in

როგორ მივიღოთ კომპენსაცია ავიარეისის გადადების ან ბარგის დაზიანების შემთხვევაში? სტარტაპი FlyHelp

Startauperi
Startauperi

ერთი კვირის წინ, ქართულ ინტერნეტსივრცეში სტარტაპი FlyHelp გამოჩნდა, რომელიც ავიამგზავრებს რეისის გადადებისას, გაუქმებისას ან გადაჯავშნისას, კომპენსაციის მიღებაში დახმარებას სთავაზობს. ევროპაში მსგავსი მეთოდი აპრობირებულია და შესაბამისად, არსებობს მრავალი კომპანია, რომელიც ავიამგზავრებს მსგავსი, საკონსულტაციო-საშუამავლო სერვისით უზრუნველყოფს. სტარტაპის იდეა და შესრულება ვატო ფარცხალაძესა და მიხეილ ჭანტურიას ეკუთვნით, რომლებსაც აქვთ როგორც იურიდიული, ასვეე, გერმანულ ავიახაზებში მუშაობის გამოცდილება. როგორ აპირებს FlyHelp გახადოს ქართველი მგზავრებისა და ავიაკომპანიების ურთიერთობა უფრო ცივილური და მარტივი – ამ საკითხზე მარკეტერს სტარტაპის ერთ-ერთი შემქმნელი – ვატო ფარცხალაძე ესაუბრა:

ვატო ფარცხალაძე და მიხეილ ჭანტურია.

M: როგორ შექმენით FlyHelp და რა საჭიროება იყო ამ მხრივ ქართულ ბაზარზე?
ვარ პოტსდამის უნივერსიტეტის დოქტორი, 10 წელი ვცხოვრობდი გერმანიაში და ვმუშაობდი ადგილობრივ ავიახაზებშიც. წელს, პეგასუსის ავიახაზით მოვფრინავდი ბერლინიდან თბილისში. ბარგის სახით წამოვიღე ველოსიპედი, რომელიც მივიღე დაზიანებული თბილისის აეროპორტში. დავიწყე საჩივრის მომზადება. სანამ სწორ საკონტაქტო მონაცემებს მოვიპოვებდი, დამჭირდა დიდი დრო. სამწუხაროდ, ავიაკომპანიისგან ბარგის ანაზღაურებაზე უარი მივიღე. დავიწყე მოკვლევა ავიამგზავრების უფლებებთან დაკავშირებით, გავეცანი სხვადასხვა ადგილობრივ და საერთაშორისო რეგულაციებს. მიღებული ინფორმაციის საფუძველზე, მოვამზადე სრულიად განსხვავებული, კვალიფიციურად შედგენილი წერილი, კონკრეტული კონვენციებისა და რეგულაციების მუხლების მითითებით. ჩემს წერილზე სულ მალე პოზიტიური პასუხი მივიღე და თანხაც 4 სამუშაო დღეში, ანგარიშზე ჩამერიცხა. შემდგომში, ჩემს მეუღლესაც ანალოგიური რამ შეემთხვა, მაგრამ უკვე შემზადებული დავუკავშირდი ავიახაზს და მოკლე ვადაში, ჩემმა მეუღლემაც მიიღო კუთვნილი ანაზღაურება. ზემოაღნიშნული მაგალითებიდან გამომდინარე, მივედი დასკვნამდე, რომ ბაზარზე არსებობდა რეალური პრობლემა, რამაც გადამაწყვეტინა ახალი კომპანიის დაარსება. ეს ამბავი ჩემს მეგობარს მოვუყევი. მასაც ჰქონდა მსგავსი გამოცდილება, როცა რეისის დაგვიანების გამო, ათათურქის აეროპორტში 11 საათი ლოდინი მოუწია. მიუხედავად კანონმდებლობაში გაწერილი უფლებებისა, მოწყალების სახით, მან ავიაკომპანიისაგან მხოლოდ 5 ევროიანი, საკვებისთვის განკუთვნილი ვაუჩერი მიიღო. მგზავრობისას მიღებული ნეგატიური გამოცდილების გაზიარების შემდგომ, გადავწვიტეთ რომ გავერთიანებულიყავით. მიხეილს დიდი გამოცდილება აქვს სატრანსპორტო სფეროში, თან იურისტია, რაც ამ საქმისთვის კარგი წინაპირობაა.

M: კონკრეტულად, რა უფლებები აქვთ მგზავრებს ბარგის დაზიანების, რეისის გადადების ან გაუქმების შემთხვევაში?
მგზავრები, რომლებიც მოგზაურობენ საჰაერო ტრანსპორტით, სარგებლობენ სპეციალური უფლებებით. კერძოდ, თუ რეისმა დაიგვიანა 2 ან მეტი საათით, ავიახაზები ვალდებულნი არიან, მგზავრები უზრუნველყონ უფასო საკვებითა და გამაგრილებელი სასმელით. ხოლო, თუ რეისმა დაიგვიანა სამი ან მეტი საათით, მგზავრები ღებულობენ კომპენსაციას 600 ევრომდე იმ შემთხვევაში, თუ დაგვიანება, ან რეისის გაუქმება გამოწვეულია ავიხაზის მიერ. მაგალითად, ტექნიკური გაუმართაობის გამო.
კომპენსაციის ოდენობა დამოკიდებულია ფრენის მანძილზე. მაგალითად, თუ მგზავრი მიფრინავს 1500 კილომეტრამდე მანძილზე, მას დაგვიანების, გაუქმების ან გადაჯავშნის შემთხვევაში, 250 ევრო კომპენსაცია ეკუთვნის. 1500-დან 3500 კილომეტრამდე – 400, ხოლო, 3500 კილომეტრზე მეტ მანძილზე ფრენისას – 600 ევრო. ბარგის დაზიანების შემთხვევები უფრო კომპლექსურია და ბევრ რამეზეა დამოკიდებული. ძირითადად, საგრძნობი დაზიანების შემთხვევისას, ავიახაზები ვალდებულნი არიან აუნაზღაურონ მგზავრს ბარგის სრული ღირებულება, ხოლო, უმნიშვნელო დაზიანებისას – შეკეთების საფასური.

[fbvideo link=”https://www.facebook.com/GetCompensationNow/videos/516805512012119/” width=”720″ height=”405″ onlyvideo=”1″]

M: მგზავრებს შეუძლიათ პირდაპირ მიმართონ ავიახაზებს მსგავსი პრობლემის არსებობის შემთხვევაში. რა არის თქვენი როლი ამ საკითხში?
დიახ, რა თქმა უნდა, შეუძლიათ, მაგრამ კომპენსაციის მიღების პროცედურა გარკვეულ დროსთან და ხარჯთან არის დაკავშირებული. მგზავრმა თავდაპირველად უნდა მოიძიოს ავიახაზის სწორი საკონტაქტო მონაცემები, განახორციელოს სატელეფონო ზარები. კარგ შემთხვევაში მას უპასუხებენ. გარდა აღნიშნულისა, საჩივრის წერილი უნდა მომზადეს კვალიფიციურად. კანონმდებლობის კომპლექსურობის გამო, აღნიშნული საკითხი არც თუ ისეთი მარტივია. მეტიც, როგორც უკვე აღვნიშნე, კომპენსაციის მიღების აუცილებელი წინაპირობაა, რეისის გადადება ან გაუქმება გამოწვეული იყოს ავიაკომპანიის მიერ. მოქმედი რეგულაცია მიუთითებს, ავიაგადამზიდველს არ დაეკისრება კომპენსაციის გადახდის ვალდებულება, თუ ის დაამტკიცებს, რომ ფრენის გაუქმება გამოწვეულია განსაკუთრებული ვითარებით. განსაკუთრებულ ვითარებად შეიძლება ჩაითვალოს: მეტეოპირობების გაუარესაბა, ფრენის უსაფთხოებასთან ან საავიაციო უშიშროებსთან დაკავშიებული რისკები, გაფიცვები და სხვა. როგორც ხედავთ ავიაკომპანიებს დიდი ვარირების საშუალება აქვთ, რათა თავიდან აირიდონ კომპენსაციის გადახდა. მგზავრს გაუჭირდება ავიაკომპანიასთან დავა, რადგანაც კომპენსაციის მიღებამდე, ჩვენი სერვისი მგზავრისთვის უფასოა, მგზავრი არაფერს კარგავს. მეტიც, ჩვენი სერვისის სარგებლობის შემთხვევაში იგი, როგორც დროს, ასევე, ფინანსებს ზოგავს. კომპენსაციის მიღების შემთხვევაში კი, ჩვენ მიერ გაწეულ დახმარებაში, ავიამგზავრის ანგარიშსწორების 30%-ს ვიღებთ.

M: როგორ უნდა მოიქცნენ ავიამგზავრები რეისის გადადების ან ბარგის დაზიანების შემთხვევაში?
ფრენის გაუქმებისას, აუცილებელია მოთხოვოთ ავიახაზებს ოფიციალური განმარტება, თუ რის გამო მოხდა ფრენის გაუქმება. მსგავსი დოკუმენტის არსებობა, შემდგომში საგრძნობლად გაგიადვილებთ დავის წარმოებას. ხოლო, ბარგის დაზიანების შემთხვევაში, სასურველია, აეროპორტშივე დადგინდეს დაზიანება. ეს ხორციელდება, ე.წ Lost and Found ოფისში, სპეციალური ფორმის შევსებით, რომელსაც PIR (Property Irregularity Report) ეძახიან. აღნიშნული დოკუმენტი დაგეხმარებათ კუთვნილი კომპენსაციის სწრაფ მიღებაში.

M: რა მიმართულებით გეგმავთ FlyHelp-ის განვითარებას? 
პირველ ეტაპზე, დავიწყებთ ვებპლატფორმით, შემდეგ, გვინდა, რომ აპლიკაციის ფორმა მიიღოს, იმისათვის, რომ მგზავრს გაუადვილდეს ჩვენთან ურთიერთობა და აეროპორტშივე შეძლოს აპლიკაციის საშუალებით ჩვენთვის მომართვა. ამ სერვისის წარმატების შემთხვევაში, ვგეგმავთ, შევქმნათ ბოტი, რომელთანაც მარტივად შეეძლებათ კომუნიკაცია და კითხვებზე პასუხის მიღება, მაგალითად, ეკუთვნის თუ არა კონკრეტულ ადამიანს კომპენსაცია. ამ ეტაპზე კი, დაზარალებულ ავიამგზავრებს შეუძლიათ დაგვიკავშირდნენ ვებგვერდის ან ფეისბუკის მეშვეობით, ასევე, დაგვირეკონ და გამოგვიგზავნონ საკუთარი ბორტბარათი.

„ზანდუკელის“ ლიმონათის განახლებული გემო და შეფუთვა

Boston Dynamics-ის ახალი ჰუმანოიდი რობოტი სალტოებს აკეთებს!