ალბათ, ბავშვობაში ყველას წარმოგვიდგენია ჯადოსნური ჩრდილოეთ პოლუსი, სადაც სანტა კლაუსი თავის მისის კლაუსთან და ელფებთან ცხოვრობს. მთელი წლის განმავლობაში კი საახალწლო ფუსფუსში არიან ჩართულნი… ასაკის მატებასთან ერთად, ეს წარმოდგენა ნელ-ნელა ქრება, ზრდასრულობის ელფერი ედება და მხოლოდ გულის სიღრმეში ვიტოვებთ მცირეოდენ იმედს — იქნებ, მართლა არსებობს…
თუმცა Coca-Cola-ს წლევანდელმა საშობაო რეკლამამ რეალობისა და ჯადოსნურობის განსხვავებული პერსპექტივა დაგვანახა. „ჩვენთვის სანტას სულიერი თუ ქცევითი გამოვლინებები ყველაზე მნიშვნელოვანია — სიკეთის, კეთილშობილებისა და კეთილგანწყობის თვალსაზრისით“.
ვინაიდან ეს თვისებები ადამიანებისთვის კარგად ნაცნობია, კოკა-კოლამ „უბრალო მოკვდავები“ სანტა კლაუსებად წარმოადგინა. ბრენდი ემოციურად ამტკიცებს, რომ ყოველი ჩვენგანი სანტაა. მცირე თუ დიდი ქმედებებით ერთმანეთს ვუკეთებთ საჩუქრებს, ერთმანეთს ვეხმარებით და ყოველდღიურობას განსაკუთრებულ მაგიურობას ვძენთ.
