Coca-Cola-მ თავისი საკულტო ბოთლი ნუდლსის ჩხირებად აქცია

იმისთვის, რომ სასადილო მაგიდასთან საკუთარი ადგილი დაემკვიდრებინა, Coca-Cola თავად გახდა ამ გამოცდილების ნაწილი. ბრენდმა თავისი ცნობილი კონტურული ბოთლის დიზაინი ჩხირების ფორმად გარდაქმნა და მსოფლიოში ერთ-ერთი ყველაზე ცნობადი შეფუთვა ახალი დანიშნულებით გამოიყენა – ნუდლსების შესაჭმელად.

Coca-Cola-მ სააგენტო Ogilvy-სთან თანამშრომლობით შექმნა CokeSticks, უჟანგავი ფოლადისგან დამზადებული ჩხირები, რომლებიც განსაკუთრებით სამხრეთ-აღმოსავლეთ აზიის ბაზრებისთვის შეიქმნა.

კამპანიის იდეა მარტივი დაკვირვებიდან დაიბადა: მიუხედავად იმისა, რომ Coca-Cola რეგიონში ფართოდ არის ხელმისაწვდომი, ყოველდღიური კვების დროს ის ყოველთვის არ არის მომხმარებლების პირველი არჩევანი. ამის საპირისპიროდ, ჩხირები ადგილობრივი კვების კულტურის განუყოფელი ნაწილია და თითქმის ყველა სუფრაზე გვხვდება.

სწორედ ამიტომ, კომპანიამ გადაწყვიტა, თავისი ყველაზე ცნობილი დიზაინი, კონტურული ბოთლი, სასადილო გამოცდილების ნაწილად ექცია.

Coca-Cola-ს საკულტო ბოთლი 1915 წელს შეიქმნა. მისი დიზაინის მიზანი იყო, ბოთლი ცნობადი ყოფილიყო მაშინაც კი, თუ დაზიანდებოდა ან სიბნელეში მოხვდებოდა. დროთა განმავლობაში მისი გამორჩეული სილუეტი ბრენდინგის ისტორიაში ერთ-ერთ ყველაზე ცნობად ვიზუალურ ელემენტად იქცა.

CokeSticks ამ მემკვიდრეობას ახალ დონეზე ავითარებს და აჩვენებს, რომ ბოთლის ფორმა მხოლოდ შეფუთვა აღარ არის, ის დამოუკიდებელ დიზაინერულ სიმბოლოდაც შეიძლება არსებობდეს.

ჩხირები საკვებისთვის უსაფრთხო, უჟანგავი ფოლადისგან დამზადდა. დიზაინერებმა ბოთლის დამახასიათებელი მოყვანილობა ისე მოარგეს ჩხირების ფორმას, რომ მათი გამოყენება პრაქტიკული და კომფორტული დარჩენილიყო. შედეგად, პროდუქტი ერთდროულად ინარჩუნებს Coca-Cola-ს ვიზუალურ იდენტობას და სრულად ასრულებს ტრადიციული ჩხირების ფუნქციას.

პროექტის გავრცელება, ძირითადად, სამხრეთ-აღმოსავლეთ აზიის რესტორნებსა და საკვების მიტანის სერვისებს მოიცავდა. კამპანიის მონაცემებით, CokeSticks-მა უშუალოდ 88 000-ზე მეტ მომხმარებლამდე მიაღწია, ხოლო გარე რეკლამებისა და დამატებითი აქტივობების დახმარებით მისი აუდიტორია დაახლოებით 700 000 ადამიანამდე გაიზარდა.

კამპანიის მთავარი მიზანი იყო, Coca-Cola მხოლოდ სასმელად არ აღქმულიყო და ბრენდი სადილობის გამოცდილების ორგანულ ნაწილად ქცეულიყო.