„ეთნოგრაფი“, ტრადიციული ქართული რესტორანი თბილისში, რომლის გაცხადებული მისია, დასაწყისშივე ქართული კულტურის, გასტრონომიისა და სტუმარმასპინძლობის ტრადიციის პოპულარიზება იყო, სექტემბრიდან, განახლებული ვიზუალური იდენტობით უბრუნდება მომხმარებელს.
რესტორანი „ეთნოგრაფი“ ქართული სტუმარმასპინძლობის ერთგვარი მუზეუმია, სადაც ნაციონალური სამზარეულო, რეგიონული კერძების სახასიათო გემოები, ინტერიერში შენარჩუნებული კულტურული არტეფაქტები და სტუმრის მიღების საუკეთესო ქართული ტრადიციები, ერთად იყრის თავს.
თუ როგორ მივიდა „ეთნოგრაფის“ გუნდი გადაწყვეტილებამდე, რომ სწორედ ახლა, რესტორნის საქმიანობიდან 5 წლის შემდეგ, რებრენდინგის დრო დადგა, „ეთნოგრაფის“ მარკეტინგის სამსახურის ხელმძღვანელი, ნუცა შარაშენიძე და ბრენდის და მარკეტინგის კონსულტანტი, ლალი პაპაშვილი Marketer.ge-ს ესაუბრნენ.
ნუცა შარაშენიძე: „2019 წელს, როცა რესტორანი გაიხსნა, დამფუძნებელმა გუნდმა ზუსტად იცოდა, რომ “ეთნოგრაფი” ტრადიციული სამასპინძლო სივრცე უნდა ყოფილიყო, სადაც სტუმარს ქართულ კულტურასთან და სუფრის ტრადიციებთან ზიარების შესაძლებლობა ექნებოდა. იმ დროისთვის, ინდუსტრია ნაკლებად მომთხოვნი იყო ბრენდის იმ კლასიკური გაგების მიმართ, რომელიც ახლა გვაქვს. სწორედ ამიტომ, გუნდის მთავარი ფოკუსი ხარისხიანი პროდუქტის შექმნა იყო, რაც კომფორტული გარემოს, გემრიელი და მრავალფეროვანი სამზარეულოსა და მომსახურების მაღალი სტანდარტის შეთავაზებაში გადაითარგმნა. განვითარებასთან ერთად, „ეთნოგრაფი“ გახდა მეტი, ვიდრე უბრალოდ ტრადიციული ქართული რესტორანი. ერთგვარად, ის ცოცხალ ეთნოგრაფიულ მუზეუმად იქცა, რომლის ინტერიერში კულტურულ არტეფაქტებს, კერძებში – ნამდვილ ქართულ გემოს, მოლხენისას კი, ქართული შემოქმედების, ცეკვისა და მუსიკის საუკეთესო ნიმუშებს აღმოაჩენს სტუმარი. მართალია, „ეთნოგრაფია“ სიძველესთან ასოცირდება, მაგრამ ის ყოფითი კულტურა, რომელსაც ეს მეცნიერება სწავლობს, ცოცხალია, იცვლება და ვითარდება. სწორედ ამ პროცესში მივხვდით, რომ ბრენდს ბევრი სათქმელი, დიდი შინაარსი ჰქონდა და ამაზე ვიზუალური ხერხებითაც უნდა გვესაუბრა. ასე მივედით ბრენდის ვიზუალური იდენტობის ცვლილების სურვილსა და აუცილებლობამდე.“
ლალი პაპაშვილი: „მთავარი ინსპირაცია, როცა „ეთნოგრაფის“ რებრენდინგზე მუშაობა დავიწყეთ, მუზეუმის კონცეპტი იყო. ეს არ იყო იოლი პროცესი, რადგან მთელი საქართველოს ეთნოგრაფია საერთო ვიზუალურ სტილში, ბრენდის ელემენტებსა და ლოგოში უნდა მოგვექცია. „აღმოაჩინე საქართველო ეთნოგრაფში“ – ასეთია ბრენდის მანტრა, რაც იმას ნიშნავს, რომ კრეატიული გუნდის სამუშაო რესტორნის ვიზუალურ რებრენდინგზე მეტს გულისხმობდა. „ეთნოგრაფი“ ემოციას და გამოცდილებას ყიდის და არა ცალკეულად აღებულ კერძს ან ლხინის ეპიზოდს. გუნდის მიზანია ღირებულების შექმნა და ბრენდინგიც ამ მიზანს ემსახურება. შესაბამისად, ახალი ბრენდული იდენტობა მხოლოდ ლამაზი და ესთეტიკური კი არა, რეალური შინაარსის მატარებელი უნდა ყოფილიყო. როგორც ვთქვი, ეთნოგრაფიული მუზეუმის იდეა იქცა შთაგონებად, რომელიც ქართული კულტურის არტეფაქტებს აერთიანებს, მაგრამ ეს ნაკლებად არქაული, პირიქით, მაქსიმალურად თანამედროვე და დახვეწილი ხელწერით გაკეთდა. ლოგოსა და ბრენდბუქის შექმნაზე გრაფიკულმა დიზაინერმა, გიორგი ზვანელმა იმუშავა. მცირედით შეიცვალა ბრენდის არსებული ტიპოგრაფიული ლოგო, მას უფრო დახვეწილი ფორმა მივეცით ახალი ფონტის შერჩევის გზით, თუმცა, კარდინალურ ცვლილებაზე უარი ვთქვით, რადგან ჩვენი მომხმარებელი უკვე კარგად იცნობს და იღებს მას.“
ეთნოგრაფიულ მასალებზე დაფუძნებით, შევქმენით ბრენდის ელემენტების 4 ძირითადი მიმართულება:
- ვაზის ყვავილობა – დიზაინერის მიერ ხელით დახატული უნიკალური ჩუქურთმის პატერნი, რომელიც ვაზის ყვავილობას ასახავს.
- ტიპოგრაფიული პატერნი – „სტუმარი ღვთისაა“, რაც ქართული სტუმარმასპინძლობის მთავარი კრედოა
- სტენსილის ტექნიკით შექმნილი ისეთი სიმბოლოები, როგორიცაა: ქვევრი, თამადა და ქართული ცეკვა. ქვევრი, როგორც სიმბოლო იმისა, რომ საქართველო ღვინის აკვანია და ქვევრში ღვინის დაყენების 8 000-წლიანი ისტორია გვაქვს, ეს სასმელი კი, ქართული ლხინისგან განუყოფელია; თამადა, როგორც ქართული სუფრის მთავარი სიმბოლო და ქართული ცეკვა – გენია, რომლის გარეშეც ქართული ლხინი არასდროს შედგება.
- ქართული არქიტექტურა – ბრენდის ელემენტის ეს მიმართულება ფოტომასალაზეა დაფუძნებული, კონკრეტულად კი, კომუნიკაციაში გამოყენებულ იქნება სხვადასხვა არქიტექტურული თუ კულტურული ძეგლების რეალური ფოტოები. გამომდინარე იქიდან, რომ ქართული ეთნოგრაფიის მხოლოდ გრაფიკული ხერხებით გამოსახვა არ გვინდოდა, გადავწყვიტეთ, საარქივო ფოტომასალა გამოვეყენებინა, რომელიც ბრენდის ვიზუალურ სტილთან ადაპტირდა.
ამ მიმართულების შერჩევა კონკრეტულ მიზანს ემსახურება. ჩვენი სურვილია, კულტურულ–ისტორიული მემკვიდრეობის გაცნობას შევუწყოთ ხელი, მით უფრო, რომ „ეთნოგრაფის“ სტუმრები ხშირად არიან უცხოელი ვიზიტორები, რომელთაც გამოკვეთილი ინტერესი აქვთ არა მხოლოდ ჩვენი ქვეყნის გასტრონომიული, არამედ კულტურის ისტორიისადმი.
მიუხედავად იმისა, რომ 4 ერთმანეთისგან განსხვავებული სტილისა და კონცეფციის მქონე პატერნი შევქმენით, ისინი საერთო ვიზუალურ და გემოვნურ მახასიათებლებში ექცევიან და ვფიქრობთ, სრულ სინერგიაში არიან ერთმანეთთან და ბრენდის კონცეფციასთან.
არ გვაქვს იმის ამბიცია, რომ სრულად მოვიცავით ჩვენი ქვეყნის მდიდარი ეთნოგრაფიული კულტურა და ისტორია, თუმცა, მაქსიმალურად შევეცადეთ, რომ გემოვნებიანად და თანამედროვეობის შტრიხებით შეგვექმნა ახალი ვიზუალური სტილი და იმედი გვაქვს, ისევე მიიღებს და შეიყვარებს ბრენდის ახალ ვიზუალურ ხასიათს მისი ერთგული სტუმარი, როგორც თვითონ ბრენდი შეიყვარა 5-წლიანი ისტორიის განმავლობაში.
ნუცა შარაშენიძე: „ახალი ბრენდინგის შექმნამ გუნდს საინტერესო სამომავლო გეგმებიც დაუსახა, მათ შორისაა კონცეპტუალური მაღაზიის მოწყობა, რისთვისაც აქტიურად ვემზადებით. სტუმრებს შესაძლებლობა ექნებათ, ჩვენი ბრენდის იდენტობის ნიმუშები შინ წაიღონ, ზუსტად ისე, როგორც მუზეუმის მონახულების შემდეგ ვყიდულობთ სამუზეუმო ექსპონატების მცირე ვერსიებს სამახსოვრო საჩუქრებად. მანამდე კი, ახალ ვიზუალურ იდენტობას ჩვენი საკომუნიკაციო პლატფორმებიდან გავაცნობთ „ეთნოგრაფის“ აუდიტორიას.“
[R]
