კვანტური გამოთვლების განვითარების დეფიციტი ნამდვილად არ გვაქვს, მაგრამ, როგორც ჩანს, ამ მანქანების ასამუშავებლად გასაღები ჯერ კიდევ ვერ ვიპოვეთ, ზოგიც ფიქრობს, რომ ტექნოლოგიას ამისთვის კიდევ 5 წელი მაინც დასჭირდება… თუმცა საიმონ ფრეიზერის უნივერსიტეტის მკვლევრები მნიშვნელოვან გარღვევაზე საუბრობენ. აქ კვანტური ტექნოლოგიის განვითარება იგულისხმება, რომელსაც სილიკონის კვანტური ინტერნეტის ჩართვა შეუძლია.
ეს ყველაფერი კი კუბიტებთან არის დაკავშირებული, იმისათვის, რომ კვანტურმა კომპიუტერებმა იმუშაოს, მეცნიერებმა სტაბილური და გრძელი სიცოცხლის ხანგრძლივობის მქონე კუბიტები უნდა დაამზადონ, რომლებიც გადამამუშავებელ ძალასა და საკომუნიკაციო ტექნოლოგიას უზრუნველყოფს, რაც, თავის მხრივ, ამ კუბიტებს ერთმანეთთან დაკავშირების საშუალებას აძლევს. წარსულში კი კვლევებით დადასტურდა, რომ სილიკონს ინდუსტრიაში ყველაზე სტაბილური და გრძელვადიანი კუბიტების წარმოება შეეძლო.
„ეს ნამუშევარი T ცენტრების პირველი იზოლირებული გაზომვაა და, ზოგადად, პირველი გაზომვა სილიკონში, რომელიც ოპტიკურად შესრულდა. T ცენტრის მსგავსი მოწყობილობა იდეალურია მასშტაბირებადი, განაწილებული, კვანტური კომპიუტერების შესაქმნელად, მას შეუძლია დამუშავებასა და კომუნიკაციას ერთდროულად გაუმკლავდეს და აქ ორი განსხვავებული კვანტური ტექნოლოგიის ინტერფეისის საჭიროება აღარ დგას“, — აცხადებს სტეფანი სიმონსი, SFU Silicon Quantum Technology Lab-დან.
გამოდის, T ცენტრები კვანტური გამოთვლებისთვის კარგი არჩევანია. მათ დამატებითი სარგებელიც აქვს — სინათლეს ზუსტად იმავე ტალღის სიგრძეზე ასხივებს, რასაც მეტროპოლიტენის ბოჭკოვანი კომუნიკაციები და ტელეკომუნიკაციის ქსელის აღჭურვილობა იყენებს.
სილიკონი კი კვანტური გამოთვლებისთვის შესანიშნავი არჩევანი იმიტომაა, რომ იგი ტექნოლოგიის სწრაფად მასშტაბირების შესაძლებლობებს გვაძლევს. თანაც, სილიკონის კომპიუტერული ჩიპები უკვე მასობრივად იწარმოება…
„ეს კვანტური გამოთვლების საერთაშორისო რბოლაში თითქმის დაუძლეველ კონკურენტულ უპირატესობას წარმოადგენს “, — ამბობს სიმონსი.
