დაბადების დღეზე პირველი კი ტორტი, სანთლები და მილოცვები გვახსენდება, მაგრამ იცოდით, რომ ანიმაციებიც თან ახლავს?! Google-ის Find Your Doodle-ის ფუნქცია ამაში დაგარწმუნებთ — ნებისმიერ ადამიანს საშუალებას აძლევს, ნახოს, რომელ დუდლს იყენებდა გუგლი წლების მანძილზე მათსავე დაბადების დღეზე.
Doodles.google.com-ზე განთავსებული ინსტრუმენტი დუდლების კოლექციას გთავაზობთ, რომელიც აღნიშნავს ყველაფერს ისტორიული მოვლენებით დაწყებული და ნაკლებად ცნობილი დღესასწაულებით დამთავრებული. არქივი სიღრმისეული და მრავალფეროვანია, შესაძლოა, თქვენს დაბადების დღეზე ერთ წელს ნობელის პრემიის ლაურეატი მეცნიერის პატივისცემას ეძღვნებოდეს, მეორე წელს რეგიონალურ ფესტივალს, მესამე წელს კი კლასიკურ ვიდეოთამაშებს…
აღსანიშნავია, რომ Google Doodles 1998 წლიდან არსებობს — მას შემდეგ, რაც თანადამფუძნებლებმა ლარი პეიჯმა და სერგეი ბრინმა თავხედურად დაამატეს Burning Man-ის ლოგო მთავარ გვერდზე, რათა მომხმარებლებისთვის ეთქვათ, რომ ოფისში არ იმყოფებოდნენ. სწორედ ამ ამბის შემდეგ გადაიქცა Doodles სტატიკური სურათებიდან ანიმაციებად, თამაშებად და ინტერაქტიულ პატივისცემის საშუალებად არტისტებისთვის, გამომგონებლებისა თუ მსოფლიო მოვლენებისადმი.
ფუნქციის გამოყენება საკმაოდ მარტივია — გადადით Doodle-ის მთავარ გვერდზე, შემდგომ იპოვეთ Find Your Doodle-ის სექცია და ჩაწერეთ თქვენი დაბადების თარიღი. ერთი კლიკით Doodle-ების კოლექციას ნახავთ, რომლებშიც მითითებულ კონკრეტულ დღესთან დაკავშირებული ვიზუალები იქნება ნაჩვენები წლების მანძილზე. ზოგი ადგილობრივ ამბებს ეძღვნება, ზოგი კი საერთაშორისოდ მნიშვნელოვან საკითხებს, თუმცა, თავის მხრივ, ყველა საინტერესოა. შესაძლოა, აღმოაჩინოთ, რომ თქვენს დაბადების დღეს უცნობი გმირები, საერთაშორისო დღესასწაულები ან დიდი ხნის მივიწყებული თამაშები უკავშირდება… შედეგები კი აუცილებლად გაგვიზიარეთ.
