Disney-ს “Wish” კომპანიისთვის დიდი წარმატების მომტანი ნამდვილად არ ყოფილა. 2023 წელს, Disney-ს დაარსებიდან 100 წლის იუბილესთან დაკავშირებით გამოსულმა ანიმაციამ დაახლოებით $254.2 მილიონი გამოიმუშავა, მაშინ როცა მისი ბიუჯეტი, გავრცელებული ინფორმაციით, $200 მილიონს აღწევდა. ფილმს კრიტიკოსებისგანაც არაერთგვაროვანი შეფასებები მოჰყვა, მათ შორის, იყო მოსაზრება, რომ ის ზედმეტად ზოგადი და კომპანიის წარსულის ნოსტალგიაზე დამოკიდებული აღმოჩნდა. დღეს Rotten Tomatoes-ზე მისი შეფასება 48%-ია.
Wish-ის გამოსვლის შემდეგ მაყურებელში არსებობდა მოლოდინი, რომ ფილმიც გამოვიდოდა, რომელიც ანიმაციაზე უკეთესი იქნებოდა. ახლა ამ იდეის განხორციელება დამოუკიდებელმა არტისტებმა სცადეს და საკუთარი მოკლემეტრაჟიანი ანიმაციის, “Asha & Starboy“, თრეილერი გამოუშვეს.
Wish-ის ადრეულ კონცეპტარტში Star სრულიად განსხვავებულ პერსონაჟად იყო წარმოდგენილი – ოქროსფერთმიან ახალგაზრდა კაცად, რომელსაც მთავარი გმირის, აშას, მიმართ სიმპათია ჰქონდა. ფილმის ერთ-ერთი მთავარი სიმღერაც თავდაპირველად სწორედ მათი დუეტი უნდა ყოფილიყო.
საბოლოოდ Disney-მ Star პირდაპირი გაგებით ვარსკვლავად აქცია. ის გახდა საყვარელი, მაგრამ უხმო, სურვილების შემსრულებელი ენერგიის ბურთი. რომანტიკული ხაზი და დუეტი ფილმიდან გაქრა და სიუჟეტის ცენტრში აშას პირადი მოგზაურობა მოექცა.
Asha & Starboy-ის ავტორებმა კი თავდაპირველი იდეა აღადგინეს და “Wish“ მუსიკალურ რომანტიკულ ისტორიად გადააკეთეს. მოკლემეტრაჟიან ნამუშევარს ახალი მუსიკა აქვს და ის დუეტიც, რომელიც Disney-ს თავდაპირველ კონცეფციაში არსებობდა. მათ ასევე შეცვალეს Queen Amaya-ს პერსონაჟი და ის King Magnifico-სთან ერთად ანტაგონისტად წარმოადგინეს.
კიდევ ერთი მნიშვნელოვანი განსხვავება ვიზუალური სტილია. Disney-ს თანამედროვე 3D CGI-ს ნაცვლად, დამოუკიდებელმა გუნდმა ხელით დახატული 2D ანიმაცია გამოიყენა – მიდგომა, რომლის დაბრუნების მიმართაც Disney-ს გულშემატკივრებს ბოლო პერიოდში განსაკუთრებული ინტერესი აქვთ.
Asha & Starboy-ის ტრეილერს უკვე მოჰყვა დადებითი გამოხმაურება და მაყურებლების ნაწილმა ის Disney-ს ორიგინალ ფილმს შეადარა. პროექტი კიდევ ერთი მაგალითია იმისა, თუ როგორ შეიძლება ფანების მიერ შექმნილმა ნამუშევარმა პოპულარული ისტორიის სრულიად განსხვავებული ვერსია შესთავაზოს აუდიტორიას.
