როგორ ჩავატაროთ სამსახურის გასაუბრებები, როცა ამის გამოცდილება არ გვაქვს

თუ არასდროს გაგივლიათ გასაუბრება და ახლა გიწევთ ამის გაკეთება, ნუ ინერვიულებთ. ნებისმიერი სხვა უნარის მსგავსად, ამის დაუფლებაც შესაძლებელია პრაქტიკით.

გაიგეთ კონტექსტი

გასაუბრებამდე, ორი კონტექსტი უნდა გაითვალისწინოთ: სამუშაოს კონტექსტი (რას ეძებენ კონკრეტულად ამ პოზიციისთვის?) და კანდიდატის კონტექსტი (მათი გამოცდილებისა და წარსულის გათვალისწინებით, რის შესახებ გსურთ მეტის გაგება?). მოდით, უფრო დეტალურად განვიხილოთ თითოეული.

სამუშაოს კონტექსტი

გაეცანით სამუშაოს აღწერილობას, ძირითად პასუხისმგებლობებს და პოზიციისთვის საჭირო უნარებს. რა არის საჭირო კანდიდატის წარმატებისთვის? რომელი უნარებია აუცილებელი და რომელია „სასურველი“? სად შეგიძლიათ კომპრომისზე წასვლა და სად არა? რომელი დავალებების ან პასუხისმგებლობების სწავლება შეგიძლიათ სამუშაო პროცესში და რა გამოცდილება უნდა ჰქონდეთ პირველივე დღიდან?

მაგალითად, პოზიციის მიხედვით, შეიძლება გჭირდებოდეთ ვინმე, ვინც კონკრეტული პროგრამირების ენის ექსპერტია. თუმცა, სხვა უნარები, როგორიცაა Excel-ის ან Google Analytics-ის ცოდნა, შეიძლება ნაკლებად მნიშვნელოვანი იყოს მათი უშუალო სამუშაოსთვის და შესაძლებელია მათი სწავლება სამუშაო პროცესში.

აპლიკანტის კონტექსტი

გადახედეთ კანდიდატის რეზიუმეს და მონიშნეთ ნებისმიერი სფერო, რომლის შესახებაც გსურთ მეტი ინფორმაციის მიღება გასაუბრების დროს. არის რაიმე წინა გამოცდილება, უნარები ან მნიშვნელოვანი პროექტები, რომელთა შესახებაც მეტის გაგება გსურთ? არის რაიმე უნარი, რომლის შესახებაც მეტის მოსმენა გსურთ?

მოამზადეთ კითხვები გასაუბრებისთვის

თქვენი HR ხელმძღვანელი, სავარაუდოდ, მოგაწვდით კითხვებს გასაუბრებისთვის. ზოგ შემთხვევაში, შეიძლება ერთადაც მუშაობდეთ მათ შედგენაზე. ნებისმიერ შემთხვევაში, დარწმუნდით, რომ გაქვთ კითხვების მრავალფეროვანი ნაზავი, რომელიც პოზიციაზეა მორგებული. უმეტეს პოზიციას სჭირდება როგორც მყარი, ასევე რბილი უნარები.

სრულყოფილი ინფორმაციის მისაღებად, მნიშვნელოვანია კონკრეტული მაგალითები. მაგალითად, თუ გსურთ გაიგოთ კანდიდატის კონფლიქტის მართვის უნარების შესახებ, შეგიძლიათ ჰკითხოთ: „გაიხსენეთ მომენტი, როდესაც რთული საუბარი გქონდათ კოლეგასთან. როგორ მოიქცეით?“.

რაც შეეხება სამუშაოს უფრო ტექნიკურ ასპექტებს, დასვით კითხვები სამუშაოს შესასრულებლად საჭირო კონკრეტული ინსტრუმენტების ან უნარების შესახებ. მაგალითად, თუ პროგრამისტს ესაუბრებით, შეგიძლიათ სთხოვოთ ჩამოთვალონ იმ პროგრამირების ენის შეზღუდვები, რასაც იყენებენ. თუ კონტენტის სტრატეგს ქირაობთ, შეგიძლიათ სთხოვოთ აღწერონ, რა ინსტრუმენტებს იყენებენ თავიანთი სამუშაოს შედეგების გასაზომად.

ჩაატარეთ საცდელი გასაუბრება

ჩვეულებრივ, წინასწარ გავარჯიშებას სამსახურის კანდიდატებს ურჩევენ, მაგრამ თქვენც, როგორც გამსაუბრებელს, ასევე შეგიძლიათ ისარგებლოთ ამ პრაქტიკით. კარგი იქნება როლური თამაში სანდო კოლეგასთან ან თქვენი ტალანტების მოზიდვის გუნდის რეკრუტერთან.

სთხოვეთ მეორე პირს მოულოდნელი ან გამომწვევი პასუხების გაცემა. ეს დაგეხმარებათ იმპროვიზაციის, საჭიროების შემთხვევაში უფრო ღრმად ჩაძიების და საუბრის სწორ გზაზე დაბრუნების პრაქტიკაში.

რას გააკეთებთ, თუ კანდიდატი ზედმეტად მოკლედ ან ბუნდოვნად პასუხობს? ივარჯიშეთ მეტი ინფორმაციის შეგროვებაში: „შეგიძლიათ მეტი დეტალი გაგვიზიაროთ იმის შესახებ, თუ როგორ შეასრულეთ პროექტი/დავალება? უკეთ მინდა გავიგო თქვენი მიდგომა“.

უნდა გაითვალისწინოთ რამდენიმე კითხვა კანდიდატისგან. საცდელი გასაუბრება კარგი დროა იმისთვის, რომ მოიფიქროთ პასუხები ხშირად დასმულ კითხვებზე. მაგალითად, რას უპასუხებთ, თუ კანდიდატი გკითხავთ, თქვენ რატომ აირჩიეთ ეს კომპანია, ან რა მოგწონთ ყველაზე მეტად და ყველაზე ნაკლებად თქვენს როლში? დარწმუნდით, რომ გაქვთ მომზადებული გააზრებული პასუხი.

შექმენით კომფორტული გარემო

ინტერვიუს დასაწყისში შეეცადეთ დადებითი განწყობის შექმნას. დაიწყეთ თბილი მისალმებით და საუბრით კანდიდატის ნერვიულობის შესამსუბუქებლად. ეს ეხმარება კანდიდატს გახსნაში და შეიძლება მიგიყვანოთ უფრო გულწრფელ პასუხებამდე მათი პიროვნების შესახებ. ასეთი საუბარი თქვენც დაგეხმარებათ მოდუნებაში. ეს უბრალოდ დიალოგია.

შემდეგ, აცნობეთ კანდიდატს, რას უნდა ელოდოს ინტერვიუს დანარჩენი ნაწილის განმავლობაში, მათ შორის მის სტრუქტურას, ხანგრძლივობას და რას ეძებთ მათ პასუხებში. სტრუქტურის ცოდნა დაეხმარება კანდიდატს, და ასევე საშუალებას მოგცემთ გადახედოთ კონკრეტულ ნაბიჯებს, რომლებსაც გადადგამთ. გაარკვიეთ, აქვს თუ არა კანდიდატს რაიმე კითხვები გაგრძელებამდე.

გააკეთეთ ჩანაწერები

კანდიდატის პასუხების მოსმენისას, ჩაიწერეთ მთავარი პუნქტები. ნუ დაეყრდნობით თქვენს მეხსიერებას, განსაკუთრებით თუ რამდენიმე კანდიდატს უტარებთ გასაუბრებას.

იმისათვის, რომ თქვენი ჩანაწერები იყოს მიუკერძოებელი და ფოკუსირებული სამუშაოსთან დაკავშირებულ ფაქტორებზე, საუკეთესო პრაქტიკაა გქონდეთ გასაუბრების გიდი. ეს არის სტრუქტურირებული დოკუმენტი, რომელიც შექმნილია ინტერვიუების ხელშეწყობისა და ორგანიზებისთვის, სადაც მოცემულია კითხვები და თემები, რომლებსაც განიხილავთ. ინტერვიუს სახელმძღვანელოებს აქვთ ცარიელი სივრცეები ჩანაწერების გასაკეთებლად და მართალია, არ გჭირდებათ კანდიდატის პასუხების სიტყვა-სიტყვით ჩაწერა, მიზნად დაისახეთ მათ მიერ გაზიარებული მაგალითების ზოგადი კონტექსტის დაფიქსირება. რა გააკეთეს კონკრეტულად გარკვეულ სიტუაციებში? რა შედეგები ან უნარები უკავშირდებოდა მათ ქმედებებს?

წყარო: HBR