მცირე და საშუალო მეწარმეობა საქართველოს ეკონომიკური განვითარებისა და მოქალაქეთა ცხოვრების სტანდარტის ზრდისთვის უმნიშვნელოვანესი მიმართულებაა, კავკასიის საერთაშორისო უნივერსიტეტის (CIU) ბიზნესისა და ტექნოლოგიების ფაკულტეტი კი მეწარმეობის მიმართულებით აქტიური საგანმანათლებლო თუ სამეცნიერო აქტივობებით გამოირჩევა. სწორედ მეწარმეობაზე დაფუძნებული სწავლება იქცა უნივერსიტეტის ერთ-ერთ მთავარ პრიორიტეტად, რომელიც ყოველდღიურ საქმიანობასა და სპეციალურად ორგანიზებულ მასშტაბურ ღონისძიებებში გამოიხატება. სწორედ ამის ნაწილია სამეცნიერო კონფერენცია ინოვაციებისა და მეწარმეობის შესახებ, რომელში მონაწილეობაც ნებისმიერ მსურველს შეუძლია — როგორც კერძო და საჯარო სექტორის წარმომადგენლებს, ისე დარგობრივ გაერთიანებებს, ასოციაციებს თუ საერთაშორისო პარტნიორებს. თანაც კონფერენცია ევროპელ პარტნიორ უნივერსიტეტებთან ერთად ტარდება და ეს კიდევ უფრო გამოკვეთს მის მნიშვნელობას, მასშტაბებსა და პერსპექტივებს.
აღნიშნული ღონისძიება 9-11 თებერვალს გაიმართება — მისი მიზანია, ხელი შეუწყოს ინოვაციების და მეწარმეობის შესახებ უახლესი სამეცნიერო კვლევების განვითარებას და ინტერნაციონალიზაციას საქართველოში; ასევე, აკადემიურ, საჯარო და ბიზნესსექტორს შორის თანამშრომლობის გაღრმავებას და მის პოპულარიზაციას ახალგაზრდა მეცნიერებს შორის.
ამ ეტაპზე CIU-მ მონაწილეთა შერჩევა დაიწყო — პროცესი 2024 წლის 8 იანვრამდე გაგრძელდება, მსურველები კი რეგისტრაციისა და კონფერენციის შესახებ დეტალური ინფორმაციის მისაღებად ეწვიეთ ბმულს.
აქვე გაითვალისწინეთ, კონფერენციაში მონაწილეობის მიღება შეუძლიათ უნივერსიტეტების აკადემიურ და სამეცნიერო პერსონალს, საჯარო და კერძო სექტორში დასაქმებული ექსპერტებს, სამაგისტრო და სადოქტორო საფეხურის სტუდენტებს, ახალგაზრდა მეცნიერებს და ინოვაციების და მეწარმეობის შესახებ ინტერსექტორული თანამშრომლობით დაინტერესებულ პროფესიონალებს.
რა სარგებელი ექნებათ მონაწილეებს?
შერჩეული მომხსენებლების სტატიები გამოქვეყნდება კავკასიის საერთაშორისო უნივერსიტეტის ონლაინ ჟურნალში — „საერთაშორისო ჟურნალი სოციალურ მეცნიერებებში“, რომელიც არის ორმაგად ანონიმურად რეფერირებადი, ფინანსდება უნივერსიტეტის მიერ და ღია წვდომაშია. ამასთანავე, Crossref-ის წევრია, სტატიებს ენიჭება DOI და ხილვადია google scholar-ში.
თანაც, კონფერენციისთვის გამოუშვებენ „სპეციალურ გამოცემას“ — ის სრულად მიეძღვნება ინოვაციებისა და მეწარმეობის შესახებ განხორციელებულ კვლევებს. ხოლო სტატიები წარმოდგენილი იქნება ორ ენაზე: ქართულად და ინგლისურად.
ღონისძიების ძირითადი დეტალები:
ღონისძიებაზე შესაძლებელია, წარმოდგენილი იქნას პანელური მოხსენება, პოსტერით პრეზენტაცია და ვიდეო პრეზენტაცია (წინასწარი ჩანაწერი) პირდაპირი კითხვა-პასუხის სესიით კონფერენციის მიმდინარეობისას. ვიდეო პრეზენტაცია უნდა იყოს მაღალი ხარისხის, არაუმეტეს 7 წუთის ხანგრძლივობის.
კონფერენციის ძირითადი სექციები: მეწარმეობის განვითარების თანამედროვე მიდგომები და პრაქტიკული გამოწვევები; სამეწარმეო უნივერსიტეტის განვითარების საუკეთესო პრაქტიკა და შემაფერხებელი გარემოებები; რადიკალური და ინკრემენტალური ინოვაციები მეწარმეობაში; ინოვაციები, ტექნოლოგიების ტრანსფერი და ტექნოლოგიური მეწარმეობის განვითარება; მეწარმეობის მასშტაბირება და ინტერნაციონალიზაცია.
კონფერენციის პირველი დღე გაიმართება სასტუმრო ბილტმორში, თბილისში. კონფერენციის მეორე დღე გაიმართება კავკასიის საერთაშორისო უნივერსიტეტში, თბილისში. კონფერენციის მესამე დღეს ღონისძიებას უმასპინძლებს იაკობ გოგებაშვილის სახელობის თელავის სახელმწიფო უნივერსიტეტი (თესაუ) თელავში, სადაც ასევე დაგეგმილია ექსკურსია ისტორიული ღირსშესანიშნაობების დასათვალიერებლად და საზეიმო ვახშამი.
პროექტი დაფინანსებულია შოთა რუსთაველის საქართველოს ეროვნული სამეცნიერო ფონდის მიერ. კავკასიის საერთაშორისო უნივერსიტეტი არის ღონისძიების მასპინძელი, პროექტის წამყვანი და თანადამფინანსებელი ორგანიზაცია.
თანამონაწილე ორგანიზაციების სახით ჩართულები არიან: ალკალას უნივერსიტეტის მეწარმეობის სკოლა (ესპანეთი) და დეგენდორფის ტექნოლოგიების ინსტიტუტი (გერმანია); პროექტის პარტნიორები არიან: სააგენტო „აწარმოე საქართველოში“, მცირე და საშუალო მეწარმეობის განვითარების ასოციაცია (SMEDA), გაეროს გლობალური შეთანხმების საქართველოს ქსელი — Network Georgia, ფინანსური განათლების პორტალი — ფინედუ და იაკობ გოგებაშვილის სახელობის თელავის სახელმწიფო უნივერსიტეტი.
კონფერენციის პლენარული მომხსენებლები არიან: მარიკა კლდიაშვილი PhD, PMP, SFLBA, ACC, CSSYB; პროექტის ხელმძღვანელი, CIU-ს ბიზნესისა და ტექნოლოგიების ფაკულტეტის დეკანი და ასოცირებული პროფესორი, მართვის აკადემიის ინოვაციების დირექტორი, ცვლილებების მართვის ქოუჩი; ალენ ფეიოლი – მეწარმეობის პროფესორი, IDRAC ბიზნესსკოლა (საფრანგეთი) და CREA კალიარის უნივერსიტეტი (იტალია), მოწვეული პროფესორი, ტურკუს ეკონომიკის სკოლა (ფინეთი), IFAG-ის მენეჯმენტისა და მეწარმეობის სკოლის სტრატეგიული კომიტეტის თავმჯდომარე; მარიბელ გერერო – ასოცირებული პროფესორი, საზოგადოებრივ საქმეთა სკოლა, ტექნოლოგიების ტრანსფერის გლობალური ცენტრი, არიზონას სახელმწიფო უნივერსიტეტი (აშშ), აფილირებული წევრი CIRCLE – ინოვაციების კვლევის ცენტრი, ლუნდის უნივერსიტეტი (შვედეთი), მეწარმეობის პროფესორი, ბიზნესისა და ეკონომიკის სკოლა, დეზარლოს უნივერსიტეტი (ჩილე), “გლობალური მეწარმეობის მონიტორი (GEM) ჩილეს” დირექტორი; ფერნანდო კრესენტე რომერო – პროფესორი ბიზნესის ორგანიზაციის მიმართულებით, ეკონომიკის ბიზნესისა და ტურიზმის ფაკულტეტი, ალკალას უნივერსიტეტი (ესპანეთი), მეწარმეობის სკოლის დირექტორი, ალკალას უნივერსიტეტი (ესპანეთი).
[R]
