველად, მთელ ევროპაში, შემდეგ კი მთელ მსოფლიოში. ბრენდმა გამოიყენა ჭკვიანური რეკლამა, პოპკულტურის ელემენტები და მისი სლოგანი „És rodó i dura molt, Chupa Chups“ („მრგვალი და გამძლეა, Chupa Chups“) საერთაშორისო დონეზეც ადაპტირდა.
1990-იანი წლებისთვის Chupa Chups-ის ლოლიპოპები 150-ზე მეტ ქვეყანაში იყიდებოდა. ბრენდმა ასევე მიიღო ცნობილი ადამიანების მხარდაჭერა, თანამშრომლობდა პოპ ვარსკვლავებთან და სპორტსმენებთან, გამოუშვა თემატური კოლექციები დისნეის, პოკემონის, Hello Kitty-ს და სხვა პერსონაჟების მონაწილეობით.
გლობალურ ასპარეზზე გასვლა
2006 წელს კომპანია Chupa Chups შეიძინა იტალიურ-ჰოლანდიურმა საკონდიტრო გიგანტმა Perfetti Van Melle, რომელიც ასევე ფლობს ისეთ ბრენდებს, როგორიცაა Mentos და Alpenliebe. ამ შენაძენმა Chupa Chups-ს საშუალება მისცა, კიდევ უფრო გაეფართოებინა თავისი მასშტაბები და გაეგრძელებინა ახალი არომატებისა და ფორმის შემუშავება.
Perfetti Van Melle-ს ხელმძღვანელობით, Chupa Chups-მა შეინარჩუნა თავისი ძირითადი იდენტობა თანამედროვე ტენდენციებთან ადაპტაციის პარალელურად. მან შეიმუშავა მდგრადი განვითარების მცდელობები, შეზღუდული გამოშვების არომატები და თანამშრომლობა მოდისა და ცხოვრების წესის ინდუსტრიებში.
უბრალოდ ლოლიპოპზე მეტი
დღეს Chupa Chups უბრალოდ ტკბილეულზე მეტიამისი ლოგო, რომელიც თავდაპირველად სიურეალისტმა ოსტატმა შექმნა, ახლა ყველაფერზეა გამოსახული, მაისურებიდან და ტელეფონის ქეისებიდან დაწყებული, მაკიაჟის ხაზებითა და სპორტული ფეხსაცმლით დამთავრებული. თავისი ისტორიის განმავლობაში 100-ზე მეტი არომატი შექმნა – კლასიკური მარწყვით დაწყებული ეგზოტიკურ კოლამდე ან მანგოს იოგურტით დამთავრებული, Chupa Chups აგრძელებს განვითარებას და ამავდროულად ერთგულია თავისი ხალისიანი, ბავშვური სულისკვეთების.
კანფეტი, რომელიც სულ თავიდან გამოჩნდა, როგორც ბავშვების გაწებილი თითების გადაწყვეტა, მოგვიანებით გართობის, კრეატიულობისა და სიტკბოს სიმბოლოდ იქცა. Chupa Chups უბრალოდ ტკბილეული არ არის, ის თაობებსა და კონტინენტებს მოიცავს. ინოვაციის, ჭკვიანური მარკეტინგისა და სიურეალიზმის წყალობით, Chupa Chups-მა თავისი ადგილი დაიმკვიდრა გლობალური ბრენდების პანთეონში.
ბიზნესისტორიებს წარმოგიდგენთ „ალიანს ჯგუფი”.
