ჯერ კიდევ გასული წლის ოქტომბერში Duolingo-მ გაფართოების შესახებ ისაუბრა, რაც იმ დროისთვის მათემატიკის სფეროს ეხებოდა. ახლა კი უცხო ენების შესასწავლი აპლიკაცია კიდევ ერთხელ გასცდა ლინგვისტიკის საზღვრებს და მუსიკასაც შეეხო.
საგანმანათლებლო პლატფორმამ ახლახან ახალი სერვისი გამოაქვეყნა „მრავალი საგნობრივი გამოცდილების“ შესახებ. ეს უკანასკნელი მოიცავს როგორც Duolingo Math-ს, ისე Duolingo Music-ს. როგორც ჩანს, მსურველებს შეუძლიათ, ინტერაქციულ სავარჯიშოებზე დაფუძნებული გაკვეთილები მიიღონ, რათა კონკრეტული უნარები გაიუმჯობესონ. მართალია, ჯერჯერობით უცნობია, რომელ მუსიკალურ ინსტრუმენტებს შეეხება გაკვეთილები, მაგრამ გავრცელებულ ფოტოებზე ფორტეპიანოს კლავიშებსა და დრამს ვხედავთ. ამასთან, კომპანიამ განაცხადა, რომ პლატფორმას ასობით ახალი გაკვეთილი დაემატება, თითოეული მათგანი კი მხიარულ და ნაცნობ მელოდიებზე იქნება დაფუძნებული.
TechCrunch-ის თანახმად, Duolingo-მ აღნიშნული გადაწყვეტილება ქვეყნებში მუსიკალური განათლების ნაკლებობის გამო მიიღო. მაგალითად, ამ დროისთვის 3,6 მილიონზე მეტ სტუდენტს არ შეუძლია მუსიკის გაკვეთილებზე დასწრება, რომ აღარაფერი ვთქვათ მათ ღირებულებაზე.
