კომპანიებმა, რომლებიც სხვადასხვა ბიზნესს ვებ დეველოპმენტის კუთხით მომსახურებას უწევენ, ბოლო დროს, ერთგვარი მაშველი  რგოლის სტატუსი მოირგეს. იმის გათვალისწინებით, რომ ელექტრონული კომერციის მნიშვნელობა დღითი დღე უფრო და უფრო აქტუალური ხდება, ახალბედა სტარტაპებს კი, დაკვალიანება სჭირდებათ, ონლაინ მაღაზიის ასაწყობად, რომელ კომპანიას მიმართონ და ამ მომსახურებაში რამდენი გადაიხადონ, აგრეთვე, გაიგონ მიმდინარე შეღავათებისა და შეთავაზებების შესახებ, გადავწყვიტეთ, ამ საკითხების გარშემო არსებულ კითხვებზე მოგვეძიებინა პასუხები. 

თუმცა მანამდე, სასარგებლოდ მიმაჩნია, გაგიზიაროთ კომპანია B2C-ს დამფუძნებელ ქეთი ვაჩიბერიძის მოსაზრება, დღეს, ონლაინ მაღაზიების როლსა და დანიშნულებაზე და ელექტრონული კომერციის ხელსაყრელ ფაქტორებზე სტარტაპებისთვის:

ქეთი ვაჩიბერიძე: „პანდემიის დაწყების მომენტიდან, აბსოლუტურად შეიცვალა ონლაინ მაღაზიების როლი და დანიშნულება. გასულ წელს, მნიშვნელოვნად გაზრდილი ვიზიტების მიუხედავად, საბოლოო მომხმარებელი ონლაინ მაღაზიას აღიქვამდა, ძირითადად, როგორც პროდუქტების კატალოგს, სადაც არჩევდა სასურველ ნივთს და რომლის შესაძენადაც, მაინც ობიექტზე ახორციელებდა ვიზიტს. ბოლო სამი თვის განმავლობაში კი, ისეთი ვიზიტების წილი, რომლებიც ელექტრონული ანგარიშსწორებით დასრულდა, 10-ჯერ არის გაზრდილი. მომხმარებელმა ბოლომდე გაითავისა ის კომფორტი, რაც სახლიდან გაუსვლელად, სასურველი ნივთის მიღებას უკავშირდება და ამის შემდეგ, გაუჭირდება ამ კომფორტზე უარის თქმა, პანდემიის დასრულების შემდეგაც. 

ანალოგიურად იცვლება ბიზნესის ქცევაც, ისინიც ხედავენ, რომ ონლაინ მაღაზია აღარ არის მხოლოდ მათი პროდუქტების კატალოგი ონლაინ სივრცეში, არამედ ეს უკვე შემოსავლების მიღების მნიშვნელოვანი არხია. ეს ნებისმიერი ზომისა და სტრუქტურის ბიზნესს ეხება, თუმცა ვფიქრობ, ელ-კომერცია განსაკუთრებით მნიშნველოვანი და ხელსაყრელია სტარტაპებისთვის და რამდენიმე ფაქტორს ჩამოვთვლი:

• არანაირი საწყისი ინვესტიციის აუცილებლობა, რასაც გვერდს ვერ აუქცევდა ტრადიციული გაყიდვების არხების გამოყენებისას (იჯარა, ინვენტარი, ხელფასი და სხვ. ხარჯები);
• შეუზღუდავი წვდომა მომხმარებელზე – თუ ოფლაინ ბიზნესის შემთხვევაში შეზღუდულია მეწარმე მდებარეობით და დამოკიდებულია ტრაფიკზე კონკრეტულ ქუჩაზე ან სავაჭრო ცენტრში, ონლაინ ვაჭრობისას საშუალება აქვს, მკაფიოდ განსაზღვროს მისი აუდიტორია სხვადასხვა კრიტერიუმით და მათ მოზიდვაზე დახარჯოს ძალისხმევა, რაც ნამდვილად ღირებული ინვესტიციაა;
• ციფრული მარკეტინგი უკვე იმდენად მრავალფეროვანია და უამრავ შესაძლებლობებს გვთავაზობს, რომ მათი გამოყენებით, ბევრად მარტივია მომხმარებლების ლოიალურობის მოპოვება, მათი მოთხოვნების  სწორად იდენტიფიცირება, საკუთარი პროდუქციისა თუ მომსახურების სრულად ადაპტირება, რაც დღევანდელ კონკურენტულ სამყაროში აუცილებლობას წარმოადგენს“, – განმარტავს ქეთი ვაჩიბერიძე. 

ახლა კი, გთავაზობთ იმ კომპანიების ჩამონათვალს, რომლებიც სტარტაპებს და არამხოლოდ, ონლაინ მაღაზიის აწყობით უზრუნველყოფენ:

Desk.ge 
ონლაინ პლატფორმა, სადაც მცირე და საშუალო ბიზნესისთვის, პროფესიონალური ვებგვერდის, ონლაინ მაღაზიის, ლენდინგისა და პრომოგვერდის შექმნა სულ რამდენიმე საათში შეგიძლიათ. ამისთვის საჭიროა პორტალზე დარეგისტრირება და ინსტრუქციებს მიყოლა.