ბრენდი ცნობადობის გარეშე არ არსებობს. თითოეული კომპანია საკმაოდ დიდ ხარჯებს იღებს რეკლამასა და საზოგადოებრივ ურთიერთობებში, მაგრამ ყველას არ აქვს ამის საშუალება, განსაკუთრებით დამწყებ ბიზნესს. რა უნდა ქნათ ამ დროს?
არსებობს ბევრნაირი ტაქტიკა, რათა მიიღოთ მედიაღირებულება ზედმეტი ხარჯის გარეშე. მარკეტინგში ამას EMV, Earned Media Value-ს ეძახიან, რომელიც შეგვიძლია, ვთარგმნოთ, როგორც „გამომუშავებული მედია ღირებულება”. ამ სტატიაში მიმოვიხილავთ, თუ რას მოიცავს ეს ტერმინი და როგორ აკეთებენ ბრენდები ამას სწორად.
რა არის გამომუშავებული მედიაღირებულება
ეს არის უფასო ხილვადობა მედიაგაშუქების, სოციალურ მედიაში ხსენებების, გაზიარებებისა და ტრადიციული კარგი ზეპირი ინფორმაციის მეშვეობით. წარმოგიდგენთ არხებს, რომელთა მეშვეობითაც შეგიძლიათ გამოიმუშაოთ მედიაღირებულება:
- საზოგადოებასთან ურთიერთობა (PR): თქვენი ბრენდის წარმოჩენა საინფორმაციო სტატიებში, ჟურნალებში, ტელევიზიაში ან რადიოში სტრატეგიული კომუნიკაციის გზით;
- სოციალურ მედიაში ხსენებები და გაზიარებები: როდესაც ადამიანები თქვენს ბრენდზე საუბრობენ ისეთ პლატფორმებზე, როგორიცაა Instagram, X, LinkedIn, TikTok და Facebook;
- ინფლუენსერმარკეტინგი: როდესაც ინფლუენსერები, ბლოგერები ან ვლოგერები ორგანულად აცნობენ თქვენს პროდუქტს/მომსახურებას თავიანთ აუდიტორიას;
- ზეპირი გავრცელება: ყველაზე ძლიერი მარკეტინგული ინსტრუმენტია, როდესაც ადამიანები ურჩევენ თქვენს ბრენდს მეგობრებს, ოჯახის წევრებს, ბიზნესპარტნიორებს, თანაგუნდელებს და ა.შ.
- UGC: მომხმარებელთა მიმოხილვები, ყუთების გახსნის ვიდეოები, რეკომენდაციები და ნებისმიერი კონტენტი, რომელიც შექმნილია რეალური მომხმარებლების მიერ;
- სტუმრების ბლოგი და პოდკასტები: შეგიძლიათ, მოიწვიოთ ექსპერტები, რომლებიც თქვენს ვლოგში ისაუბრებენ თქვენივე ინდუსტრიასთან დაკავშირებულ სხვადასხვა მნიშვნელოვან და აქტუალურ თემაზე;
- ჯილდოები და აღიარებები: გაუზიარეთ საზოგადოებას თქვენი ინდუსტრიული მიღწევები, თუკი რაიმე ჯილდო ან აღიარება გაქვთ მოპოვებული. ეს ზრდის თქვენი ბრენდის სანდოობას და ავტორიტეტს.
ერთი სიტყვით, EMV-ს აღწევთ მაშინ, როდესაც ადამიანები თქვენს ბრენდზე საუბრობენ იმიტომ, რომ მათ ასე სურთ და არა იმიტომ, რომ თქვენ გადაუხადეთ. ეს არის რეალური გავლენა აუდიტორიაზე. აქვე გაითვალისწინეთ, რომ აუცილებელია, თქვენი გუნდი ჩართული იყოს მედიაღირებულების გამომუშავებაში.
რაში გეხმარებათ გამომუშავებული მედიაღირებულება
ის ამყარებს აუდიტორიასა და ბრენდს შორის ნდობას. როდესაც ბრენდის გზავნილი მესამე მხარისგან მოდის, ის მყისიერად უფრო სანდოდ აღიქმება.
ამის შესანიშნავი მაგალითია Costco, კომპანია, რომელიც მაქსიმალურად იყენებს გამომუშავებულ მედიას. მის ვიდეოებში ხშირად ჩნდება მამა-შვილი, რომელიც კომპანიის პროდუქტებს აფასებს.
ის ზრდის ხილვადობას – EMV-ის წყალობით, თქვენი ბრენდი ბუნებრივად ვრცელდება გაზიარებებისა და ორგანული ხსენებების მეშვეობით. მაგალითად, Coca-Cola-ს ტრაფიკის 14.28% მხოლოდ ამ გზით მოდის.
აუმჯობესებს სტრატეგიას და ბიუჯეტის განაწილებას
EMV მონაცემების თვალყურის დევნება ნიშნავს იმის გაგებას, თუ რა მუშაობს და სად უნდა მოხდეს კორექტირება. სწორ პლატფორმებს, კონტენტის ტიპებსა და ინფლუენსერებს შეუძლიათ სერიოზული ღირებულების შექმნა, მაგრამ სტრატეგიის გარეშე შეიძლება არასწორად გადაანაწილოთ რესურსები.
გამომუშავებული მედიაღირებულების ფორმულა
მიუხედავად იმისა, რომ არ არსებობს ერთიანი სტანდარტული ფორმულა, მარკეტერები მას ითვლიან იმის შეფასებით, თუ რამდენს დახარჯავდნენ სტანდარტულ რეკლამებზე იმავე მასშტაბისა და ჩართულობის მისაღწევად.
ის ძირითადად შემდეგი კომპონენტებისაგან შედგება:
- საერთო შთაბეჭდილებები — მოიცავს ნახვებს, გაშუქებებს მედიაში, ინფლუენსერების ხსენებებს და მომხმარებლის მიერ გენერირებულ კონტენტს;
- ფასიანი რეკლამების CPM – გადახედეთ სხვა კომპანიებს ან თქვენს წარსულ კამპანიებს, რათა ნახოთ, რამდენს იხდიან ბრენდები 1000 შთაბეჭდილების (Impressions) გამოსამუშავებლად;
- შთაბეჭდილებების გამრავლება CPM-ზე — გაძლევთ იმის სავარაუდო ღირებულებას, თუ რა დაჯდებოდა თქვენ მიერ მიღებული შედეგი ფასიანი რეკლამის შემთხვევაში.
დასასრულს, მოდი გადავხედოთ ბრენდებს, რომლებმაც ნამდვილად იციან, როგორ გამოიყენონ EMV ეფექტურად:
როგორ გამოიწვია Barbie-ს ფილმმა ორგანული აჟიოტაჟი
Barbie-ს ფილმის მარკეტინგული კამპანია, რომელიც 2023 წელს გამოვიდა, მედიაში მოპოვებული წარმატების გამორჩეულ მაგალითად იქცა. Warner Bros.-მა შექმნა ინტერაქციული და მიმზიდველი კამპანია, მათ შორის Barbiecore-ის ესთეტიკა, რომელიც დომინირებდა სოციალურ მედიაპლატფორმებზე (განსაკუთრებით TikTok-სა და Instagram-ზე).
კამპანიამ ორგანული საუბრები გამოიწვია, სადაც ინფლუენსერები და გულშემატკივრები გამოცდილებას აზიარებდნენ ბარბის სტილზე, ესთეტიკაზე, სამოსზე და სხვა. ამან სოციალურ მედიაში, საინფორმაციო საშუალებებსა და პოპკულტურის განხილვებში უფასო რეკლამის დიდი ნაკადი გამოიწვია.
რატომ მოსწონთ ეს კამპანია მარკეტერებს
კამპანიამ ერთმანეთთან დააკავშირა ნოსტალგია და თანამედროვე ტენდენციებთან შერწყმა, მომხმარებლის მიერ გენერირებული კონტენტის წახალისება გამოიწვია, რაც აჩვენებს, თუ როგორ შეუძლია თქვენი ბრენდის კულტურულ მომენტებთან შესაბამისობაში მოყვანას მედიაზე უზარმაზარი გავლენის შექმნა.
ბოლო რჩევა – არ იყიდოთ ყურადღება, გამოიმუშავეთ ის!
