24
დეკ
2017

როგორ დავაბალანსოთ კომპანიის სტრატეგია და მიზანი?! – მსოფლიო ბრენდების გამოცდილება

24 დეკ 2017

კომპანიების უმეტესობას მკაცრად აქვს განსაზღვრული მთავარი მიზანი. მათ ზუსტად იციან, რისთვის არსებობენ და საით მიდიან. თუმცა, ძალიან ცოტა ორგანიზაცია აქცევს ამ მიზანს რეალობად.

statiebi-bog
statiebi-bog

 

განვიხილოთ Nokia-ს „ქეისი“, რომელიც iPhone-ის გამოჩენამდე (2007), ბაზრის დომინანტი კომპანია იყო, ჰქონდა მკაფიოდ გამოხატული მიზანი – Connecting People და  საკმაოდ „აგრესიული“ სტრატეგიით ვითარდებოდა – აერთიანებდა 100-ზე მეტ „სტარტაპს“. მარტო 2006 წელს მან მობილური ტელეფონის 39 მოდელი გამოუშვა. მაშინ, ალბათ, ვერავინ წარმოიდგენდა, რომ მსგავსი რესურსებისა და განვითარების ამ საფეხურზე მყოფი კომპანია ასე „ჩამოიშლებოდა“.

არა და, პერსპექტივაში, ასეთი დასასრული გარდაუვალი იყო. Nokia იმდენად „გართული“ იყო საკუთარი სტრატეგიის შესრულებით, რომ საერთოდ დაავიწყდა მთავარი მიზანი. როდესაც სტივ ჯობსმა iPhone-ის პირველი მოდელი წარადგინა, რომელიც უბრალო და ძალიან ადვილი გამოსაყენებელი იყო, Apple-მა დაიწყო ადამიანების ერთმანეთთან დაკავშირება და ეს იყო აბსოლუტურად ახალი საფეხური. ასე „დააკოპირა“ და პრაქტიკაში გადმოიტანა ბრენდმა „ნოკიას“ მთავარი იდეა – Connecting People, მაგრამ იმ განსხვავებით, რომ Apple-მა მოახერხა მთავარ მიზანსა და სტრატეგიის განხორციელებას შორის ბალანსის დაცვა. ერთ დროს დომინანტმა „ნოკიამ“ ბაზარის წილის უდიდესი ნაწილი დაკარგა და საბოლოოდ Microsoft-ს შეუერთდა.

სამწუხაროდ, Nokia ერთადერთი არაა. ისტორია მრავლად იცნობს ასეთ შემთხვევებს. მაგალითად, წიწაკით მოვაჭრე ერთ-ერთი კომპანია უკეთესი კონკურენტის გამო კი არ „ჩაიძირა“, უბრალოდ, ორგანიზაცია ერთ ადგილზე გაიყინა. შედეგად, მნიშვნელობა აღარ ჰქონდა, რამდენად აწყობილი და ეფექტური იყო ამ კომპანიის ბაზარზე მიწოდების ჯაჭვი, რამდენად ელიტარული მომხმარებელი ჰყავდა ან როგორი ხარისხის იყო მათი პროდუქტი. მთავარი ის გახლდათ, რომ „მოწინააღმდეგემ“ ისარგებლა წიწაკის კომპანიის ადგილზე „გაყინვით“ და მისი მიზანი პრაქტიკაში „დააკოპირა“. ამიტომ წინა კომპანიის ყველა ძლიერმა მხარემ აზრი დაკარგა.

იმისთვის, რომ კომპანია დაიცვათ, სტრატეგია ერთ-ერთი სამუშაო „იარაღი“ უნდა იყოს და არა მთავარი ამოსავალი წერტილი. ის აუცილებლად განსაზღვრულ დროზე უნდა გაითვალოს და ჰქონდეს შედეგზე ორიენტირებული მიზანი. მთავარი მიზანი, პირიქით, კონრეტულ დროზე კი არა, კომპანიის გრძელვადიანი არსებობისთვის უნდა მოიაზრებოდეს. სტრატეგია კომპანიის მთავარი მიზნის კონცეფციის ციფრებში გამოხატვის მხოლოდ ერთი ნაწილია.

ცნობილი  კომპანიების მაგალითზე, რომელთა ნაწილი სწორად განვითარდა, ნაწილი კი ბაზარზე ახალმა მოთამაშემ ჩაანაცვლა, სპეციალისტები რამდენიმე მნიშვნელოვან ფაქტორს გამოყოფენ და რეკომენდაციას აძლევენ იმ ორგანიზაციებს, რომელთაც წარმატების მიღწევა სურთ:

ყოველთვის გახსოვდეთ მთავარი მიზანი !

ეცადეთ, დაიცვათ ოქროს შუალედი მთავარ მიზანსა და სტრატეგიას შორის !

განავითარეთ შიდა კორპორატიული „მოქნილობა“ !

გახსოვდეთ, ორგანიზაციას სჭირდება კონცეფციის რიცხობრივად განსაზღვრა !

 

წყარო: hbr.org (Harvard Business Review)



განხილვა