Control ბოლო ათწლეულის ერთ-ერთი ყველაზე საყვარელი სათავგადასავლო თამაშია – უცნაური, მუდმივად ცვალებადი შენობის სამყაროში მიმდინარე ისტორია, სადაც ტელეკინეზის გამოყენებით ებრძვი საშიშ და უცნაურ მტრებს. 2019 წელს, გამოსვლისას, თამაში საკმაოდ მძიმე იყო გრაფიკულად, მაგრამ დრო ბევრ რამეს ცვლის. ახლა Control: Ultimate Edition უკვე ხელმისაწვდომია iPhone-სა და iPad-ზე მხოლოდ 5 დოლარად. ეს ნიშნავს, რომ ერთხელ ყიდვის შემდეგ ის იმუშავებს iPhone-ზე, iPad-ზე და Mac-ზეც.
დეველოპერი Remedy Entertainment ამბობს, რომ ეს არის სრული ვერსია, დამატებითი DLC ეპიზოდებით. თამაშის ინტერფეისი და კონტროლები თავიდანაა გადაკეთებული სენსორული ეკრანებისთვის, თუმცა ის კონტროლერებითაც მუშაობს, რაც საუკეთესო გამოცდილებისთვისაა რეკომენდებული.
თამაში იმუშავებს მინიმუმ A17 Pro ჩიპზე მქონე iPhone-ებზე (iPhone 15 Pro/Pro Max და iPhone 16/17 სერიები). iPad-ებშიც მხარდაჭერილია ყველა მოდელი, რომელსაც M-სერიის ან A17 Pro ჩიპი აქვს. შესაბამისად, A16-პროცესორიანი საბაზისო iPad ვერ გაუშვებს თამაშს, მაგრამ ბოლო წლების iPad Air და Pro მოდელები თავსებადია.
ტესტირებისას ახალი iPad Air-ის M4 ჩიპი თამაშს უპრობლემოდ გაუმკლავდა. ერთადერთი მინუსი არის ის, რომ სირბილისას L3 ღილაკის დაჭერა მუდმივად საჭიროა, განსხვავებით სხვა პლატფორმებისგან. სხვა მხრივ, თამაში კარგად გამოიყურება და სტაბილურად მუშაობს.
Control არის კიდევ ერთი „AAA“ დონის თამაში, რომელიც Apple-ის პლატფორმებზე გამოჩნდა. ბოლო წლებში Apple აქტიურად ცდილობს დეველოპერების მოზიდვას. უკვე ხელმისაწვდომია ისეთი თამაშებიც, როგორიცაა Resident Evil სერიის რამდენიმე ნაწილი, Death Stranding და Assassin’s Creed Mirage. Mac-ზე კი გვხვდება მძიმე პროექტებიც, მაგალითად Cyberpunk 2077 და Lies of P.
მართალია, Apple-ის პლატფორმები ჯერ კიდევ არ არის გეიმერებისთვის მთავარი არჩევანი, მაგრამ ასეთი მაღალი დონის თამაშების დამატება მნიშვნელოვნად აფართოებს შესაძლებლობებს.
