გამჭვირვალე ნივთების აღება რთული გამოწვევაა, მაშინ, როცა რობოტი ხარ. ტრადიციული კამერებისა და სენსორების დიდი ნაწილი ვერ იღებს გამჭვირვალე საგნის ადგილმდებარეობასთან დაკავშირებულ, საკმარისად კარგ ინფორმაციას. სწორედ ამიტომ, რთულია რობოკიდურებში მოთავსებულმა ამ სენსორებმა სწორად უკარნახონ რობოტს, როგორ იმოქმედოს იმისათვის, რომ გამჭვირვალე ნივთი აიღოს. ინფრაწითელი კამერების ნათება გამჭვირვალე ობიექტს გაივლის, ხოლო სიღრმის კამერებს უჭირთ მისი ზუსტი ფორმის დადგენა, რადგან მათ აღქმისთვის გაუმჭვირვალე ობიექტი სჭირდებათ.
ეს პრობლემა სხვადასხვა მიმართულებით წარმოშობს დაბრკოლებას. მაგალითად, ზუსტად ამ დეტალის გამო, ვერ ვიფიქრებთ რობოტების ნარჩენების გადამუშავების კუთხით დასაქმებაზე, რადგან პლასტმასას თუ შუშის ბოთლების დიდი ნაწილი გამჭვირვალეა. თუმცა, კარნეგი მელონის უნივერსიტეტის (აშშ) მიერ გამოქვეყნებული ახალი კვლევის შედეგის შესაბამისად, ამ პრობლემის გამოსწორების ახალი მეთოდი გვაქვს.
მკვლევართა გუნდმა შექმნა კამერა, რომელიც მანქანური დასწავლის მეთოდების გამოყენებით, ფერებს ერთმანეთს ადარებს და ამ გზით ცდილობს გამჭვირვალე ნივთის ფორმის აღქმას. უფრო კონკრეტულად, მაგალითად, რობოკიდური რომ მივმართოთ მაგიდისკენ, სადაც სრულიად გამჭვირვალე პლასტმასას ბოთლი დევს, ამ კამერის დახმარებით, ის შეისწავლის მაგიდის ფერს და იმ განსხვავებას, რომელსაც ამ ფერის ფონში გამჭვირვალე ნივთის მოთავსება ქმნის. ამ გზით, კამერა შეძლებს ბოთლის ადგილმდებარეობის იდენტიფიცირებას.
ჯერჯერობით, ეს მეთოდი საკმაოდ ახალია და არც ისე მაღალი სიზუსტით გამოირჩევა. თუმცა, როგორც კვლევის ავტორები ამბობენ, მას შეუძლია სუფთა ზედაპირებიდან გაცილებით მაღალი ეფექტურობით აიღოს გამჭვირვალე საგნები, ვიდრე წინამორბედ მეთოდებს, რომლებიც ამ პრობლემის გადაჭრას ცდილობდნენ. უფრო მეტი ინფორმაცია ამ სიახლის შესახებ რობოტიკის კონფერენციაზე გაჟღერდება, რომელიც მიმდინარე ზაფხულს გაიმართება.
