მსოფლიოს წამყვანი გამოცემების ქართულმა გამომცემლობამ “Forbes Georgia“ 2018 წელი შეაჯამა და 5 სხვადასხვა ნომინაციაში, გამორჩეული პიროვნებები და კომპანიები დაასახელა.
2018 წლის “Forbes Women“ ეტლით მოსარგებლეთა ფარიკაობაში მსოფლიო თასის მფლობელი (2018), საქართველოს პარამოფარიკავეთა ნაკრების ლიდერი, ირმა ხეცურიანი გახდა.
რაც შეეხება დანარჩენ ნომინაციებს: “Forbes Partner 2018“-ის ჯილდო კომპანიამ „დირსი“ და მისმა ხელმძღვანელმა ბესიკ ჯიქურაულმა მიიღო; 2018 “Forbes Startup 2018“ ტექნოლოგიური კომპნია Palatine Analytics და მისი დამფუძნებელი არჩილ ჭეიშვილი გახდა; “Forbes Social Impact 2018“-ის ჯილდო „სილქ როუდ ჯგუფს“, კომპანია „სილქნეტს“ და გიროგი რამიშვილს („სილქ როუდ ჯგუფის“ დამფუძნებელი და „სილქნეტის“ სამეთვალყურეო საბჭოს თავმჯდომარე) გადაეცა; “Forbes Entrepreneur 2018“ კი კომპანია „ჩირინას“ დამფუძნებელი რევაზ ვაშაკიძე გახდა.
შეგახსენებთ, ყოველწლიურ დაჯილდოებას საფუძველი 2017 წელს, Forbes-ის 100 წლის იუბილესთან დაკავშირებით ჩაეყარა.
აღსანიშნავია, რომ დღეს, ჟურნალი მსოფლიოს 50-ზე მეტ ქვეყანაში, 20-ზე მეტ ენაზე გამოიცემა. მათ შორის, ქართულად – გამოცემა საქართველოში, პირველად, 2011 წელს გამოჩნდა. “Forbes Georgia“ მსოფლიოს გავლენიანი ბიზნესჟურნალის – ForbesMedia N.Y.-ის ლიცენზირებული, ყოველთვიური გამოცემაა. მას ადგილობრივი ბაზრისთვის, სს “Media Partners”, Forbes Media LLC NY სალიცენზიო ხელშეკრულების საფუძველზე გამოსცემს.
