ანტიბიოტიკების მიმართ მზარდი რეზისტენტობა თანამედროვე მედიცინის ერთ-ერთი ყველაზე სერიოზული გამოწვევაა. სწორედ ამ ფონზე იზრდება ინტერესი ფაგოთერაპიის მიმართ – მკურნალობის მეთოდისადმი, რომელიც ბაქტერიოფაგებს, სასარგებლო („კარგ“) ვირუსებს იყენებს ბაქტერიული ინფექციების სამკურნალოდ.
მიუხედავად იმისა, რომ მსოფლიოსთვის ფაგოთერაპია დღეს ინოვაციურ მიმართულებად მიიჩნევა, საქართველოსთვის ეს სფერო საუკუნოვან გამოცდილებას უკავშირდება. გიორგი ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტი უკვე 1923 წლიდან წარმოადგენს ერთ-ერთ წამყვან ცენტრს ფაგების კვლევის, წარმოებისა და კლინიკური გამოყენების მიმართულებით.
სწორედ ამ მემკვიდრეობაზე დაყრდნობით შეიქმნა ელიავას ფაგოთერაპიის ცენტრი – ბაქტერიოფაგის კლინიკა, სივრცე, სადაც მრავალწლიანი სამეცნიერო ცოდნა თანამედროვე კლინიკურ პრაქტიკაში გადადის.
ცენტრი აერთიანებს გამოცდილ ექიმებს, მეცნიერებსა და სპეციალისტებს, რომლებიც პაციენტებს ინდივიდუალურ, მიზანმიმართულ და თანამედროვე მიდგომებზე დაფუძნებულ მკურნალობას სთავაზობენ. განსაკუთრებით მნიშვნელოვანია ის ფაქტი, რომ კლინიკა აქტიურად მუშაობს როგორც ადგილობრივ, ისე საერთაშორისო პაციენტებთან, რაც კიდევ ერთხელ უსვამს ხაზს ფაგოთერაპიის მიმართ მზარდ გლობალურ ინტერესს.
როგორ ვითარდება დღეს ფაგოთერაპია, რა გამოარჩევს ელიავას ფაგოთერაპიის ცენტრს და რატომ იზრდება საერთაშორისო ინტერესი ამ მიმართულების მიმართ – ამის შესახებ კლინიკის დირექტორი დავით სტურუა და მარკეტინგის მენეჯერი ლიკა მუმლაძე გვესაუბრებიან.
დავით სტურუა – ბაქტერიოფაგის კლინიკის დირექტორი
დღეს, როცა მსოფლიო ანტიბიოტიკრეზისტენტობის გამოწვევის წინაშე დგას, რა მნიშვნელობა აქვს ფაგოთერაპიას?ანტიბიოტიკრეზისტენტობა უკვე გლობალური ჯანდაცვის კრიტიკულ პრობლემად იქცა. სწორედ ამიტომ, მსოფლიო აქტიურად ეძებს ალტერნატიულ და უფრო ზუსტ სამკურნალო მეთოდებს. ფაგოთერაპია ამ პროცესში ერთ-ერთი ყველაზე პერსპექტიული მიმართულებაა, რადგან ბაქტერიოფაგები კონკრეტულ ბაქტერიებს მიზანმიმართულად უტევს და ადამიანის უჯრედებს არ აზიანებს.
ჩვენთვის განსაკუთრებული მნიშვნელობა აქვს იმასაც, რომ საქართველოში ფაგოთერაპიის ტრადიცია არასოდეს შეწყვეტილა. მაშინაც კი, როცა მსოფლიოს დიდ ნაწილში ამ მიმართულებაზე მუშაობა შეჩერდა, აქ კვლევა და პრაქტიკა უწყვეტად ვითარდებოდა. სწორედ ამ მემკვიდრეობისა და თანამედროვე სამეცნიერო მიდგომების გაერთიანებით, დღეს ელიავას ფაგოთერაპიის ცენტრი საერთაშორისო მნიშვნელობის კლინიკურ და სამეცნიერო სივრცედ ჩამოყალიბდა.
რა გამოარჩევს ფაგოთერაპიას ტრადიციული ანტიბიოტიკოთერაპიისგან?
ფაგოთერაპიის მთავარი უპირატესობა მისი სიზუსტეა. ანტიბიოტიკებისგან განსხვავებით, რომლებიც ფართო სპექტრზე მოქმედებს, ფაგები კონკრეტულ პათოგენურ ბაქტერიას უტევენ, რაც მნიშვნელოვნად ამცირებს გვერდითი ეფექტების რისკს და იცავს ორგანიზმის ბუნებრივ მიკროფლორას.
ეს მეთოდი ეფექტურად გამოიყენება სხვადასხვა ბაქტერიული ინფექციის დროს: კანისა და ჭრილობების ინფექციებიდან დაწყებული, შარდ-სასქესო, სასუნთქი და საჭმლის მომნელებელი სისტემის დაავადებებით დასრულებული. განსაკუთრებით მნიშვნელოვანია ის შემთხვევები, როდესაც ანტიბიოტიკები უკვე აღარ იძლევა შედეგს.
რას ნიშნავს თქვენთვის ამ კლინიკის სათავეში ყოფნა?
ეს საქმიანობა ჩემთვის მხოლოდ პროფესია არ არის, ეს პასუხისმგებლობა და მისიაა. ყოველდღიურად ხედავ, როგორ ეხმარება ეს მეთოდი ადამიანებს რთულ სიტუაციებში და როგორ აძლევს მათ ალტერნატიულ გამოსავალს.
ელიავას ფაგოთერაპიის ცენტრი აერთიანებს მეცნიერებას, ისტორიას, ინოვაციას და ადამიანურ ზრუნვას. სწორედ ეს კომბინაცია ქმნის გარემოს, სადაც შეგიძლია რეალურად მოახდინო გავლენა ადამიანის ჯანმრთელობასა და ცხოვრებაზე.
რა არის კლინიკის მთავარი ძალა?
ჩვენი მთავარი ძალა გამოცდილებასა და გუნდშია. ცენტრში მუშაობენ ექიმები, მეცნიერები, მიკრობიოლოგები და ადმინისტრაციული გუნდი, რომლებიც ფაგოთერაპიის მიმართულებით მრავალწლიანი პრაქტიკული გამოცდილებით გამოირჩევიან.
ფაგოთერაპია მოითხოვს ინდივიდუალურ მიდგომას და თითოეული შემთხვევის სიღრმისეულ ანალიზს. სწორედ ამ პროცესში იკვეთება ჩვენი გუნდის პროფესიონალიზმი – მოლეკულური კვლევებიდან კლინიკურ პრაქტიკამდე.
ლიკა მუმლაძე – ბაქტერიოფაგის კლინიკის მარკეტინგის მენეჯერი
ფაგოთერაპია საკმაოდ სპეციფიკური სამედიცინო მიმართულებაა. რამდენად რთულია მსგავსი სფეროს კომუნიკაცია ფართო აუდიტორიასთან?
ეს ერთ-ერთი ყველაზე საინტერესო გამოწვევაა. ჩვენ ყოველდღიურად გვიწევს ისეთ თემაზე კომუნიკაცია ფართო აუდიტორიასთან, რომელიც ერთდროულად არის სამეცნიერო, კლინიკური და თანამედროვე მედიცინისთვის განსაკუთრებით მნიშვნელოვანი.
ჩვენთვის მნიშვნელოვანია, ინფორმაცია იყოს პროფესიონალური, მაგრამ, ამავე დროს, ადამიანებისთვის გასაგები და ემოციურად ნაცნობი. სწორედ ამიტომ, კომუნიკაციისას დიდ ყურადღებას ვუთმობთ განათლებას, ცნობიერების ამაღლებას, რეალურ ისტორიებს და ნდობის შექმნას.
როგორ აშენებთ ნდობას ისეთი პაციენტებისთვის, რომლებიც სხვადასხვა ქვეყნიდან გიკავშირდებიან?
სამედიცინო სფეროში ნდობა ყველაზე მნიშვნელოვანი ფაქტორია. განსაკუთრებით მაშინ, როდესაც ადამიანები სხვა ქვეყნებიდან ეძებენ მკურნალობის ალტერნატიულ გზებს.
ჩვენთვის ძალიან მნიშვნელოვანია გამჭვირვალე კომუნიკაცია, პაციენტთან მუდმივი კავშირი და ის, რომ ადამიანმა თავიდანვე იგრძნოს პროფესიონალიზმი და მხარდაჭერა.
ასევე, ძალიან დიდ როლს თამაშობს საქართველოსა და ელიავას ინსტიტუტის ისტორიული ავტორიტეტი ფაგოთერაპიის მიმართულებით.
რა გამოარჩევს ელიავას ფაგოთერაპიის ცენტრს საერთაშორისო დონეზე?
ჩვენი მთავარი უპირატესობა უნიკალური გამოცდილებაა. ცენტრი ეფუძნება მრავალწლიან სამეცნიერო და კლინიკურ მემკვიდრეობას, რაც მსოფლიოში ძალიან იშვიათია.
ამასთან ერთად, ჩვენთვის მნიშვნელოვანია თითოეულ პაციენტთან ინდივიდუალური ურთიერთობა და მაღალი ხარისხის მომსახურება, დაწყებული სამედიცინო პროცესით, დასრულებული საერთაშორისო პაციენტების მხარდაჭერითა და კომუნიკაციით.
სწორედ ისტორიის, მეცნიერებისა და თანამედროვე მიდგომების ერთიანობა ქმნის იმ უნიკალურ გარემოს, რომელიც ჩვენს ცენტრს საერთაშორისო დონეზე გამოარჩევს.
როგორ ხედავთ ფაგოთერაპიისა და ცენტრის განვითარებას მომავალში?
ჩვენი მიზანია, საქართველო კიდევ უფრო მყარად დამკვიდრდეს ფაგოთერაპიის ერთ-ერთ მნიშვნელოვან საერთაშორისო ცენტრად.
აქტიურად ვმუშაობთ ადგილობრივი და საერთაშორისო ცნობადობის ზრდაზე, საგანმანათლებლო პროექტებზე, პარტნიორობებსა და ახალი საკომუნიკაციო პლატფორმების განვითარებაზე.
გვჯერა, რომ ფაგოთერაპიას თანამედროვე მედიცინაში ძალიან მნიშვნელოვანი როლი ექნება და საქართველო ამ პროცესის ერთ-ერთი მთავარი ნაწილი იქნება.
[პარტნიორის კონტენტი]
