26
Feb
2019

10 ინსაითი Burger King-ის სუპერთასის რეკლამიდან

26 Feb 2019

2019 წლის სუპერთასზე “ბურგერ კინგმა” გაუშვა რეკლამა, ერთი შეხედვით, უბრალო კონცეფციით. პოპ-არტის ლეგენდა, ენდი უორჰოლი მაგიდასთან ზის და ვუპერს ილუკმება. კამპანიას თან ახლდა ჰეშთეგი #EatLikeAndy. საგულისხმოა, რომ კამპანიაში არ ყოფილა ყიდვისკენ მოწოდება. კამპანიაში, უბრალოდ, გამოიყენეს ნაპოვნი ძველი კადრები. სუპერთასიდან რამდენიმე კვირის შემდეგ, “ბურგერ კინგის” გლობალური მარკეტინგის დირექტორმა, ფერნანდო მაჩადომ, დაწერა ბლოგი, თუ რა დანიშნულება ჰქონდა ამ რეკლამას ბრენდისთვის გრძელვადიან პერსპექტივაში.

pasha-statiebi
pasha-statiebi

 

ენდი უორჰოლს უფრო მეტი ციფრული გავლენა აქვს, ვიდრე გგონიათ

სუპერთასის ეს რეკლამა სააგენტომ David Miami შექმნა, რომლის “ბურგერ კინგთან” პარტნიორობამ უკვე შექმნა საინტერესო კამპანიები. სააგენტო ცნობილია მისი უცნაური იდეებითა და დამაჯერებელი შედეგებით. მაჩადომ თავისი პოსტის დასაწყისში საკითხი წამოწია შემდეგნაირად, მიუხედავად იმისა, რომ ენდი უორჰოლი 1987 წელს გარდაიცვალა, ის 2019 წელსაც არ კარგავს აქტუალობას ციფრულ სამყაროში.

აღსანიშნავია, რომ “ინსტაგრამზე” ენდი უორჰოლი ოთხჯერ უფრო ხშირად არის ნახსენები, ვიდრე სარა ჯესიკა პარკერი, მელისა მაკკართი, ჩარლი შინი, ჯეისონ ბეიტმენი და სტივ ქარელი. მაჩადომ აღნიშნა, რომ უორჰოლის ეს ორიგინალი ვიდეო არაერთხელ გამოუყენებიათ YouTube-ის ეპოქის დაწყებიდან დღემდე.

“ბურგერ კინგს” სურდა, რომ ეს რეკლამა “ჩუმი მკვლელი” ყოფილიყო

არაა გასაკვირი, რომ “ბურგერ კინგი” ამ რეკლამის სრულ ვერსიას სუპერთასის თამაშისთვის ინახავდა. ჩათვალეს, რომ ტიზერით მოლოდინის შექმნა, შემდეგ კი, სიურპრიზად, უორჰოლის გამოსვლა, გაამართლებდა. რეკლამით სურდათ სუპერთასის სარეკლამო ტრადიციაში სრულიად ახალი ტენდენცია შეეტანათ. რეკლამა თამაშის ბოლო მეოთხედში გაუშვეს. 45 წამის განმავლობაში, მილიონობით ადამიანი ადევნებდა თვალს, როგორ მიირთმევდა ენდი უორჰოლი ვუპერს, ყოველდღარი კადრის ჭრის, ეფექტების, მუსიკისა და დაქირავებული ცნობადი სახეების გარეშე. მხოლოდ ენდი.

“ბურგერ კინგს” არ ჰქონია მოლოდინი, რომ უორჰოლს ყველა იცნობდა

სკეპტიკოსების აზრით, ეს რეკლამა სუპერთასის მაყურებლისთვის საინტერესო არ იქნებოდა, რადგან ბევრი მას ვერც კი იცნობდა. თუმცა, “ბურგერ კინგში” სჯეროდათ, რომ ე.წ. “ჯოგური ეფექტის” საშუალებით მიაღწევენ მიზანს და პირიქით, ეს ადამიანებში დისკუსიისა და განხილვის სურვილის გააჩენდა.

თუკი ესეც არ გაამართლებდა, მარკეტინგის ჯგუფს სჯეროდა, რომ ხალხი საძიებო სისტემაში დაუწყებდა ძებნას უორჰოლს. ასეც მოხდა, სანამ საზოგადოების ნაწილი “ბურგერ კინგის” რეკლამას ტვიტერზე ეხმაურებოდა, სხვებმა “გუგლს” მიაშურეს. სტატისტიკის თანახმად, სუპერთასის დღეს, “ბურგერ კინგი” უფრო მეტჯერ დაგუგლეს, ვიდრე Bud Light და Pepsi. ენდი უორჰოლმა კი ამ მხრივ, რეკორდი მოხსნა.

უკმაყოფილოთა პოტენციური რიცხვი მინიმალური ჩანდა

ყველას მოეწონება ეს? არა. ყველა გაიგებს? ვერა. მოუტანს ეს პრობლემას “ბურგერ კინგს”? ნაკლებად სავარაუდოა. იმ შემთხვევაშიც კი, თუკი ვინმეს სათანადოდ არ მოეწონებოდა, რეკლამა მისთვის მავნებელიც კი არ იქნებოდა.

კრიტიკოსების თქმით, კამპანიის რეიტინგი საეჭვო იყო, თუმცა, მაჩადო ირწმუნება, რომ ეს შესაძლოა ყოფილიყო რეკლამის დასაწყისში, როდესაც მაყურებლებმა უორჰოლი ვერ იცნეს. შემდეგ, ეს მდგომარეობა შეცვალა აქტიურობამ “გუგლსა” და სოციალურ ქსელებში. “ბურგერ კინგი” იმედოვნებდა, რომ სუპერთასის არასტანდარტული სარეკლამო სივრცე ამ კამპანიისთვის გამართლებული იქნებოდა.

მოსალოდნელია, რომ რეკლამამ 5 მილიარდი მედია ჩართულობა მოიპოვოს

არაა გასაკვირი, რომ “ბურგერ კინგი” ერთ-ერთი ყველაზე აქტიური სასაუბრო თემაა სუპერთასის შემდეგ. მაჩადოს გამოთვლებით, კომპანია 5 მლრდ ორგანულ ჩვენებას დააგროვებს. რეკლამას უკვე აქვს 3 მლრდ ჩვენება. გამოხმაურებების უმეტესი ნაწილი პოზიტიური ან ნეიტრალურია.

ეს იყო გრძელვადიანი თამაში

მაჩადოსთვის არაერთხელ უთქვამთ, რომ რეკლამა არ “აიძულებდა” მომხმარებლებს “ბურგერ კინგის” რესტორნებისკენ გაცვენილიყვნენ და ვუპეერი ეყიდათ. მაჩადოს თქმით, კამპანის მიზანი არასდროს ყოფილა გაყიდვების ზრდა. მისი აზრით, ბრენდი უფრო დიდ სიღრმეებში ჩადის, ვიდრე უბრალოდ ტვინების, კუჭებისა და გულების დაკავშირებაა.

კამპანიამ #EatLikeAndy დიდი გავლენა მოახდინა კომპანიის იმიჯზე

“ბურგერ კინგმა” გადაწყვიტა ფართო რაკურსით შეეხედა სუპერთასის ამ რეკლამისთვის. ჩატარდა კვლევა, რომლის ფარგლებშიც, გამოიკითხა 1200 ამერიკელი. როგორც აღმოჩნდა, სუპერთასის შემდეგ, “ბურგერ კინგის” ყველა მაჩვენებელი გაუმჯობესდა, განსაკუთრებით, 18-34 წლის სეგმენტში.

მნიშვნელოვნად გაიზარდა მოთხოვნა ადგილზე მიტანაზე

კამპანიის დაწყებამდე არსებული მაჩვენებელი ენდი უორჰოლის რეკლამამ მნიშვნელოვნად შეცვალა. მოთხოვნა ადგილზე მიტანაზე 38%-ით გაიზარდა.

როგორც ვხედავთ, მაჩადო სავსებით კმაყოფილი ჩანს კამპანიის შედეგებით. სავარაუდოდ, მისი ეს კმაყოფილება დაკავშირებულია იმასთან, რომ სუპერთასის ეს რეკლამა ჯერ კიდევ წარმოადგენს განხილვის საგანს. იმის მიუხედავად, მოგეწონათ თუ არა ეს რეკლამა, ფაქტია, თქვენც მიგიზიდათ, რადგან ბოლო რამდენიმე წუთია ამ სტატიის კითხვით ხართ დაკავებული.

წყარო: adweek



განხილვა