ბოლო წლებში, რაც მარკეტინგის ბიუჯეტი უფრო მკაცრ კონტროლს ექვემდებარება, განსაკუთრებით გააქტიურდა დისკუსია CMO-სა (Chief Marketing Officer) და CFO-ს (Chief Financial Officer) ურთიერთობაზე. ახალი კვლევის მიხედვით, რომელიც Perion-მა და Advertiser Perceptions-მა ჩაატარეს, მარკეტერების მხოლოდ მცირე ნაწილი, დაახლოებით 22% თვლის, რომ საკმარისი მონაცემი აქვს CFO-სთვის მარკეტინგის ღირებულების დამტკიცებისთვის. ეს ერთ-ერთი მთავარი გამოწვევაა, რომელიც იწვევს სტრესს, გაუგებრობას და ზოგჯერ სტრატეგიული გადაწყვეტილებებიც ამის გამო ჭიანურდება.
კვლევა ჩატარდა 2025 წლის აგვისტო-სექტემბერში და მოიცავდა აშშ-სა და კანადაში მოქმედ 167 მარკეტერს, რომლებიც წლიურად მინიმუმ 1 მილიონ დოლარს ხარჯავენ რეკლამაში. მათი უმრავლესობა ვიცე-პრეზიდენტის ან უფრო მაღალი პოზიციის მქონე ადამიანები იყვნენ.
კვლევის მიხედვით, მარკეტინგისა და ფინანსების ერთობლივი მიზანი, კომპანიის ზრდა, ერთი შეხედვით მარტივია, მაგრამ მათი ხედვები ამ მიზნის მიღწევის გზებზე მნიშვნელოვნად განსხვავდება. CMO-ები ყურადღებას ამახვილებენ შემოსავლის ზრდასა და სტრატეგიულ ინვესტირებაზე, CFO-ების პრიორიტეტი კი არის მოგება, ხარჯების ოპტიმიზაცია და პროგნოზირებადობა.
სირთულეს განსაკუთრებულად აძლიერებს თანამედროვე მედიაგარემო: მომხმარებლის ქცევა სწრაფად იცვლება, არხები ფრაგმენტირებულია და კამპანიების შედეგების სრული სურათის აღქმა სულ უფრო რთულდება. ამის გამო ხშირად ბუნდოვანი ხდება, რა არის „წარმატება“ და რა ქმნის რეალურ ბიზნესშედეგს.
კვლევის ერთ-ერთი ყველაზე შემაშფოთებელი მიგნება იყო ის, რომ მარკეტერების მხოლოდ 21% მუშაობს CFO-სთან ბიუჯეტებსა და მეტრიკებზე „სრულ თანხვედრაში“. მიუხედავად ამისა, მათი 62% ამბობს, რომ CFO მარკეტინგს მაინც აღიქვამს შემოსავლის მომტან სფეროდ, ოღონდ იმ პირობით, რომ მარკეტინგის გუნდი შეძლებს ამის დამტკიცებას.
საბოლოოდ, CFO-სთვის ყველაფერს განისაზღვრება მონაცემებით: რა არის გამჭვირვალე და რა შეიძლება დაფუძნდეს ფაქტებზე. სწორედ აქ ჩნდება მთავარი წინააღმდეგობა: რეკლამისა და მარკეტინგის ბევრი ტექნოლოგია ერთმანეთთან არ არის ინტეგრირებული, რის გამოც გუნდისთვის რთულია ერთიანი სურათის წარმოდგენა. მარკეტერების 70% ამბობს, რომ პლატფორმებს შორის მონაცემების ფრაგმენტაცია სერიოზული ბარიერია. ზოგიერთ ორგანიზაციაში კი (დაახლოებით 7%) საერთოდ ვერ ახერხებენ კამპანიების საერთო შედეგების მონიტორინგს. ეს პირდაპირ აისახება მარკეტინგის უნარზე, დაამტკიცოს საკუთარი მნიშვნელობა.
მონაცემების არათანმიმდევრულობას მნიშვნელოვანი გავლენა აქვს: ვინც ერთიან სისტემას არ იყენებს, აღიარებს, რომ ეს ნეგატიურად აისახება CFO-სთვის შედეგების დამტკიცებაზე. 21% კიდევ უფრო მკაცრად აფასებს სიტუაციას და აცხადებს, რომ შეუსაბამობა „სერიოზულად“ აფერხებს მათ მუშაობას.
სრულიად განსხვავებული სურათია ორგანიზაციებში, სადაც მონაცემები გაერთიანებულია: იქ მარკეტერების 97% ამბობს, რომ CFO-სთან ხედვები და მეტრიკები თანხვედრაშია, ხოლო იმ კომპანიებში, სადაც მონაცემები სხვადასხვა პლატფორმაზეა გაფანტული, ეს თანხვედრა მხოლოდ 63%-ამდე ჩამოდის.
ეს განსხვავება ცხადყოფს, რომ მარკეტინგისა და ფინანსების თანამშრომლობა მკაფიო, ერთიანი მონაცემების გარეშე თითქმის შეუძლებელია. როცა აქციონერებს, მენეჯმენტს და ფინანსურ გუნდს სჭირდებათ სწრაფი, ზუსტი, გასაგები ინფორმაცია – ფრაგმენტირებული სისტემები დიდ დაბრკოლებას ქმნის.
კვლევის ავტორების თქმით, მიუხედავად იმისა, რომ CMO-CFO ურთიერთობა ბოლო წლებში მნიშვნელოვნად განვითარდა, ბევრი მარკეტინგი მაინც „ბნელ ოთახში მუშაობს“ – ერთიანი, სანდო მონაცემების გარეშე. და სანამ ეს პრობლემა არ მოგვარდება, მარკეტინგისთვის რთული იქნება არა მხოლოდ ბიუჯეტის დაცვა, არამედ გადაწყვეტილებების მიღება, ინვესტიციების გამართლება და სტრატეგიული როლის გაღრმავება ორგანიზაციაში.
წყარო: marketingdive
