Facebook-ს სურს, თქვენს ინტერესებზე კიდევ უფრო მორგებულ პლატფორმად ჩამოყალიბდეს, ამიტომაც ალგორითმს აახლებს. ახლა მომხმარებლებს მეტ კონტროლს აძლევს იმაზე, თუ რა ვიდეოებს ნახავენ, ვინ ამოუვარდებათ ახალი მეგობრების შემოთავაზებებში და თუ დასჭირდებათ, ძიებისას AI შეთავაზებებსაც მიაწვდის მათ.
ამგვარად, თუ კონკრეტული ვიდეო არ მოგწონთ, ახლა პლატფორმა ამის გამოხატვის გზებს ამარტივებს — Reel-ზე Not Interested-ის მონიშვნა შეგეძლებათ ან კომენტარის დროშით აღნიშვნა, რითაც სარეკომენდაციო ძრავას ეტყვით, რომ ამ უკუკავშირის მიხედვით ადაპტირდეს.
Save-ის ფუნქციაც განახლდა და ახლა საყვარელი რილსებისა თუ პოსტების ერთ სივრცეში ნახვა კიდევ უფრო მარტივდება.
ეს ცვლილებები კი მომხმარებელთა საჩივრების პასუხია, რომლებიც, თავის მხრივ, არასასურველმა კონტენტმა წარმოშვა. ბევრი მათგანი საუბრობდა შემაწუხებელი, დაბალი ხარისხის AI ვიდეოებზე, რაზე პასუხიც მეტამ ცალკე AI კონტენტისთვის გამოყოფილი გვერდი Vibes-ით გაგვცა.
აღსანიშნავია, რომ გარდა მომხმარებელთა წუხილისა, ალგორითმის განახლება მიზნად ახალი კონტენტისთვის პრიორიტეტის მინიჭებას ისახავს. არსებული ინფორმაციით, იგი მომხმარებლებს 50%-ით მეტ იმ დღეს დადებულ რილსს აჩვენებს.
რაც შეეხება AI-ს, რილსებში ძიების შემოთავაზებებზე იზრუნებს. ეს შემოთავაზებები მომხმარებლებს მათთვის სასურველ თემებზე უფრო მეტი კონტენტის აღმოჩენაში დაეხმარება.
მეტიც, რილსებისა და მთავარ გვერდზე მეგობრების ფოტოები გამოჩნდება, რათა ნახოთ, რომელი პოსტები მოსწონთ მათ, ზუსტად ისე, როგორც ეს ინსტაგრამზე ხდება. ხოლო, თუ ამ ფოტოს დააკლიკებთ, მეგობართან პირად შეტყობინებებში გადახვალთ.
